Cookies de chocolate

Esta semana temos unha receita ben clásica, non das de toda a vida, pero si duns doces que se consomen bastante hoxe en día, sobre todo na súa versión industrial. As cookies adoitan diferenzarse das galletas (ou biscoitos) tradicionais no tamaño pero tamén na textura: son máis brandiñas e idealmente han de quedar crocantes polas beiras e tenras no centro. Hai tempo que fixen unhas de pexegos con noces de macadamia, pero estas teñen a masa perfecta.

A receita é unha adaptación desta do blog de Nigella, unha famosa cociñeira británica cunha páxina da que son totalmente fan. Se non tendes trituradora ou non vos apetece esmagar o chocolate, aproveitade para compraren chips de chocolate, véndenas na sección de repostería dos supermercados grandes. Podedes cambiar o chocolate por noces ou uvas pasas ha quedar boísimo tamén!

Ingredientes:

100 gramos de manteiga, temperada

220 gr de azucre

2 culleriñas de extracto de vainilla

1 ovo, frio

1 xema de ovo, fria

50 ml de leite frio

300 gr de fariña

Media culleriña de bicarbonato

1 tableta de 125 gr. chocolate negro, ou con leite

  1.  Esmagamos a tableta de chocolate ata que escache en anacos mais ou menos regulares. Despois pasámola pola tritura dora ata que sexan máis pequenos (algo menos de 0,5 cm).
  2. Prequecemos o forno a 170º, e colocamos papel de forno na bandexa negra.
  3. Nun bol poñemos a manteiga e o azucre, batemos ata ter unha pasta homoxenea.
  4. Engadimos o leite, o ovo, o extracto de vainilla e maila xema, seguemos a bater ata volver ter unha cobertura homoxénea.
  5. Botamos os anacos de chocolate e a fariña aos poucos, mentres batemos.
  6. Por último, engadimos o bicarbonat e batemos un pouco máis.
  7. Coa axuda de dúas culleres, facemos boliñas e colocámolas na bandexa deixando 5 cm de espacio entre elas.
  8. Cocemos no forno durante 12-15 minutos, ata que douren polas beiras. Sacámolas do forno e deixámolas repousar 5 minutos na bandexa de reixas. Aínda que parezan moi brandas, cando arrefríen quedarán ben.

Podémolas gardar nunha tarteira (mellor que sexa hermética) e durarán 3 ou 4 días. Que aproveite!

 

cookies_choco_1

 


Galletas de manteiga de cacahué

A manteiga de cacahué é un deses alimentos que teñen moi mala fama polo contido en graxa que teñen, pero que usada en cantidades pequenas dalle un sabor moi especial aos pratos. Aparte de usala para untar torradas ou comela a culleradas, serve para facer prebes tipo asiático (usase moito en Indonesia e Tailandia) ou estas deliciosas galletas, que de seguro triunfarán cos máis cativos.

PD: Xa sei que a normativa di que é "cacahuete", pero a min soame moito mellor o de cachué. É se a persoa di "as cacahués aínda mellor. Cousas de cada un.

Ingredientes:

200 gr de azucre, moreno a poder ser
110 gr. de manteiga temperada
130 gr. de manteiga de cacaué
1 ovo grandeiro
Media culleriña de extracto de vainilla
180 gr. de fariña
Media culleriña de bicarbonáto sódico
Media culleriña de sal
Azucre glass, chips de chocolate ou cacahués moídos para a cobertura

  1. Nun bol mesturamos a manteiga temperada, a de cacahué e o azucre. Batemos cunha batedora de variñas, ou con dous garfos, ata que teña unha textura lixeira.
  2. Engadimos o ovo e mailo extracto de vainilla e seguimos batendo.
  3. Botámoslle a fariña o sal e o bicarbonato, batemos todo.
  4. Tapamos o bol con film transparente e deixámolo repousar no frigorífico a lo menos unha hora. Pódese deixar toda a noite, por se tendes outras cousas que facer.
  5. Prequentamos o forno a 170º e poñemos papel de forno na bandexa lisa.
  6. Facemos boliñas do tamaño dunha noz, (teñen que quedar ben redondas) colocámolas a 5 cm unhas doutras (hanse expandir moito, así evitamos que queden pegadas) e esmagámolas un pouco cun garfo. Botámoslle a nosa cobertura favorita e cocemos no forno durante 10-12 min. pero non máis porque se non han quedar secas.
  7. Retirámolas e deixamos arrefriar para que queden crocantes por fóra.
  8. Hai que comelas preferentemente no mesmo día, porque se nón collerán humidade. Se queredes que duren uns días máis, gardádeas nun recipiente hermético.

Que aproveite!

galletas_cacahue3 galletas_cacahue2


Biscoitos de vainilla estilo vienés

Estes biscoitos (ou galletas) tan curriños son unha especialidade que se toma polo Nadal en Austria, Bohemia e o sur de Alemaña, pero en Viena teñen tanta sona que se toman todo o ano. O seu nome orixinal é Vanillekipferl e teñen a peculiaridade  e de deixar un arrecendo tan bo que ides querer patentalo para que a casa cheire sempre así ;)

Se queredes que queden un pouco máis consistentes podedes engadirlle á masa unha xema de ovo, e tamén noces ou avelás picadas. Como teñen tanta "materia graxa", aguantan ben nun tupper ben pechado durante un mes. Sen dúbida, un acompañamento ideal para os almorzos e merendas do inverno!

