Galletas de millo á moda brasileira

Estas galletas coñécense en Brasil coma "biscoitos de fubá", e son desas receitas tan típicas que teñen miles de versións. Para facelas cómpre fariña de millo, pero non da que se fai o pan de millo (cada vez máis difícil de atopar, por certo) senón a peneirada para repostería, que se vende na maioría de supermercados e tendas de alimentación (tamén se pode comprar en Portugal co nome de fariña de fubá).

Os que seguides este blogue xa sabedes que lle dámos moi forte o tema de queiques e galletas, os que acabades de chegar, podédesvos pasar por esta receita de galletas de millo con chocolate, este queique de millo e mascarpone, ou estas espectaculare galletas veganas.

Ingredientes (para 14-15 pezas coma as da foto do final do artigo)

375 gr de fariña de millo

125 gr de fariña de trigo

125 gr de azucre

125 gr de manteiga tépeda

4 xemas de ovo

2 culleres de leite gordo (enteiro)

Unha culleriña de extracto de anís (opcional)

Un belisco de sal

Un chisco de azucre glas e canela en po mesturados, para decoraren.

  1. Mesturamos os ingredientes nun bol grande e mesturamos coas mans. Se quedase tan seco que non despega das paeredes do bol, podemos engadir un chisco máis de leite.
  2. Deixamos repousar 15 minutos no frigorífico.
  3. Prequecemos o forno a 170º, por riba e por baixo.
  4. Colocamos papel de forno nunha bandexa
  5. Cun trebello de bolas de xeado (se non tendes, usade dúas culleres para coller unha cantidade algo máis pequena que unha pelota de golf) facemos bolas e colocámolas na bandexa a 4 ou 5 cm unhas doutras. Esmagámos un pouco cun garfo para aplanalas.
  6. Cocemos durante 10 ou 15 minutos, ata que comecen a dourar por riba. Retirámolas a unha bandexa de reixas para que lles dea o aire por baixo.
  7. Mentres están quentes e na reixa, esparexemos o azucre e a canela por riba, ao gusto.
  8. Gardámolas nun recipiente hermético, aguantan de 3 a 6 días en bo estado dependendo da humidade do lugar.

Que vos parece? Fixestes a proba? Deixa a túa experiencia no comentarios, ou no noso Twitter.


Galletas de figos e noces

Estaba eu buscando como aproveitar os figos que me sobraran de facer a ensalada de outono e vin estas gorentosas galletas por Internet adiante. Ao final acabei improvisando algunhas cousas e o resultado foi moi bo: non son moi crocantes pero teñen un sabor e un arrecendo fantástico. Coma é lóxico, os figos pódense cambiar por outra cousa "pasa" que non estea moi seca e as noces por améndoas ou abelás.

Se, coma min, sodes  de facer galletas na casa, tamén podedes ver estas de dátiles, estas de vainilla ao estilo vienés ou voltar ás clásicas de pébedas de chocolate. Cales son as vosas galletas favoritas?

Ingredientes (para unhas 14 galletas coma a da foto)

200 gr de fariña triga

100 gr de noces, peladas e picadas

100 ml de aceite de xirasol

70 gr de azucre

4 figos pasos, grandes e cortados en anaquiños

Un ovo

Media culleriña de fermento químico, tipo Royal

Media culleriña de extracto de vainilla

Un belisco de sal

  1. Quecemos o forno a 170º, arriba e abaixo.
  2. Nun bol, mesturamos todos os ingredientes agás a fariña.
  3. Remexemos e imos engadindo a fariña pouco a pouco.
  4. Dámoslle forma cas mans ou cunha culler. Para que teñades unha referencia, vai ben coller anacos de masa do tamaño dunha pelota de ping-pong.
  5. Colocámolas nunha bandexa con papel de forno, deixando espacio dabondo entre elas para cando suban.
  6. Aplastamos un chisco a superficie e cocémolas no forno durante 15 ou 20 minutos, ata que estean douradas por riba.
  7. Deixamos o papel de forno cas galletas por riba dunha bandexa de rellas. Unha vez frías, gardámolas nun recipiente hermético, onde poden quedar 3 ou 4 días.

Que aproveite!

 

 


Queique de polenta e pera

A polenta é millo seco e moído, que se pode comer coma un puré (é moi típico no centro e norte de Italia) ou usar mesturado con fariña para queiques e galletas, xa que lles dá unha textura moi especial, moi compacta e ao mesmo tempo moi tenra.

Este doce admite moitas variacións na parte da froita: pódese facer con mazá, arandos, ameixas...etc. Tamén se lle poden engadir froitos secos por riba, a améndoa quédalle moi ben á pera.

Se che gustan os doces a base de millo, podes visitar esta receita de queique de millo, ou estas marabillosas galletas de millo e chocolate.

Ingredientes (para un queique de 8 ou 10 porcións)

250 gr. de azucre

225 gr. de fariña

150 ml. de aceite de xirasol, máis un pouco para o molde

80 gr. de polenta

2 peras grandes, peladas, sen carozo e cortadas en anacos de 1x1cm aprox.

