Albóndegas de atún e piñóns con mollo de tomate

Despois dunha pausa por mor de non ter tempo para nada...estamos de volta! E con que receita, amig@s, unhas albóndegas que arrecenden e saben a gloria!

Este é un prato típico do Sur de Italia, pero non teño moita máis información, así que paso aos consellos: o atún pode ser conxelado en filetes deses, o que non pode ser é en conserva. E o queixo grana padano évos moi doado de atopar nos supermercados, é coma unha versión máis barata do parmesano que tamén o podedes usar, pero para mesturar con outras cousas non paga a pena pagar o prezo máis caro.

Se vos gustan as albóndegas, pasadevos por esta receita de carne e xamón, ou estas de carne mariñada. E as máis exitosas do blog: as de polo con ananás.

Ingredientes (para 4 racións, aproximadamente)

400 gr. de atún, fresco

100 gr. de pan relado

50 gr. de queixo "grana padano" relado

50 gr. de piñóns

2 ovos

4 ou 5 culleres de aceite de oliva virxe extra

Unha culleriña de ourego

Media culleriña de canela en po

O zume e a reladura dun limón

Un belisco de sal e outro de pementa negra

Aceite de xirasol para fritir

Para o mollo:

Unha cebola

2 dentes de allo

2 latas de tomates en conserva, en anaquiños

4 ou 5 culleres de aceite de oliva virxe extra

Unha culleriña de ourego

Unha culleriña de vinagre balsámico

Perixel (opcional)

  1. Primeiro preparamos o mollo quecendo o aceite nunha tixola grande e botando a cebola e o allo, cortados en rodas finas. Cociñamos a lume medio ata que a cebola estea semi-translúcida e branda.
  2. Engadimos o resto dos ingredientes do mollo e cocemos durante 15 minutos a lume medio, remexendo de cando en vez.
  3. Preparamos as albóndegas cortando o atún en dados pequenos, e fritíndoo co aceite nunha tixola ca canela e os piñóns.
  4. Engadimos o sal e a pementa e deixamolo estar 5 minutos.
  5. Botamos a mestura nun bol grandeiro e deixamos arrefriar.
  6. Botamos o pan, o ourego, o queixo relado, os ovos batidos, o zume e a reladura do limón dentro do bol.
  7. Esmagamos a mestura cun garfo e amasamos cas mans ata que se mesture todo ben.
  8. Facemos albóndegas do tamaño dunha noz grande, colocámolas nun prato para meter no frigorífico unha hora.
  9. Quecemos o aceite de xirasol na mesma tixola das albóndegas e fritímolas ata que estean douradas (ver foto inferior).
  10. Cando estean listas, imolas colocando nun prato forrado con papel de cociña para que absorba o exceso de aceite.
  11. Servimos co mollo e un pouco de perixel cortado: pódense comer con pan (recomendable para ir mollando) ou con pasta ou arroz branco.

Que aproveite!


Xeado de pexego con framboesa

Coñecedes o Peach Melba? é unha sobremesa bastante famosa nos países anglosaxóns, e consiste en pexegos cocidos nun xarope, acompañados dunha xelatina de framboesa todo sobre un xeado de vainilla. Débelle o nome á cantante de ópera Nellie Melba, a quen lle adicou o cociñeiro a súa creación.

A cousa é que eu non o coñecía e tampouco o probara, pero buscando receitas novas de xeado xurdiu unha que combinaba todo nun. Aproveitade para facelo, gardalo e lembrar nuns días as últimas calores do verán ;)

Ingredientes (para 600 ml de xeado)

2 pexegos, pelados, sen óso e cortados

200 ml de nata para bater (35% MG)

40 ml. de zume de pexego

40 ml. de leite enteiro (gordo)

60 gr. de azucre avainillado

Unha culler de zume de limón

Un belisco de sal

Para a pasta de framboesa

100 gr. de framboesas

Unha culler de ron

Dúas culleres de azucre de caña

  1. Nunha tixola, quecemos o zume de pexego, os anacos de pexego e o azucre a lume medio, ata que estean brandos.
  2. Deixamos arrefriar, lonxe do lume.
  3. Mentres, imos preparando a pasta de framboesa: nun bol mesturamos todo e esmágamolo cun garfo. Metemos no frigorífico
  4. Cando a mestura do punto 1 estea fría, botámola nun bol ca nata, o leite e o limón, pasamos a batedora ata que teña unha textura homoxénea e aveludada.
  5. Deixamos no frigrífico 1 hora, e despois metémolo 10 minutos no conxelador.
  6. Imos botando a mestura na xeadeira, seguindo as instruccions do fabricante.
  7. Estendemos nun recipiente de plástico, intercalando capas da pasta de framboesa. É recomendábel deixar repousar media hora no frigorífico antes de comelo.

Que aproveite!

xeado_pexego_2

xeado_pexego_1


Cebiche de lagostinos, manga e aguacate

Xa tiña ganas de facer un cebiche hai tempo, pero ata hoxe non o din feito, co sinxelo que é! Un prato moi xeitoso para o verán, cando non apetece acender a cociña, e é ademáis moi saboroso e lixeiro.

A receita orixinal é de Cocinando entre olivos, mais eu modifiqueina para facela máis doada e para menos racións! Podedes cambiar os lagostinos por gambas ou polbo, se vos gusta isto, lembrade ler esta receita de polbo mariñado!

