Scones salgados con queixo e mostaza

Nun principio esta receita ía ser doce, pero como ultimamente xa probamos madalenas e cous-cous doce decidinme por unha versión salgada, ideal para tomar de merenda con pavo ou xamón, ou para acompañar unhas cervexas. Ou as dúas cousas á vez!

Os scones son unha receita orixinaria de Escocia e son moi típicos no Reino Unido como parte do high tea: a merenda cea. Sérvense abertos pola metade e recheos de manteiga e marmelada. Estes son unha adaptación desta receita de Jamie Oliver.

Ingredientes (para 7 ou 8 pezas)

250 gr. de fariña

75 gr. de manteiga fría

1 ovo

2 culleres de leite + 2 para "barnizar"

3 fatias de queixo

1 culleriña ben chea de mostaza en gran

1/4 de culleriña de comiño - opcional

1/2 culleriña de sal

  1. Prequentamos o forno a 220º
  2. Cortamos a manteiga en dadiños. Nun bol botamos a fariña e a manteiga e amasamos cas mans ata que semelle pan relado. Non cómpre amasar moito tempo, a manteiga non ten que derretir por completo. Facemos un oco no medio.
  3. Nun prato fondo batemos o ovo co sal, a mostaza e o comiño.
  4. Botamos o líquido no oco do paso 1 e remexemos cas mans de novo ata formaren unha masa homoxénea que se despegue facilmente das paredes do bol.prep1
  5. Botamos un chisco de fariña nun mesado, colocamos a bola de masa e esmagámola para que quede con grosor uniforme de 2- 2,5 cm.
  6. Preparamos unha bandexa con papel de forno.
  7. Ca axuda dun vaso sacamos círculos de masa e colocámolos na bandexa ca parte lisa cara arriba.prep2
  8. Botamos dúas culleres de leite no vaso, e cun pincel (ou cos dedos) barnizamos a parte superior dos scones.prep3
  9. Cocemos no forno durante 10 minutos, ou ata que estean dourados por riba. Se queredes que queden máis crocantes, deixadeos repousar sen nada, se vos gustan máis tenros, tapádeos cun trapo de algodón nada máis sacar do forno.

Que aproveite!

 


Quiche vexetal con anacardios

Aínda que non son vexetariana (raro sería tendo un blogue que se chamase así) ultimamente ando a experimentar con pratos sen carne. Esta quiche é moi gustosa e sinxela de facer, sobre todo porque fixen trampa e comprei o follado xa feito, igual que na receita de palmeiriñas. En total levará pouco máis dunha hora.

Penso que é unha boa idea para facer logo do Entroido se quedades cansados do cocido. Ollo, que aínda que non leva carne si leva nata, polo que é bastante farturenta ;)

Ingredientes (4-5 porcións)

1 paquete de follado redondo

8 follas grandes de acelgas

4 cenouras

3 anacos de coliflor

Un feixe de anacardios (60 gr. aproximadamente)

150 ml. de nata para cociñar (a de 18% de materia graxa)

1 ovo grande

1/4 de culleriña de noz moscada

Sal

  1. Enchemos unha pota de auga, quentámola e botamos a coliflor a cocer. Cando leve 10 minutos, engadimos as acelgas limpas e sen talo e as cenouras cortadas en cachos pequenos.
  2. Escoamos as verduras e reservamos.
  3. Prequentamos o forno a 180º
  4. Nunha tixola botamos a nata e quentámola a lume medio xunto ca noz moscada.prep1
  5. Cortamos os anacardos en anacos pequenos
  6. Botamos as verduras e mailos anacardios na tixola, deixamolo estar a lume medio durante 10 minutos. prep4
  7. Batemos o ovo e botámolo na mestura.
  8. Estendemos o follado nun molde redondo. Para que non soba no forno, pinchámolo varias veces cun garfo:prep2
  9. Enchemos o follado co contido da tixola.
  10. Cocemos no forno durante 25 minutos, ou ata que estea ben dourado nas beiras e o recheo algo seco (callado). Depende moito do forno, tende conta disto.

Nota: Recomendo comelo no mesmo día, xa que o follado colle a humidade do recheo e ao día seguinte non está crocante.

Que aproveite!

quiche_vexetal3


Prasopita - Torta de porros e cebola

Andaba eu procurando unha receita para usar un feixe de porros que esmorecía no frigorífico e din con esta torta salgada orixinaria do noroeste de Grecia, moi doada de facer. Hai versións de pataca (Patatopita) ou de espinacas (Spanakopita), e adoita levar unha base-cobertura de filo: un tipo de follado, igual que o que se usa nos doces chamados baklavas. Eu non fixen porque quería algo rapidiño, se queredes ver como se fai (leva moito traballo) podedes consultar este fantástico video con música de Daft Punk.

