Sopa de cabaza con ameixas refogadas

Unha sopa de outono para aproveitar as ameixas frescas. Seguro que xa fixestes sopa de cabaza algunha vez, nesta receita tentei darlle un toque diferente engadindo as ameixas refogadas, unha idea que saquei desta receita de El comidista.

Ingredientes (para 4-5 persoas)

1 quilo de cabaza

1/2 cebola

1 pataca grande

75 gramos de manteiga

Sal e pementa

Para a gornición:

6 ameixas

2 culleres de améndoa moída

1 culleriña de perixel

2 culleres de aceite de oliva

Azucre (opcional)

sopa_cabaza3

  1. Nunha pota grande botamos a manteiga e derretimola.
  2. Cortamos a cebola en rodas finas, botámola la tixola. Pelamos a cabaza, cortámola en dados e engadímola á tixola xunto co sal e a pementa. Co lume medio, deixamos que coza durante 20 minutos.
  3. Engadimos a auga ao contido da pota e tambén a pataca pelada e cortada. Deixamos cocer 40 min, proximadamente, a lume medio. Retiramos a sopa para logo.
  4. Quitámoslle o óso as ameixas e partímolas en 6 ou 8 anacos cada unha, dependendo do grandes que sexan. Nunha tixola a lume alto, pasámolas 30 segundos sen aceite, e despois engadimos as améndoas, o aceite e máis o perixel. Probamos, e se está acedo engadimos un chisco de azucre.
  5. Servimos a sopa en boles e decoramos cas ameixas.

Que aproveite!

sopa_cabaza2
Sopas xemelgas

 


Prasopita - Torta de porros e cebola

Andaba eu procurando unha receita para usar un feixe de porros que esmorecía no frigorífico e din con esta torta salgada orixinaria do noroeste de Grecia, moi doada de facer. Hai versións de pataca (Patatopita) ou de espinacas (Spanakopita), e adoita levar unha base-cobertura de filo: un tipo de follado, igual que o que se usa nos doces chamados baklavas. Eu non fixen porque quería algo rapidiño, se queredes ver como se fai (leva moito traballo) podedes consultar este fantástico video con música de Daft Punk.

É un pastel, que se pode comer quente ou do tempo, e está máis rico ao día seguinte. Velaiquí a receita:

Ingredientes (para 6 persoas):

8 culleres de aceite de oliva

3 ou 4 porros grandóns

Unha cebola mediana, ben picada

3 ovos

350 ml de leite (un vaso e medio)

250 gramos de queixo feta (atopable no LIDL)

200 gramos de fariña

Unha culler de aneto

Unha culleriña de ourego

Sal e pementa ao gusto

 

  1. Prequentar o forno a 180º
  2. Cortar os porros moi finiños e usar a parte branca, deixando a parte verde para facer un caldo, se queredes.
  3. Botar 6 culleres de aceite de oliva na tixola, quentar e botar o porro picado e a cebola ata que douren e estean tenros.
  4. Bater os ovos nun bol grande, engadir o queixo cortado en dadiños, a fariña, as especias e o porro ca cebola. Bater ben.
  5. Untar un molde co aceite de oliva (dúas culleres) e esparexer cun pano de mesa de papel. Verter a masa e cociñar no forno durante 45-60 minutos, dependendo do molde que esteades a usar.
  6. Deixar enfriar, estará máis bo ao día seguinte!
prasopita3
Preme na imaxe para vela máis grande

 

Que aproveite ;)

 


arancinis de lacón

Arancinis de lacón e queixo

Os arancini son unha receita típica de Italia que, igual que as croquetas, serve para aproveitar as sobras do risotto. Chamánse así porque asemellan pequenas laranxas, o tamaño e forma varía nas diferentes rexións italianas: en Sicilia son máis grandes e picudos, mentres que na península son pequeniños. Este é o tamaño que imos usar nesta receita, porque é máis doado fritilos así.

O recheo pode variar, se por algunha razón estrañísima non vos gusta o lacón e o queixo, podedes probar chícharos, espinacas, carne picada, etc. A miña receita é unha variación desta, que leva cordeiro.