Ingredientes (para 3 ou 4 racións)

400 gr. de lagostinos

1 aguacate pequeno

Zume dun limón grande ou 2 limas

Media manga

Media cebola morada

1 culleriña de mostaza

1 semente de caiena

Un chisco de sal e aceite de oliva

Coandro ou perixel, para decoraren

  1. Poñemos os lagostinos nun bol ca cebola pelada, lavada e cortada en anaquiños.
  2. Engaimos a pel relada do limón ou as limas, despois botámoslle o zume.
  3. Engadimos a mostaza, remexendo.
  4. Por último, engadimos o sal e a caiena e metémolo no frigorífico, deixándoo repousar uns 45 minutos.
  5. Cortamos a manga e o aguacate en dadiños e botámolo á mestura ao sacala do frigorífico. Decoramos con aceite de oliva e un pouco de coandro ou perixel.
  6. Servimos frío.

Probastes algunha vezo cebiche? Tendes algunha recomendación? Deixádea nos comentarios ;)

cebiche_lagostino_manga


Moqueca (estofado) de peixe

A moqueca é un guiso de peixe típico do Brasil. O seu peculiar nome vén da lingua tupi, é un derivado de de moquém, que significa algo así coma "secador". Na técnica tradicional dos indíxenas o costume era asar a carne ou peixe nunha folla para cocelos no seu propio zume. Coma todas as receitas tradicionais, ten moitas variantes, e dúas rexións teiman por ser a que serven a auténtica moqueca, neste caso o estado de Baía e o de Espírito Santo, no sur.

É un prato  de sabor moi intenso, e paga a pena probalo: esta receita está adaptada para o padal europeo (máis sosiño): cambiei o aceite de palma por xirasol e aínda que soe raro, o leite de coco, e eu non llo botei porque non gusto do seu sabor. De todos os xeitos, é saborosísimo: non quedou nada no prato!

Ingredientes (para 4 racións)

4 filetes de peixe branco (pescada, panga ou bacallao sen salar)

2 tomates, cortados en rodas

2 pementos verdes, sen sementes e cortados en rodas

2 pementos amarelos, sen sementes e cortados en rodas

2 cebolas pequenas, peladas e cortadas en rodas finiñas

2 culleres de aceite de oliva

1 culler de aceite de xirasol

300 ml de leite de coco (OPCIONAL)

1 lima

Media pastilla de caldo vexetal

Unha presa de coandro fresco, ben picado

Sal e pementa negra

  1. Quecemos o aceite de oliva nunha tixola e botamos os pementos verdes e os amarelos. Cociñamolos durante 1o minutos, ou ata que comecen a estar brandos e transparentar.
  2. Botamos os tomates por riba, despois o aceite de xirasol, o leite de coco (podédelo cambiar por auga, que é o que fixen eu) o coandro, o sal e a pementa. Deixamos cocer a lume medio sen remexer durante 5 minutos.
  3. Colocamos os filetes de peixe por riba e deixamos cocer, sen remexer cunha tapa por riba durante 5-7 minutos, dependendo do grosor.
  4. Pasamos a moqueca a un prato e aliñamola co zume da lima, un chisco máis de sal e un pouco de aceite de oliva. Acompañámola co arroz branco, cachelos ou pan, o que prefirades!

Bo proveito!

moqueca_1

 

 


Mousse de limón

Esta sobremesa é unha ledicia, especialmente despois dunha boa paparota! A mousse é dixestiva e lixeira, ideal para facer nestas festas; esta ten un sabor a limón intensísimo: tanto, que se non vos gusta así e queredes que quede máis suave, probade a botarlle un limón no canto de dous. A receita é unha adaptación desta outra.

A miña recomendación é que a deixedes repousar no frigorífico toda a noite, se non tendes tempo, polo menos dúas horas. Se sobra, pode gardarse ben na neveira dous ou tres días. Se vos gustan as mousses, botádelle un ollo a esta de manga, ou a esta torta de mousse de chocolate e café. Se por casualidade tendes limóns de sobra na casa, pode que vos interese este artigo: Cinco trucos para facer cun limón.

Ingredientes (para 4-6 racións)

3 ovos grandeiros

2 limóns

200 ml de nata para bater

200 gr. de azucre

6 culleres de auga

10 gr. ( un sobre, ou 6 láminas) de xelatina neutra

Un belisco de sal

Aménodas picadas, para a decoración

  1. Relamos os limóns e facemos zume deles.
  2. Separamos os ovos en claras e xemas.
  3. Nun bol grande botamos as xemas, o azucre, o zume e o relado de limón. Batemos todo ata que aclare a cor e teña unha consistencia homoxénea.
  4. Quecemos a auga nun prato fondo, no microondas. Cando estea quente, pero non fervendo, botamos a xelatina e remexemos ben cunha culler, mellor de metal.
  5. Batemos a nata nun bol ata que faga "piquiños" na superficie. Lembrade que cando máis fría estea de antes, mellor vai subir.
  6. Xuntamos a xelatina ca nata, tendo conta que non queden grumos. O mellor é bater a man cunha batedora de variñas, a modiño.
  7. Botamos esta mestura no bol do paso 3, repetimos o procedemento.
  8. Batemos as claras e mailo sal a punto de neve.
  9. Repetimos o paso 6, batendo con movementos amplos para non estragar demasiado o punto de neve.
  10. Botamos nuns vasos de cristal, tapámolos e deixamos repousar alomenos dúas horas.
  11. Decoramos con reladura de limón, améndoas, noces, etc.

Que aproveite!

mousse_limon_4