É un pastel, que se pode comer quente ou do tempo, e está máis rico ao día seguinte. Velaiquí a receita:

Ingredientes (para 6 persoas):

8 culleres de aceite de oliva

3 ou 4 porros grandóns

Unha cebola mediana, ben picada

3 ovos

350 ml de leite (un vaso e medio)

250 gramos de queixo feta (atopable no LIDL)

200 gramos de fariña

Unha culler de aneto

Unha culleriña de ourego

Sal e pementa ao gusto

 

  1. Prequentar o forno a 180º
  2. Cortar os porros moi finiños e usar a parte branca, deixando a parte verde para facer un caldo, se queredes.
  3. Botar 6 culleres de aceite de oliva na tixola, quentar e botar o porro picado e a cebola ata que douren e estean tenros.
  4. Bater os ovos nun bol grande, engadir o queixo cortado en dadiños, a fariña, as especias e o porro ca cebola. Bater ben.
  5. Untar un molde co aceite de oliva (dúas culleres) e esparexer cun pano de mesa de papel. Verter a masa e cociñar no forno durante 45-60 minutos, dependendo do molde que esteades a usar.
  6. Deixar enfriar, estará máis bo ao día seguinte!
prasopita3
Preme na imaxe para vela máis grande

 

Que aproveite ;)

 


Pan de centeo con tomates secos e cebola fritida

Este foi un experimento que fixen ó chou, e saiu bastante ben. Non fai falla panificadora nen instrumentos especiais, só un pouco de paciencia, xa que en total leva catro horas: pódense facer cousas polo medio, pero hai que andar pendente da fermentación. Aínda así penso que paga a pena, xa que dá moito gusto velo no forno, e a partires desta receita sácanse moitas variacións: con noces, olivas, pipas...

Como podedes imaxinar, é un pan se se come só, tamén queda ben torrado e con aceite de oliva, ou para facer un bocadillo de queixo a media tarde.

Ingredientes (para dúas bolas medianas):

350 gramos de fariña de trigo, de forza - vendena no súper ou nas panaderías

150 gramos de fariña de centeo - máis non se lle pode botar porque non sobe

1 cebola morada

6 ou 7 tomates secos, de bolsa

25 gr. de fermento fresco - da sección refrixerados do súper

1 culler de sal

4 culleres de aceite de oliva

  1. Media hora antes de comezar, poñer os tomates nun vaso con auga, para que hidraten.
  2. Meter o fermento nun bol con 350 ml. de auga morna, ata que disolva.
  3. Nun bol, mesturar a fariña de trigo ca de centeo e o sal, botar a auga co fermento e remexer ben. Deixar reposar cun pano por riba.
  4. Cortar a cebola en láminas moi finas, e despois en anacos pequerrechos.
  5. Quentar unha tixola, botar dúas culleres de aceite. Cando quente, botar a cebola e baixar o lume a metade. Remexer de cando e cando as cebolas ata que minguen e estean un pouco marrons e brandas. Apagar o lume.
  6. Cortar os tomates en cadrados pequenos, e botalos á masa xunto cas cebolas fritidas. Remexer ben.
  7. Botar dúas culleres de aceite nunha pota, estender, e verter a masa na pota. Tapar e deixar reposar na calor que aínda quede de cociñar a cebola.
  8. Despois dunha hora a masa crece ata dúas ou tres veces o seu tamaño orixinal. Enfariñar unha superficie lisa, verter a masa fermentada e amasar ata que non se pegue. Facer dúas bolas, tapalas cun pano e deixar reposar durante unha hora máis.
  9. Prequentar o forno a 220º, enfariñar a bandexa e meter as bolas de pan a cocer. Para que lle quede unha codia máis dura, coller un chisco de auga e estendela pola masa ca man antes de metela no forno.
  10. Despois de media hora, o pan debería estar feito. Para comprobalo, ao sacalo golpeamos a base co puño. Se soa oco, é que xa está cocido.
pan de cebola
Preme na imaxe para vela máis grande

 

Que aproveite!


Farl, pan de pataca

Esta é unha receita típica do norte de Irlanda, aínda que o seu nome vén da palabra escocesa fardel, que quede dicir catro partes. Non é una receita moi apta para o verán, pero como seica este ano non hai, chega o tempo para probar.

Ingredientes (para catro persoas)

4 patacas medianas
100 gramos de fariña + un chisco para botar na tixola
50 gramos de manteiga morna
Un pouco de sal

  1. Pelar e cortar as patacas pola metade. Botar a cocer nunha pota con ben de auga ata que se poidan pinchar comodamente cun garfo. Despois de escorregalas, deixalas un pouco máis ao lume para que queden ben secas, tipo cachelo.
  2. Colocar as patacas nun bol e esmargar cun garfo ata facer unha pasta. Engadir a fariña tamizando cun colador, a manteiga e o sal. Seguir esmagando.
  3. Botar fariña nunha superficie lisa e verter o contido do bol, amasar ata que quede un pouco pegañento. Cunha botella enfariñada, estender a masa formando un círculo de aproximadamente 22 centímetros de diámetro e un centímetro de grosor.
  4. Usando un coitelo enfariñado, dividir en catro partes iguais. Quentar unha tixola e botar un chisco de fariña, repartindoo ben pola superficie. Pasar os cachos de farl cinco minutos por cada lado, ata que estean un pouquiño marrons e algo duriños por fóra. Engadirlles un pouco de sal por riba.

En Irlanda tómanas con touciño, ovos e/ou con black pudding (salchichas de sangue). Eu cominas con xamón serrano e estaban ben boas, tamén podedes probar con queixo brie ou roquefort, e plan lixeiro, cunha ensalada de tomate adobado con aceite de oliva. Non as deixedes enfriar, que entón non valen nada... se tendes que agardar por algo, tapádeas cun pano.

Que aproveite!