Cinco alimentos que fai avío conxelar

Despois dos consellos para cocer a pasta, os de como facer o bechamel, e o que se pode facer cun limón...chegan uns consellos para conxelar comida! O conxelador é un electrodoméstico un pouco infravalorado (polo menos nas zonas urbanas, penso eu) pero cun pouco de xeito podeselle sacar partido para conservar máis cousas que carne ou peixe. Tende en conta que o que sae do conxelador nunca vai estar mellor que cando entrou, así que planificade un pouco e metede sempre cousas frescas e/ou en bo estado. O reseso é mellor tiralo ;)

  1. Froita: o sabor da froita non cambia, pero a textura si, así que o mellor é pelala, quitarlle as pébedas e gardala cortada, para facer batidos ou sobremesas con ela. Os froitos vermellos son especialmente agradecidos para conxelar, así que aproveitade o verán para teramoras, framboesas e arandos durante todo o ano!
  2. Verduras: Pasa o mesmo que ca froita, o mellor é gardalas lavadas e cortadas, ou xa cociñadas. Non se deben conxelar verduras que se han consumir crúas, como a leituga ou cenouras, xa que a súa textura non terá nada que ver ca crúa.
  3. Herbas aromáticas: un truco súper doado e práctico é facer unha mestura cas herbas que queiramos conservar e aceite de oliva. Batemos todo ata ter unha especie de "pesto" e gardámolo na bandexa dos cubiños. Así teremos porcións de herbas pequenas para irlle botando aos guisos!
  4. Nata batida: ha de estar batida antes de conxelar, do contrario arriscámonos a que se corte durante o desconxelado. Se sobra de facer unha sobremesa, gardade chisco para guarnición de larpeiradas futuras. PD: a manteiga tamén se pode conxelar para usar logo.
  5. Pan: sempre é boa idea conxelar nas porcións que se van utilizar logo. No caso do pan, a mellor idea e gardar as rebandas separadas por un film transparente e ilas desconxelando na torradeira ou sanduicheira. O pan de molde non aguanta moi ben por mor da textura, así que mellor é pedir unha bola e que vola corten na panadería.

Que cousas máis conxelades? Contádeo nos comentarios!


Cinco cousas que se poden facer ca nébeda

Esta herba tan esquecida foi nun tempo un condimento moi utilizado nas Rías Baixas. O seu nome científico é calamina nepeta. É moi doada de atopar, medra a carón dos muros, en eiras abandoadas, etc. É común en case todas as zonas húmidas galegas.

ACLARACIÓN: é común a confusión entre a herba gateira (nepeta cataria), que é coñecida sobre todo polo efecto que tén nos gatos: ao comer as follas e flores (cousa que moitos fan devecidos) volvense máis agarimosos e se toman moita comezan a tolear, dando voltas e cazando ratos que non existen.

A nébeda ten un sabor e aroma semellante á menta, mesturado cun pouco de anís. Velaiquí tendes cinco propostas, pero non teñades medo a experimentar, que nas persoas non ten efectos secundarios!

  1. Usala co fiúncho para cocer e aromatizar as castañas.
  2. Facer bolos de pote (petotes) para o cocido, coma nesta receita de La cocina de mi abuelo.
  3. Aromatizar o peixe ao forno ou a carne (engadila aos guisos ou na carne da hamburguesa).
  4. Metela las masas doces e salgadas. Filloas, pan, galletas ou biscoitos poden beneficiarse do aroma desta pranta.
  5. Facer infusións ou aromatizar augardente.

Coñecedes algún uso máis? Tendes nébeda na casa? Seguro que non tendes que ir lonxe para atopala.

PD: Investigando para o artigo din con este completo artigo de Jorge Guitián no seu blog. Se queredes saber máis, non dubidedes en pasarvos por alí ;)

nebeda_2


Loxe mareiro: unha crónica

Volvemos das vacacións de verán cun artigo un chisco diferente: unha crítica a un restaurante. De cando vez irei poñendo recensións de sitios que me teñan gustado, comezando polo extraordinario Loxe Mareiro, o restaurante do grupo Abastos en Carril, a carón de Vilagarcía de Arousa.

