Guacamole!

Algúns alimentos preparados e envasados están bastante ben (a salsa pesto…) pero hai outros que non teñen xeito ningún. O guacamole de bote NUNCA está bo, e co doada que é a receita, paga a pena a facelo un mesmo.

Hai mil millóns de receitas de guacamole, e non sei se esta será moi ortodoxa, pero é a que ten ingredientes que máis facilmente se atopan. Se queredes levar un entrante para unha cea ou un picnic, triunfades seguro.

Ingredientes (para un bol mediano, pican tres ou catro persoas):

2 aguacates maduros – a punta ten que estar un pouco fofa.

1 tomate pequeno, maduro

Media cebola

Un chisco de coandro

Unha culleriña de mel

Zume de medio limón

Sal

6 – 8 pingas de salsa tabasco

  1. Abrir os aguacates pola metade, retirar a semente e quitar a polpa cunha culler. Trocear e botar no bol.
  2. Picar os tomates en dadiños e a cebola moi fina. Botar ao bol xunto co coandro, o mel, o zume, o tabasco e un chisco do sal.
  3. Bater ca batidora ata que quede uniforme pero con algúns cachiños. Se vos gusta con anacos gordos, en vez de usar a batidora podedes esmagar todo cun garfo.
  4. Se queda moi acedo, podedes botarlle máis mel ou un pouquiño de azucre. Ás veces hai que correxir a cantidade de sal tamén.
  5. No caso de que non o consumades inmediatamente, metede a semente no medio do guacamole, medio fundida, e tapade con film de plástico (tocando a superficie do guacamole). Así evitaredes que oxide e saque unha cor marrón bastante desagradable.

Que aproveite!


Comments

  1. Oes, discrepo co da salsa pesto. A que se vende é bastante terrible, moi, moi aceitosa, con aceite malo. A do Giovanni Rana, está minimamente Ok (está feita con aceite de oliva e pesto xenovés DOC), pero nen sequeira é o mesmo. Feita fresca é completamente diferente. Pero bueno, é só unha opinión persoal.

  2. Ola Xosé! Estou dacordo que o pesto fresco é moito mellor, o que pasa unha vez tenteino facer na casa e sai tal desfeita que dende entón só como de bote ou nalgún restaurante.

    Dos que probei envasados o que máis me gusta é o de Barilla, pero aínda non probei o de Giovanni Rana, vouno apuntar!

  3. Pois non sei, eu non vin moi complicado o do pesto. Se tes un triturador ou unha batidora con cuchillas, pois non ten moita historia. (O máior tema é o do caro que está a albahaca).

    Eu fixeno ó estilo tradicional (co mortero e con moita paciencia) e é un pouco máis coñazo (é moi cansado, notase que é un plato de antiguo, cando alguén podía estar horas cansando o brazo), pero tamén quedou bastante ben.

    Bueno, o que quería comentar é que as salsas pesto que teño vistas envasadas son moi aceitosas, algo así coma aceite con cousas dentro. O pesto que eu tiña tomado en Genoa era algo oposto, albahaca (moi verde) con algo de aceite (e o allo, e os froitos secos e tal). Non sei coma explicalo, pero moi moi fresco, moi verde.

    En canto a restaurantes… iso xa vai ser outro choio. Non hai moitos restaurantes italianos que me chisten en Galicia… E os que me chistan non lles vin pesto na carta.

    Mil gracias pola túa receta de guacamole. Coma ti mesmo dis, o Guacamole é moi sinxelo de preparar é non ten comparación o feito na casa co mercado. Nengunha!! E se pode ser de aguacates da casa, mellor ainda.

  4. Os mexicanos non aprecian moito o guacamole de batidora, considerano unha aberración. Eles din que para que o guacamole esté bó, hai que facelo a man (se tes un morteiro, con algo do estilo). Se vos queda moi grumoso e con cachos de cebola e tomate, non vos preocupades, así é coma din que ten que ser.

Deixa unha resposta

Your email address will not be published / Required fields are marked *