Queique de plátano con chocolate e noces

Un queique MOI calórico pero que está delicioso, e ademáis, aguanta ben unha semana se o gardades nun sitio fresco e seco (no frigorífico non, que colle humidade!)

Ingredientes:
150 gr de fariña
30 gramos de cacao
2 culleriñas de levadura química
½ culleriña de bicarbonato (se non tendes, botade un chisco máis de levadura)
½ culleriña de sal
125 gr de manteiga (derretida)
150 gr de azucre
2 ovos grandóns
4 plátanos pequenos (moi maduros)
60 gr de noces esmagadas
100 de chocolate negro en anaquiños
1 culleriña de extracto de vainilla

  1.  Prequentar o forno a 170º
  2. Nun bol mediano, botar a fariña, a levadura, o bicarbonato e o sal e remexer (cas mans ou cunha culler de pau).
  3. Nun bol grande, botar a manteiga derretida e azucre, bater ata que estean ben mesturados. Engadir os ovos, un de cada vez, mentres se bate. Esmagar os plátanos cun garfo e botar a pasta no bol.
  4. Engadir o chocolate, as noces e o extracto de vainilla, seguir batendo. Botar a mestura do bol mediano, un tercio de vez, remexendo ben.
  5. Verter a masa nun molde untado con chisco de manteiga morna ou aceite de xirasol. Mellor se o molde é cadrado, para poder facer rebanadas despois, as medidas aproximadas serían 23 x 13 x 7cm. Podédes facer tamén queiques individuais en boles de cerámica de fondo redondeado. Cocer no forno a 180º durante  30 minutos. Para saber se  está listo, meter un coitelo, e se sae case limpo é que xa está.

Nota 1: Este queique vai moi ben para aproveitar eses plátanos ennegrecidos que ás veces quedan no froiteiro. Como xa vos comentara na receita de batido de amorodos, pódense conxelar perfectamente: un truco para que a polpa non perda cor é aderezala con zume de limón antes de conxelar.

Nota 2: Se tendes tazas de café grandes con fondo redondo, e un chisco de paciencia, podédelas usar de moldes e facer tartiñas individuais, ou aproveitar a masa que non caibe no molde, coma na foto.

Redondiño e esponxoso
Redondiño e esponxoso

Que aproveite!


Torta de cereixas Twin Peaks

Os que listes o artigo de facer café na casa xa sabedes que son fan de Twin Peaks, así que desta vez tocaba facer a receita de torta de cereixas do Double R, que tanta gula me daba ao vela na serie.

Aproveitade agora que as cereixas están on fire, que con conservas non quedará tan rica. Hei de dicir que fixen trampas e desta vez usei masa xa feita (masa brisa, de 32 cm. de diámetro, na sección de refrixerados), porque non está o tempo como para andaren amasando manteiga na cociña. De tódolos xeitos, déixovos a receita da masa por se queredes facer todo caseiro.

Ingredientes (para un molde de 18 centímetros, catro ou seis persoas)

500 gr de cereixas picotas

Zume de medio limón

1 culler ben chea de Maizena

1 rama de vainilla

50 gr. de azucre glass

Un chisco de azucre para decorar

Para a masa:

75 gr. de manteiga

125 gr. de fariña

15 gr (unha culleriña) de azucre glass

1 ovo

Media culler de auga

twinpeaks4

  1. Para facer a masa, botar a fariña, a manteiga e o azucre nun bol, remexer cos dedos ata que se fagan boliñas (non unha pasta uniforme). Engadir o ovo e a auga e seguir remexendo, sen amasar. Tapar cun film de plástico e gardar no frigorífico polo menos 30 minutos.
  2. Esto é o que máis amola: quitarlle o rabo e o óso ás cereixas. Para facer esto último sen rompelas, hai que ter un pau fino e empurrar con el no cú da cereixa ata que o óso saia polo oco do rabiño. Podedes ver unha foto do proceso nesta ligazón.
  3. Botar as cereixas nunha pota co zume do limón e a rama de vainilla. Ir remexendo pouco a pouco para que solten o zume.
  4. Cando a compota estea branda - aproximadamente despois de cocer 30 min- engadir a Maizena pouco a pouco, coa axuda dun coador para que non queden grumos.
  5. Untar un molde cun par de pingas de aceite de xirasol ou manteiga. Estender a masa nel e recortar o que sobre polos bordes.
  6. Botar a compota, lembrade que hai que retirar a rama de vainilla.
  7. Estender a masa nun círculo e tapar a compota.  Se sobra masa dos lados, dobrar cara adentro. Botar o azucre por riba para decorar.
  8. Cocer no forno a 180º aprox durante 30 min ou ata que os bordes queden marrón claro. Se a masa non está ben selada nos bordes, cando a compota de cereixa ferva sai polos bordes. A min pasoume, como podedes ver nas fotos.

Notas varias:

  • Deixar repousar unha noite, saberá mellor ao día seguinte!
  • Podedes sustituir a Maizena por fariña de améndoas. Quedará un gusto distinto, pero igualmente bó.
  • Se queredes consultar a receita orixinal, podedes facelo aquí (en inglés).
  • Igual que a torta de améndoas e cacao, esta casa ben con xeado de vainilla ou nata montada.


Torta de améndoas, cacao e aceite de oliva

Esta é unha receta de pastel de chocolate con aceite de oliva que lin neste blog inglés, onde pode un perderse entre bombas calóricas durante horas. Gustoume porque leva fariña de améndoas (é semellante á de Santiago),  pero tamén chocolate, que eu boto a faltar moito nos postres de sempre. É apta para celíacos.

 

Un consello, se nos vos importa engordar un chisco máis, é tomala aínda quente cunha bola de xeado de vainilla ou con nata montada.

 

Ingredientes (para 8-12 porcións):

150 ml. de aceite de oliva, máis un pouquiño para darlle ao molde.

50 gr. de cacao en pó. (Non vale Cola-cao, eu usei este)

125 ml. de auga fervendo.

2 culleradas de extracto de vainilla.

150 gr. de améndoas moídas.

Media culleriña de bicarbonato.

200 gramos de azucre (se é glas mellor)

3 ovos grandóns.

Un chisco de sal

 

  1. Prequentar o forno a 170º, untar o molde con aceite de oliva, tendo coidado de que as esquinas queden ben cubertas.
  2. Tamizar (cun colador) o cacao nun prato fondo, engadir a agua quente a modiño e remover ata que quede unha pasta cremosa. Botar o extracto de vainilla, remover de novo e deixar enfriar.
  3. Nun bol, mesturar a fariña de améndoas co bicarbonato e o sal.
  4. Noutro bol, bater o azucre, o aceite de oliva e máis os ovos ata que quede unha masa aireada e uniforme. Na receita orixinal puña que había que facelo con batidora de varas, pero eu non teño e fíxena ca normal.
  5. Verter a masa de cacao e seguir batendo, cando estea mesturada engadir pouco a pouco o contido do punto 3.
  6. Botar a masa no molde e cocer durante 40 ou 45 minutos, ou ata que os bordes estean secos e o centro un pouco húmido. Se o pinchades cun coitelo, debería sair bastante limpo, pero con pequenas migas esfareladas.
  7. Deixa enfriar no molde durante 10 minutos e antes de desmoldala pasar un coitelo ou espátula polo borde, para que saia máis facilmente. Pódese decorar botando un pouco de azucre glas cun colador no centro da torta.

amendoas3

Vai moi ben para merendar cun café, lembrade consultar os cinco trucos para facer café na casa.