Ingredientes:

250 gr. de fariña

200 gr. de manteiga, tépeda 

100 de améndoas moídas

80 gr. de azucre

Un belisco de sal

Para a decoración

3 culleres de azucre glass

3 culleres de azucre avainillado

 

  1. Nun bol mesturamos todos os ingredientes da primeira sección, e batémolos ata formaren unha pasta homoxénea.
  2. Estendemos un film transparente no mesado, que teña polo menos 40 cm de longo. Colocamos a masa no medio, envolvemos e dámoslle forma de cilindro duns 4 cm de diámetro (dándolle voltas), ten que quedar coma na foto: vanillekipfeln_1
  3. Deixamos arrefriar o cilindro na neveira uns 30 minutos.
  4. Mentres, poñemos o azucre glass e o avainillado nunca cunca grande e mesturámolos cunha culler.
  5. Prequentamos o forno a 170º
  6. Retiramos o film e cortamos cun coitelo fino rodas de entre 1 e 2 cm. de largo (grosor) e despois dividímolas en dúas metades.
  7. Poñemos papel de forno nunha bandexa e colocamos as metades, torcéndoas un chisco polo medio para que parezan medias lúas.
  8. Cocemos no forno durante uns 20 min., cando comecen a dourar estarán listas.
  9. Deixamos arrefriar a bandexa 3 minutos e rebozámolos na cunca do azucre. É importante facelo rápido porque se non collerán o azucre. Se quedamos sen mestura, facemos máis rapidamente, se sobra, podémola gardar para a seguinte quenda!

Que aproveite!

vanillekipfeln_4 vanillekipfeln_5


Pasteliños de noces e dátiles

Volvemos cos doces, pero desta vez a inspiración vén de Grecia e Turquía, nunha especie de baklava "feito na casa". En realidade o baklava leva bastante máis traballo e sae un chisco distinto a esta receita, pero penso que ben vale como introducción ao mundo de doces con froitos secos.

Como saen uns doces bastante contudentes, recoméndovos tomalos ao almorzo ou á merenda cun té, xa que de sobremesa poden ser demasiado :D

Ingredientes (para 6- 8 unidades)

1 paquete de masa fresca de follado

50 gr. de azucre

50 gr. de noces moídas

50 gr. de dátiles sen óso ou de uvas pasas

50 gr. de pan relado

50 ml. de ron dourado

1 culleriña rasa de canela en po

A pel relada de medio limón

Azucre glass para decorar

  1. Deixar os dátiles ou as pasas en remollo durante media hora. Escorrer.
  2. Prequentar o forno a 150º, só pola parte superior.
  3. Nun bol, triturar tódolos ingredientes ata que quede unha masa suave e un chisco pegañenta.prep1
  4. Cortar a masa en rectángulos de 12 x 5 centímetros, aproximadamente. Colocar unha porción do recheo ao longo deixando un centímetro por cada lado, enroscar, formar un aro e apretar a masa para que peche ben.
  5. Colocar na bandexa do forno (usando o papel que trae a masa do follado) e cocer durante 20-25 minutos, ou ate que douren por riba.
  6. Esparexer o azucre galss por riba e deixar enfriar.

Bo proveito!

pseudo-baklava4


Palmeiriñas

Palmeiriñas

Algúns diredes: Para que vou facer palmeiras na casa se xa as venden na pastelería? Pois porque están moito máis boas, quedan lixeiras e crocantes. E como arrecende a cociña despois... Mhhhhh

Esta é unha das receitas máis doadas que se publicaron no blog, en serio volo digo: non hai escusas para non probala! Só vale se non tendes forno, nese caso recoméndovos este artigo :D

Ingredientes (para 15-18 palmeiriñas):

1 paquete de follado

3 culleres de marmelada de albaricoque

3 culleres de azucre de caña

Un feixe de améndoas laminadas (ao gusto de cada un)

2 culleres de leite enteiro

Utensilios:

Papel de forno

  1. Prequentamos o forno a 180º
  2. Sacamos o follado da neveira e deixamolo 5 minutos fóra.
  3. Estendémolo (se ten forma redonda, estiramos un chisco as beiras cunha botella chea, para que quede máis cadrado).
  4. Estendemos a marmelada uniformemente, sen que chege as beiras. Esparexemos o azucre e as améndoas.palmeiras_prep1
  5. Comezamos a enroscar por un lado. Paramos ao chegar ao centro. Enroscamos o outro lado ata que queden os dous "rulos" pegados. palmeiras_prep2
  6. Dámoslle a volta e pintamos co leite (para que douren mellor no forno).
  7. Cun coitelo facemos anacos dun centímetro de grosor, aproximadamente, Colocamolos na bandexa co papel facendo forma de "V". Podemos engadir máis azucre e améndoas neste paso.palmeiras_prep3
  8. Cocemos durante 10 minutos ou ata que estean ben dourados. Deixamos arrefriar e entón separámolas do papel.

Que aproveite!

palmeiras2