Ingredientes

25 gr. de manteiga

200 gr de arroz redondo

600ml de caldo de polo

1 culler e media de aceite de oliva

1 cebola grande, cortada en anacos moi pequenos

2 dentes de allo, pelados e esmagados

150 gramos de lacón cocido

100 gr de queixo brie, de Arzúa, calquera que sexa suave

2 ovos batidos

100gr de pan raiado

50gr de fariña, para rebozar

1 culler de tomiño

Sal e pementa

Aceite de xirasol, para fritir

  1. Derretir a manteiga nunha tixola. Botar o arroz, e cano quente, engadir 100ml de caldo. Ferver durante dous minutos ata que o arroz absorva o caldo e repetir a operación ata acabar o líquido (leva aproximadamente 40 minutos). Reservar.
  2. Quentar o aceite de oliva noutra tixola grande, botar a cebola e o allo e remexer. Cando a mestura estea branda, engadir o lacón co sal e a pementa e douralo.
  3. Quitar a meirande parte do aceite e verter o arroz do paso 1, xunto co tomiño, o queixo en dadiños e un chisco máis de pementa. Remexer cun pau e facer bolas cas mans, de aproximadamente 50 gramos cada unidade.
  4. Colocar a fariña, os ovos e o pan raiado en diferentes pratos. Rebozar primeiro coa fariña, logo cos ovos e finalmente co pan.
  5. Nunha tixola botar aceite de xirasol ata que haxa 0,5 cm de profudidade. Cando estea quente (facede a proba botando unha miguiña, debería dourar en 30-40 segundos) fritir as bolas tendo coidado que se se fagan por todos os lados.
  6. Colocar nun plato con papel de cociña por debaixo, para que chunche a graxa sobrante. Se os comedes de seguido estarán máis crocantes, pero se os deixades para o día seguinte, terán máis sabor ;)

 

Mmmmmmmmmmmmm
Mmmmmmmmmmmmm

Guacamole!

Algúns alimentos preparados e envasados están bastante ben (a salsa pesto...) pero hai outros que non teñen xeito ningún. O guacamole de bote NUNCA está bo, e co doada que é a receita, paga a pena a facelo un mesmo.

Hai mil millóns de receitas de guacamole, e non sei se esta será moi ortodoxa, pero é a que ten ingredientes que máis facilmente se atopan. Se queredes levar un entrante para unha cea ou un picnic, triunfades seguro.

Ingredientes (para un bol mediano, pican tres ou catro persoas):

2 aguacates maduros - a punta ten que estar un pouco fofa.

1 tomate pequeno, maduro

Media cebola

Un chisco de coandro

Unha culleriña de mel

Zume de medio limón

Sal

6 - 8 pingas de salsa tabasco

  1. Abrir os aguacates pola metade, retirar a semente e quitar a polpa cunha culler. Trocear e botar no bol.
  2. Picar os tomates en dadiños e a cebola moi fina. Botar ao bol xunto co coandro, o mel, o zume, o tabasco e un chisco do sal.
  3. Bater ca batidora ata que quede uniforme pero con algúns cachiños. Se vos gusta con anacos gordos, en vez de usar a batidora podedes esmagar todo cun garfo.
  4. Se queda moi acedo, podedes botarlle máis mel ou un pouquiño de azucre. Ás veces hai que correxir a cantidade de sal tamén.
  5. No caso de que non o consumades inmediatamente, metede a semente no medio do guacamole, medio fundida, e tapade con film de plástico (tocando a superficie do guacamole). Así evitaredes que oxide e saque unha cor marrón bastante desagradable.

Que aproveite!


Benvidos!

Aquí atoparedes: receitas, trucos, ingredientes, trucos que aprendin despois de varias desfeitas na cociña, restaurantes e (espero) un longo etcetera

 

Se quedes aportar recetas ou ideas, podedes usar os comentarios, escribir a queroxamon@gmail.com ou deixar recado no Twitter: @queroxamon