Polo con mollo de soia e noces

Esta receita é orixinaria de Corea, seica alí se toma como primeiro prato, ou para picar (non sei o nome orixinal, deuma un amigo e non dou con ela en Google...). Leva moito ingrediente pero é moi doada de facer, ten tres pasos! Hai que deixala enfriar, está máis boa ao día seguinte.

Avísovos que é unha vez que se empeza a comer, e ALTAMENTE ADICTIVO.

Ingredientes (para catro ou cinco persoas):

500gr. de peituga de polo cortada en dadiños de 3x3 cm.

2 culleres de fariña

Sal

Para o mollo

1-2 culleres de manteiga

2 culleres de ketchup

4 culleres de salsa de soia

6 culleres de auga

3 culleres de azucre

1 culleriña de pasta de chile - se non dades con ela podedes usar tabasco

2 culleres ben cheas de trociños de noces

Un chisco de pementón doce

  1. Enfariñar o polo, botarlle sal e fritir ata que estea dourado. Retirar nun prato.
  2. Nunha tixola, poñer os ingredientes do mollo todos xuntos, quentar a lume baixo e remexer ata que a salsa quede un pouco espesa. Apagar o lume.
  3. Botar o polo na tixola e remexer ben ata que colla todo o mollo. Pódese servir frío coma entrante, ou morno acompañado de arroz ou cachelos. en todos os casos, vai ser aditivo!

Que aproveite!

NOTA: Esta receita foi publicada orixinalmente en xullo de 2013, está ñe unha versión revisada, e con novas fotos.

polo-soia-3

polo-soia-2


Cebiche de lagostinos, manga e aguacate

Xa tiña ganas de facer un cebiche hai tempo, pero ata hoxe non o din feito, co sinxelo que é! Un prato moi xeitoso para o verán, cando non apetece acender a cociña, e é ademáis moi saboroso e lixeiro.

A receita orixinal é de Cocinando entre olivos, mais eu modifiqueina para facela máis doada e para menos racións! Podedes cambiar os lagostinos por gambas ou polbo, se vos gusta isto, lembrade ler esta receita de polbo mariñado!

Ingredientes (para 3 ou 4 racións)

400 gr. de lagostinos

1 aguacate pequeno

Zume dun limón grande ou 2 limas

Media manga

Media cebola morada

1 culleriña de mostaza

1 semente de caiena

Un chisco de sal e aceite de oliva

Coandro ou perixel, para decoraren

  1. Poñemos os lagostinos nun bol ca cebola pelada, lavada e cortada en anaquiños.
  2. Engaimos a pel relada do limón ou as limas, despois botámoslle o zume.
  3. Engadimos a mostaza, remexendo.
  4. Por último, engadimos o sal e a caiena e metémolo no frigorífico, deixándoo repousar uns 45 minutos.
  5. Cortamos a manga e o aguacate en dadiños e botámolo á mestura ao sacala do frigorífico. Decoramos con aceite de oliva e un pouco de coandro ou perixel.
  6. Servimos frío.

Probastes algunha vezo cebiche? Tendes algunha recomendación? Deixádea nos comentarios ;)

cebiche_lagostino_manga


Costela de porco glaseada ao forno

Esta receita é unha adaptación desta do marabilloso blogue Palachinka, onde podedes atopar moitas receitas larpeiras e especialidades balcánicas (en inglés). Leva moito tempo facela pero o resultado paga a pena 200%: a carne queda tenra e aromática, e a combinación co prebe agridoce é soborosísima! Non digades despois que non vos avisei ;)

Ingredientes (para 4 ou 5 racións)

1,5  quilos de costelas de porco

1,25 l. Coca-Cola, ou outra bebida de cola

1 pau de canela

125 gr. azucre moreno

60 gr. (3 culleres) de mel

130 gr. ketchup

2 culleres de mostaza

2 culleres de mollo Worcester

60 ml. de mollo de soia

    1. Prequecer o forno a 160º
    2. Cubrir o fondo dunha pota con papel de aluminio e colocar as costelas e o pauciño de canela. Botar un litro de cola e cubrir con máis papel de aluminio. Cocer no forno durante dúas horas, aproximadamente.
    3. Namentres, preparamos o mollo, que é o especial da receita. Mesturamos nunha tixola o azucre, o mel, o ketchup, a mostaza e o mollo Worcester con medio litro de Coca-cola. Cocemos a lume medio, remexendo de cando en vez ata que teña unha consistencia de xarope. Ao rematar hai que untar isto nas costelas cun pincel (de silicona), tende conta de que non quede nen moi líquido nen moi espeso.
    4. Sacamos a pota do forno logo de dúas horas e colocamos as costelas nunha bandexa de asar. Tiramos co líquido sobrante.
    5. Estendemos o mollo sobre as costelas cun pincel de cociña e metémolas no forno. Colocamos a bandexa negra con papel de prata por baixo, para recoller as pingas e que non atufe o forno. Nesta fase só compre calor na parte superior do forno.
    6. Tras 10 minutos, dámoslle a volta ás costelas e pintámolas polo outro lado. Repetimos a operación (dúas pintadas por cada lado).