O motivo de comezar con este restaurante, aparte de que a comida estaba boísima,  é que me pareceu un proxecto moi completo, dende a arquitectura (é un almacén de pescadores rehabilitado, velaí o nome), a decoración (sinxela pero moi efectiva), a reivindicación do produtos do mar e a experimentación nos sabores e texturas.

Este restaurante está no paseo marítimo de Carril, e ten tres partes: a terraza, o interior con vistas ao paseo e o salón que está detrás da cociña. Unha das cousas que me chamou a atención é que esta está aberta e ao pasar pódese ver a preparación do xantar (os caldos, a grella, os "empratados"), un proceso que me gustaría ter visto con máis calma, pero non quería quedar aí no medio do corredor...

Ao mediodía hai varias opcións para xantar: o día que fun eu había un menú de 35 euros con peixe fresco, un menú un pouco máis longo por 45 euros e tamén pratos á carta. Os prezos son sen bebida, e paga a pena salientar que hai unha boa carta de viños, con moitas referencias do país. Ata onde sei, o menú de noite é diferente, así que é mellor chamar antes para se asegurar.

Eu probei o menú degustación máis longo, que ten algúns pratos clásicos do menú Abastos e algúnhas elaboracións novas que imaxino son probas para logo ir incorporando á carta. Velaiquí vai unha descrición dos pratos que máis me gustaron:

tiradito

Tiradito de San Martiño: os tiraditos son un prato típico de Perú, algo semellantes ao carpaccio. peixe fresco cortado moi fino con mollo de cítricos e neste caso, acompañado de tiriñas cenoura asada. A combinación da frescura do peixe e a textura e o leve sabor a queimado é abraiante.

espuma

Escuma de auga de mar con algas e maonesa de ourizo de mar. É coma unha nube de golosina, pero moi lene, que se desfai na boca. É difícil describir o sabor, pero non é como auga de mar literal, está moito máis bo.

sarinha

Sardiña e a súa espiña: un lombo de sardiña un pouco mariñado, acompañado de mollo de aceite aromatizado con herbas e xeado de pan. A espiña da sardiña está aromatizada, fritida (está ben crocante) e leva un boliño de masa na cabeza. Unha elaboración súper orixinal que daba gusto mirar, e comer, claro.

empanada

Empanada de salmonete: penso que este foi o meu favorito. É unha versión particular da empanada, comezando pola masa, que leva trigo mouro. Despois úntase cun caldo concentrado de peixe e métese ao forno, repetindo a operación. Por riba leva o salmonete co seu mollo, e non leva tapa. ESPECTACULAR.

xurel

Xurelo cociñado en dous tempos: Un lombo de xurelo sen pel que se coce a lume moi lento durante varias horas e despois pásaselle o soprete para que colla unha textura crocante. Vai acompañado de gominoliñas de vermú e laranxa (as tiras brancas non lembro o que eran, quedaron eclipsadas), e está delicioso!

chocolate

Sobremesa de chocolate Loxe Mareiro: un festival para os máis larpeiros, este prato leva chocolate en diferentes texturas: xeado, en sifón, nunha especie de mousse e en faragullas crocantes. Como a imaxe vale máis que mil palabras, non engado máis ;)

Gustaríame destacar tamén o atento que é o servizo, e tamén pan, que é unha tolemia do bo que está. Dixéronnos que leva centeo e auga de mar, e é o mesmo que logo se utiliza para facer o xeado. Chega á mesa un pouco quentiño, é adictivo.

menu

Ata aquí a miña primeira crítica, ¿qué vos pareceu? Deixade a vosa opinión ou recomendacións nos comentarios, ou no Twitter.