2 ovos grandes

Reladura dun limón

Dúas culleres de fermento químico

Media culleriña de sal

  1. Prequecemos o forno a 180º, polos dous extremos.
  2. Engraxamos un molde rectangular cunha culleriña de aceite de xirasol e colocamos papel de forno no molde, que quede ben pegado.
  3. Esparexemos unha culleriña de azucre sobre o papel, e estendemos as peras cortadas, ocupando toda a superficie.
  4. Nun bol grande, mesturamos os ovos, o azucre e a reladura de limón, batendo ben.
  5. Noutro bol mesturamos a fariña, a polenta, o fermento e o sal. Imos engadindo e batendo esta mistura no bol do paso anterior.
  6. Vertemos no molde e cocemos no forno durante 45-55 minutos. Andade con ollo porque cada forno é distinto.
  7. Cando a superficie estea ben dourada, pinchamos cunha agulla de calcetar, e se sae seca é que xa está listo.
  8. Deixamos arrefriar nunha bandexa de rexas, estará máis bo pasadas unhas horas.

Que aproveite!


"Clafoutis" de mazá

O clafoutis é un doce orixinario da rexión francesa de Limousin, onde hai moitas e moi afamadas cereixas. A receita tradicional é con esa froita, pero hoxe en día son populares as variacións con amorodos, ameixas ou neste caso, mazás. A singularidade é a súa textura, non se parece a un biscoito senón a unha mestura entre un flan e un panqueque. Soa raro, mais está moi bo.

E un doce moi sinxelo e saboroso, que sabe mellor 24 ou 48 horas despois de facelo. Se vos gustan os doces con mazás, podedes pasarvos por esta receita de masa de follado con mazás caramelizadas, ou por esta outra de compota de mazá con lima e cardadamomo.

Ingredientes (dá unhas oito racións)

Para a parte de abaixo:

4 mazás

2 culleres de azucre moreno

2 culleres de zume de limón

2 culleres de manteiga + un chisco para o molde

1/2 culleriña de canela

Para a parte superior (masa):

Un iogur natural

85 ml de leite

3 ovos

80 gr de fariña

80 gr. de azucre

1/2 culler de extracto de vainilla

Un belisco de sal

  1. Prequecemos o forno a 190º, con calor arriba e abaixo.
  2. Untamos un molde redondo de 25 cm. de diámetro (aprox) cun pouco de manteiga.
  3. Pelamos as mazás, quitámoslle o carozo (a parte central cas sementes) e partimos cad unha en 16 anacos en vertical.
  4. Botámolas nun bol grande e mesturámolas co zume de limón.
  5. Botamos a manteiga nunha tixola e quecémola a lume medio, despois botamos as mazás e deixamos cocer 5 minutos, ata que comecen a transparentar.
  6. Botamos o azucre moreno e a canela e remexemos ben para que se mesture.
  7. Deixamos cocer 10 minutos, cunha tapa por riba.
  8. Sacámos a tixola do lume e deixamos arrefriar.
  9. Nun bol grande batemos os ovos co iogur, o leite e mailo extracto de vainilla. Cando estean ben batidos, engadimos o azucre e o sal, e despois a fariña: mellor tamizada cun escoador.
  10. Botamos as mazás cocidas no molde do paso 2, e despois engadimos a masa por riba.
  11. Cocemos no forno durante 45 minutos, vixilando que non se pase. Ha de quedar firme e dourada por riba e polas beiras.
  12. Servimos morna ou deixámola estar ata o día seguinte, que ha de saber mellor. Eu decoreina cun pouco de azucre glas, pero isto é opcional.

Que aproveite!


Madalenas de castaña e vainilla

Agora que vai tanto frío apetece quedar na casa e que mellor plan que facer unhas madalenas que sirvan de agasallo ou que solucionen uns cantos almorzos. Como presta comelas con café quentiño! Esta receita é moi doada, tanto que a podedes facer con nenos, seguro que se divirten fozando cos moldes de papel e o azucre :)

Se queredes ver máis receitas de madalenas, visitade a de madalenas con nata e noces, a de madalenas de chocolate, ou estas ben saudabeis de plátano e avea.

Ingredientes (para 14 madalenas, aprox.)

110 gr. de fariña de castañas

100 gr. de fariña de trigo

170 ml. de aceite de xirasol

100 gr de azucre normal

75 gr de azucre avainillado

60 ml. de leite (mellor se é gordo)

2 ovos

9 gr. de fermento químico

Un belisco de sal

Un chisco de azucre, avanillado ou non, para botar por riba

Utensilios:

Batedora de variñas

Moldes de papel para madalenas.

Moldes ou bandexa para madalenas

  1. Nun bol grandeiro botamos os ovos e o azucre, batemos ca batedora ata que aclare e teña unha textura esponxosa.
  2. Engadimos o leite, seguimos batendo.
  3. Engadimos o aceite aos poucos, mentres continuamos a bater.
  4. Nun prato fondo mesturamos as fariñas, o fermento e o sal, mesturamos cunha culler.
  5. Imos engadindo a mestura "sólida" á líquida mentres batemos, tendo conta de que non queden grumos.
  6. Tapamos cun film transparente e deixamos no frigorífico unha hora.
  7. Prequecemos o forno a 150º, por riba e por baixo.
  8. Colocamos os moldes de papel dentro dos de silicona (ou de metal, os que teñades) e enchémolos ata os 3/4, deixando marxe para que a masa suba. Esparexemos un chisco de azucre en cada madalena, formando una capa moi fina, para que logo quede crocante.
  9. Deixámolas cocer no forno durante 15 minutos, vixiando que non se pasen.
  10. Deixamolas arrefriar no mesado, e cando estean frías gardámolas nun tupperware ou nunha bandexa tapada cunha rolla.

Que aproveite!