Que aproveite!

costela_3

costela_5


Moqueca (estofado) de peixe

A moqueca é un guiso de peixe típico do Brasil. O seu peculiar nome vén da lingua tupi, é un derivado de de moquém, que significa algo así coma "secador". Na técnica tradicional dos indíxenas o costume era asar a carne ou peixe nunha folla para cocelos no seu propio zume. Coma todas as receitas tradicionais, ten moitas variantes, e dúas rexións teiman por ser a que serven a auténtica moqueca, neste caso o estado de Baía e o de Espírito Santo, no sur.

É un prato  de sabor moi intenso, e paga a pena probalo: esta receita está adaptada para o padal europeo (máis sosiño): cambiei o aceite de palma por xirasol e aínda que soe raro, o leite de coco, e eu non llo botei porque non gusto do seu sabor. De todos os xeitos, é saborosísimo: non quedou nada no prato!

Ingredientes (para 4 racións)

4 filetes de peixe branco (pescada, panga ou bacallao sen salar)

2 tomates, cortados en rodas

2 pementos verdes, sen sementes e cortados en rodas

2 pementos amarelos, sen sementes e cortados en rodas

2 cebolas pequenas, peladas e cortadas en rodas finiñas

2 culleres de aceite de oliva

1 culler de aceite de xirasol

300 ml de leite de coco (OPCIONAL)

1 lima

Media pastilla de caldo vexetal

Unha presa de coandro fresco, ben picado

Sal e pementa negra

  1. Quecemos o aceite de oliva nunha tixola e botamos os pementos verdes e os amarelos. Cociñamolos durante 1o minutos, ou ata que comecen a estar brandos e transparentar.
  2. Botamos os tomates por riba, despois o aceite de xirasol, o leite de coco (podédelo cambiar por auga, que é o que fixen eu) o coandro, o sal e a pementa. Deixamos cocer a lume medio sen remexer durante 5 minutos.
  3. Colocamos os filetes de peixe por riba e deixamos cocer, sen remexer cunha tapa por riba durante 5-7 minutos, dependendo do grosor.
  4. Pasamos a moqueca a un prato e aliñamola co zume da lima, un chisco máis de sal e un pouco de aceite de oliva. Acompañámola co arroz branco, cachelos ou pan, o que prefirades!

Bo proveito!

moqueca_1

 

 


Calzone de touciño, pera e gorgonzola

Esta semana temos un prato moi especial, tiña ganas de probalo hai un tempo e quedei moi contenta co resultado! Este calzone é moi doado de facer, pero hai que ter en conta o tempo de fermento, así que é mellor comezar unha hora e media antes de poder comelo. Os vexetarianos podedes aquelar a receita cambiando o touciño por noces ou anacardios, coma nesta quiche que tanto éxito tivo no seu día. Tamén paga a pena probar esta marabillosa receita de Kukinhas: ravioli de cabaciña recheos de pera, gorgonzola e noces.

Se vos gusta a mestura de doce e salgado, botádelle un ollo a este espeto de porco e albaricoque, ou a estes scones de queixo e mostaza ;)

Ingredientes (para 3 ou 4 racións)

Para a masa

200 gr de fariña normal

200 gr. de fariña de forza (tamén chamada de panadeiro ou "doble 0"

50 ml. de aceite de  oliva virxe extra

200 ml de auga morna

1 culleriña de sal

1 culleriña de azucre

1 sobre de fermento seco

Para o recheo

1 pera grande, madura

150 gr. de queixo Gorgonzola (do que non pica)

100 de touciño entrefebrado

Tomiño

Sal e pementa

Aceite de oliva (mellor se é e spray, se non tendes, buscade un pincel de cociña)

  1. Comezamos coa masa: Nun bol grande mesturamos a auga, o aceite de oliva e a levadura, mesturando ben para disolvela. Engadimos o sal e a fariña, remexendo cunha culler de pau ata que estea homoxeneo.
  2. Tapamos o bol cunha rolla e deixamos repousar ao carón dunha fonte de calor (radiador, cociña quente...) durante unha hora, ata que doble o seu tamaño.
  3. Prequecemos o forno a 240º
  4. Estendemos un pouco de fariña nun mesado e amasamos a masa ata que se despegue dos dedos facilmente.
  5. Estendemos a masa nun papel de forno e dámoslle forma rectangular ou oval.
  6. Botamos un chisco de aceite de oliva nunha metade, colocamos as peras en láminas finas, despois o touciño, o tomiño, o queixo gorgonzola e finalmente un pouco de sal, pementa e algo máis de aceite.
  7. Dobramos a masa para pechar o calzone e xuntamos as beiras, selando para que non saia o recheo.
  8. Cunhas tesoiras de cociña abrimos varias fendas en diagonal, e botamos un pouco de aceite en spray por riba.
  9. Cocemos no forno a altura media durante 20-25 minutos a 200º, ou ata que esta ben dourado.
  10. Deixámolo repousar 5 minutos e servimos aínda quente.

Que aproveite!

PD: Sempre que me lembro poño a fonte da receita, neste caso é unha adaptación desta de Directo al paladar!

calzone_toucinho_2

calzone_toucinho_3