Estofado de arroz e lentellas con cebola fritida

Este estofado coñécese popularmente coma mejadra ou mujaddara, que en árabe significa "cheo de buratos". É un prato típico en Oriente Próximo, onde ten fama de ser un prato de xente pobre, polo que se di que "vender a alma por un prato de mejadra".

Leva bastante tempo facelo e está mello ao día seguinte, mais paga a pena se vos gustan os pratos moi especiados (que non picantes, eh, isto non pica). No blog hai máis receitas deste tipo, coma este rustrido de quinoa e lentellas, ou este sinxelo arroz con chícharos e carne. Que aproveite!

PD: Todas estas especias atópanse moi fácil en case todos os supermercados.

Ingredientes (para 4 racións coma prato único)

4 cebolas grandes, peladas e cortadas en rodas finas

250 ml. de aceite de  xirasol

250 gr. de lentellas

200 gr. de arroz basmati

2 culleres de aceite de oliva

Unha culler de azucre

Unha culleriña de sementes de coandro

Unha culleriña de canela en po

Media culleriña de cúrcuma

Media culleriña de pementa negra

Sal ao gusto

  1. Quecemos o aceite de xirasol nunha tixola mediana. Cando estea ben quente, fritimos un tercio das cebolas, ata que estean ben douradas e un pouco crocantes nos bordes.
  2. Pasámolas a un prato cun pano de papel para que absorba o exceso de graxa, botámoslle sal.
  3. Mentres, poñemos as lentellas a cocer nunha tixola, con auga que as cubra ben, durante 20 minutos e un pouco de sal, ata que estean brandas. Escoamos e reservamos.
  4. Repetimos o paso 1 en dúas quendas.
  5. Pasámoslle un pano de papel á tixola de fritir as cebolas para limpala ben. Torramos as sementes de coandro, ata que douren e comecen a cheirar.
  6. Na mesma tixola, poñemos o aceite de oliva, o arroz, a cúrcuma, o azucre, a canela, o sal e a pementa. Remexemos ben e engadimos as lentellas.
  7. Botamos 350 ml de auga e deixamos cocer, a lume baixo e con tapa, durante 15 minutos.
  8. Quitamos a tapa e poñemos unha rolla limpa, volvemos poner a tapa e deixamos repousar co lume apagado, 10 minutos máis.
  9. Servimos acompañado das cebolas fritidas, e tamén podemos engadir un iogur grego, que acompaña moi ben a este rustrido.


Risotto de queixo parmesano e viño branco

O risotto é, igual ca panna cotta, un prato típico do norte de Italia. Esta receita de arroz ten unhas condicións específicas: o grán ten que botar amidón para que quede cremoso, e ao mesmo tempo ten que absorber a humidade para que quede no punto xusto e non acabe como unha sopa de arroz. Nos supermercados pódese atopar variedades de arroces que cumprar con eses requisitos, as máis comúns son arborio e arroz bomba. Tamén se pode cambiar o queixo parmesano polo grana padano, que é máis barato pero ten un sabor similar para o que queremos acadar.

Este artigo foi publicado orixinalmenteo 22 de xuño de 2013, esta é unha versión corrixida e con novas fotos.

Ingredientes (para 4 racións):

350 gr. de arroz de gran redondo

1 culler de perixel - fresco ou seco

2 culleres de aceite de oliva

1 cebola pequena

100 gr. de manteiga

250 ml. de viño branco

200gr. de queixo parmesano - raiado ou en anacos moi pequenos

1 - 1,2 litros de caldo de verduras ou de polo

  1. Botar o aceite e a cebola nunha tixola grande, quentalo a lume medio durante cinco minutos, ata que a cebola estea branda e un pouco translúcida. Engadir o arroz e unha culler de manteiga, torrando o arroz 3 ou 4 minutos. Verter o viño e remexer pouco a pouco ata que o arroz absorba o líquido.
  2. Quentar o caldo nunha pota aparte ou no microondas, e botalo ós poucos na tixola. O mellor é usar un cullerón, enchelo e verter o contido, remexer ata que o arroz absorba o caldo e repetir o proceso ata rematar o líquido. Dependendo da cantidade que utilicedes, debería levar entre 12 e 15 minutos.
  3. Retirar do lume, engadir o resto da manteiga e o queixo, remexendo ben ata que derreta e estea uniforme.
  4. Servir nun prato decorándoo co perixel.

Que aproveite!

risotto3


Cinco trucos para comer sushi

Cada vez hai máis e mellores restaurantes xaponeses en Galicia, e non é de estrañar, xa que materia prima teñen dabondo! Hoxe imos ver como se come o sushi evitando desfeitas e "malas prácticas", se coñecedes algún truco máis, non dubidedes en deixar un comentario, ou comentalo na conta de Twitter: @queroxamon