Cinco trucos para aforrar cartos na cociña

Esta semana temos un artigo un pouco distinto, pero que de seguro vos ha interesar: uns consellos para aforrar cartos (e enerxía) na nosa cociña. Se sabedes dalgún máis, por favor deixádeo nos comentarios ;)

  1. Merca produtos a granel e frescos de tempada: as tendas a granel adoitan ser máis baratas, e permiten comprar a cantidade axeitada para o que queiramos. O máis normla é mercar legumes, pero non vos esquezades da fariña e das especias. O tema da tempada é algo moi lóxico: ademáis de ser máis baratos, os frescos estarán no seu punto axeitado e terán máis sabor. para ver que froitas e verduras e as súas tempadas, podedes consultar este completo gráfico.
  2. Vixía a túa neveira: hai que evitar que estea preto de fontes de calor (luz solar, lavalouza, lavadora), limpala por detrás para que o lixo non obstrúa os condutos, e revisar que as xuntas de silicona estean en bo estado para que non escape o frío. Cobre todo os líquidos e agarda a que os pratos cociñados arrefrien completamente antes de metelos, para non traballe de máis. Lembra que a súa temperatura óptima é de 6-7º, e a do conxelador, -18º.
  3. Revisa a despensa: sempre hai cousas que quedan no fondo das baldas e nunca máis te lembras delas. As conservas e tetrabriks adoitan estar bos ben pasada a súa data de caducidade: comproba se a súa textura, cor e cheiro son os habituais. Se hai dúbida, entón mellor tiralos, pero dálles unha oportunidade.
  4. Compra moita carne e conxélaa en porcións: moitos supermercados e carnicerías teñen ofertas se levas un ou dous quilos, así que é boa idea compralos e ao chegar a casa, cortar anacos segundo o que pensemos cociñar e conxelalos. Lembrade que é mellor desconxelar no frigorífico ou no mesado que no microondas, e que a carne desconxelada non debería ser conxelada outra vez, xa que hai risco de que colla demasiadas bacterias no proceso.
  5. Aproveita todos os restos que poidas: o mellor para aforrar é cociñar segundo os ingredientes e non segundo receitas moi concretas. Se tomaches un polo asado, podes usar os ósos para facer un saboroso caldo de polo, ou eses tomates que xa non valen para facer ensalada ben poden valer para un mollo caseiro. Botalle imaxinación!

PD: non tiña ningunha foto propia, así que usei ista dunha radio canadiense.


Que tomar para aliviar a resaca

Fuches polo vento e volvihes polo aire? Chegan as festas, e con elas as paparotas polo día e pola noite, o saír pola noite...e beber demáis. Aínda que a xente lévaa experimentando milleiros de anos, aínda non ten cura exacta (igual cas maniotas!) pero si se pode paliar bastante seguindo estes consellos:

Antes de beber

O truco de toda a vida de comer moito funciona, e se leva graxa, aínda mellor. A graxa formará unha película nas paredes do estómago e fará que o corpo absorba o alcol máis lentamente.

Ao beberen

Tomar auga de cando en vez vai ben para ir hidratando o corpo, xa que o alcol é diurético (o de ir mexar tantas veces é por iso) e cando no corpo non atope auga de por si, vaina coller dos miolos, entre outros órganos. Iso é o que fai que teñamos unha horrible dor de cabeza ao día seguinte. E moita sede, así que lembrade beber auga.

Ao día seguinte

O importante é hidratar o corpo e darlle pouco traballo ao estómago, que xa estará ardoroso da noite anterior. Velaiquí tendes unha selección de comidas e bebidas axeitadas para tan delicado día:

  • Auga ou bebidas isotónicas, polo mesmo que o punto 2: eses miolos precisan hidratación.
  • Pan ou torradas: fácil de dixerir, proporciona carbohidratos que lle dan enerxía ao corpo.
  • Ovos: o mesmo  que o pan, pero con proteínas, se o tomades xunto, mellor.
  • Un caldiño de polo con fideos.
  • Froita, pero que non sexa aceda.
  • Café: axuda a espertar e a quitar  dor de cabeza, pero tamén é diurético, así que mellor acompañalo con auga.
  • Aspirina ou ibuprofeno, logo de comer. O paracetamol mellor evitalo, como explican neste artigo (tamén sobre remedios á resaca) a boa xente das Mir e unha noites.

Outras cousas que axudan son ducharse con auga fría, sair tomar un pouco o ar e non comer picante, nen cousas con moita graxa.

Hangover_59f50b_2477497

E vós, tendes algún truco para a resaca? Se é así, partilladeo nos comentarios ou no Twitter.

Boas festas!

PD: a ilustración do post é de Patrick Leger, a do gato non ten autor coñecido.