  1. Os paus: o xeito máis doado de collelos é o seguinte: agarramos un co polar (á metade do dedo) e o maior, e o outro ca parte superior do polar e o índice (furabolos!), o primeiro pau ha de estar fixo, coma unha base, e o segundo é o que se move para facer pinza e coller as pezas. Se non sodes quen de collelas cos paus, podedes usar as mans: aínda que a algunha xente lle pareza mal, e Xapón é un costume bastante estendido. Cando non se usen, hai que deixalos apoiados na pequena táboa que hai onda o prato, nunca na mesa.
  2. O mollo de soia: non debemos botar moito, xa que a súa función é acompañar, e se o arroz chucha moito líquido, esfarela e pode que se desfaga a peza. Isto é especialmente dramático no caso dos makis.
  3. O wasabi: en Xapón adoita vir xa posto no sushi, xa que se considera que o cociñeiro é o que mellor sabe como adobalo, pero aquí case sempre vén aparte. Podemos poñer unha pinga entre o arroz e o peixe, o disolvelo na cunca da soia, sempre tendo en conta que non cómpre moita cantidade.
  4. As láminas de  xenxibre: esas que ás veces saben un pouco a xabón ;), a súa función é limpar o padal entre diferentes tipos de sushi, polo que non se deben de comer xunto cas pezas. A mellor orde para comer é comezar polo sushi de sabor máis suave e rematar co máis intenso, tipo atún vermello, salmón ou anguía.
  5. As racións, e como comelas: cando comezaba a comer sushi non calculaba ben e moitas veces acababa cunha enchenta moi seria, xa que o peixe cru e o arroz non son tan lixeiros coma poida parecer. Se non sabedes canto pedir, un número orientativo serían 12-15 pezas por persoa, con isto soe ser dabondo. As pezas de sushi están feitas para comelas dun bocado, ou coma moito dous, así que non ten sentido partilas. Para desfrutar do sabor, a maneira correcta de colocalas é co peixe cara a lingua e o arroz cara arriba, así saben moito máis!

Cal é o voso restaurante de sushi favorito? Sempre andamos á procura de recomendacións :)

Estes cadriños explícano moi ben, pero non sei a súa orixe... A foto que ilustra o artigo é desta conta de Flickr

sushi-guia-1

sushi-guia-2

 


Chocos guisados na súa tinta

Hai xa un tempo que non temos receitas de peixe e marisco, pero recuperamos o tempo perdido con esta delicia! Os chocos son doados de cociñar, mais precisan moita paciencia, xa que a súa carne ten que cocer moito para quedar brandiña. Para facer esta receita teredes que avisar na peixería que que volos limpen ben e garden a tinta nunha bolsiña aparte.

Para os que non queirades cociñar, pero si probar este marabilloso produto, podédevos acercar á famosa festa do choco de Redondela, unha das máis senlleiras de Galicia: o ano que vén cumprirá 30 anos!

Ingredientes (para catro racións)

1 quilo de chocos, cortados en rodas,  ca súa tinta

1 cebola grande, ben picada

4 ou 5 culleres de aceite de oliva

1 vaso de viño branco

1 vaso de auga

3 dentes de allo

Unha culleriña de sal e perixel ao gusto

  1. Nun morteiro metemos o sal, o perixel e os dentes de allo cortados en anacos. Esmagamos todo xunto ata facer unha pasta.
  2. Quentamos o aceite de oliva nunha tixola grande e pochamos a cebola a lume medio.
  3. Cando estea branda e comece a dourar, engadimos os chocos, a tinta, o viño e a auga.
  4. Deixamos quecer a lume medio unha hora e media, aproximadamente. Se os chocos son grandeiros, un chisco máis.
  5. Servimos acompañados de cachelos ou arroz branco. Para facer arroz dun xeito rápido e sinxelo, mirade esta receita.

Que aproveite!

chocos-1 chocos-3


Arroz con chícharos...e carne

As combinacións de arroz ou pasta con legumes e carne son unha aposta segura para conseguiren un prato doado e saboroso que inda por riba, dure varios días. Este é un prato ideal para facer moito e deixalo para levar nunha tarteira ou para a fin de semana, por se non apetece cociñar. ao dia seguinte estará máis bo ;)

Se vos gusta o arroz, prato cada vez máis extendido en Galicia (ao principio só se tomaba coma sobremesa, feito con leite e azucre) podédeslle botar un ollo a esta receita de arroz con ñoras e polo ou a este risotto con viño, que non leva carne.

Ingredientes (para 4 ou 5 racions)

200 gr. de arroz redondo

800 ml. de auga

1 dente de allo pelado, cortado á metade

8 culleres de aceite de oliva

500 gr de carne de vacun picada

250 gr de chícharos en conserva

100 ml. de viño branco

1 culleriña de sal

Pementa negra ao gusto

  1. Para facer un arroz branco, botamos tres culleres de aceite nunha tixola grande, quentámolas e despois botamos o arroz, o dente de allo, media culleriña de sal e un chisco de pementa. Remexemos ben e cando o arroz estea ben mesturado co aceite, botamos a auga.
  2. Quecemos a lume alto durante 10 minutos e a lume baixo outros 10. Retiramos e deixamos repousar na tixola.
  3. Noutra tixola, botamos o resto do aceite e cando quente, fritimos un chisco a carne. Engadimos o viño, os chícharos e un pouco de sal, e quecemos a lume baixo durante 15 minutos, ata que estea ben cocido e teña mollo.
  4. Mesturamos todo na tixola grande, quentámolo un pouco se queremos e... que aproveite!

 

arroz-con-chicharos2