Polo guisado con verduras e viño branco

A quen non lle gusta o polo guisado? Esta semana traemos unha receita moi doada de facer (en serio, o único que cómpre é un pouco de paciencia). Esta receita viría sendo a versión estival deste polo guisado ao viño tinto.Podedes cambiar as verduras, tamén quedaría ben con cebola e pementos, berenxena, etc.

Xa sabedes que por estas leiras somos moito de polo, podedes velo nesta receita de albóndegas de polo con ananás, ou esta de polo rebozado ao mel.

Ingredientes (para 4 racións)

8 coxas ou contracoxas de polo

Un allo porro

Unha cabaciña

6 metades de tomates secos rehidratados

250 ml. de viño branco, seco ou semi-seco

8 culleres de aceite de oliva virxe extra

Sal ao gusto

1/2 culleriña de tomiño

  1. Poñemos o aceite a quecer nunha tixola ben grande. Douramos ben as pezas de polo e reservamos.
  2. No mesmo aceite botamos o allo porro e a cabaciña cortados en dadiños. Cocemos a lume medio ata que comecen a estar brandos e transparentes.
  3. Engadimos os tomates secos picados, o tomiño e o sal. Remexemos un par de minutos.
  4. Engadimos o viño e deixamos cocer máis ou menos 5 minutos, ata que evapore o alcol.
  5. Botamos o polo de volta á tixola e deixamos cocer, a lume medio, durante 20 ou 30 minutos. E probable que algunhas verduras queden caramelizadas (escuras), pero non vos preocupedes, están moi boas así!

Que aproveite!


Barcas de cabaciña con queixo San Simón

Estas barcas de cabaza so precisan un pouco de xeito ao coller o coitelo, polo demáis, son ben doadas e quedan moi ben nunha comida/cea con convidados. Se vos gusta esta verdura, temos ben de receitas con, ela, como por exemplo estas chulas de cabaciña, ou coca. Tamén lle podedes botar un ollo a estas berenxenas recheas con carne queixo feta, ou estas (aptas para vexetarianos), recheas do queixo asturianu Afuega'l pitu.

Ingredientes (para 4 ou 2 racións, dependendo se é entrante ou prato principal)

2 cabaciñas grandes

1 cebola grande, ou dúas pequenas

3 latas pequenas da atún (as que veñen nun pack)

2 pementos vermellos

100 gr. de queixo San Simón, relado.

6 culleres de aceite de oliva virxe extra

Un pouco de sal

  1. Lavar, pelar e cortar as cebolas en rodas moi finiñas.
  2. Quecer o aceite nunha tixola a lume medio.
  3. Lavar as cabeciñas, cortalas ao longo en dúas metades e sacarlle a polpa cun coitelo pequeno.
  4. Botar as rodas de cebola e a polpa das cabaciñas, co sal, e seguir cociñando a lume medio, ata que comece a transparentar.
  5. Mentres, lavar e cortar os pementos en anacos moi pequenos.
  6. Prequentar o forno a 180º.
  7. Engadir os pementos e seguir quecendo a mestura da tixola a lume medio.
  8. Apagar o lume da tixola e engadir o atún (escoado e esfarelardo) e u pouco do queixo San Simón, relado.
  9. Meter o contido de volta no "concho" das cabaciñas e botar o queixo restante por riba.
  10. Poñer un papel de aluminio na bandexa do forno e colocar as barcas de cabaciña por riba.
  11. Cocer no medio forno durante 20 minutos. Despois, co calor só por riba, subímolas un nivel e cocémolas 5 minutos máis, para que o queixo quede un pouco torradiño.

Servímolas quentes, se non se van comer no momento aguantan ben un par de días no frigorífico.

Que aproveite!


Chulas de cabaciña

As chulas son un dos xeitos máis saborosos de aproveitar sobras ou comida da que non temos moita cantidade. Estas son especialmente doadas de facer, e moi lixeiras!

Se queredes máis receitas con cabaciñas, (que cada vez están presentes en máis hortas do país), velaiquí tendes unha receita de pasta con cabaciñas, ou esta gorentosa coca con salchichas. Kukinhas moitas receitas con elas, a mín gustoume especialmente esta para facer unha torta salgada de cabaciñas.

Ingredientes (para 14-16 chulas)

650 gr. de cabaciñas

85 gr. de fariña de trigo

Unha cebola tenra (ca parte blanca e a verde)

2 ovos

2 culleres de queixo parmesán relado (opcional)

Crema agria para decoraren (opcional)

Aceite de oliva ou de xirasol

Sal e pementa negra ao gusto

  1. Lavamos e relamos a cabaciña nos ocos grandes do relador. Botámola nun escoados por riba dun bol con dous beliscos de sal, remexemos e deixamos repousar 10 minutos.
  2. Escoamos a cabaciñas cas mans, apretando para que saia líquido.
  3. Tiramos o líquido do bol e batemos os ovos cun chisco de pementa negra e sal. Neste punto podedes engadir o queixo parmensán.
  4. Botamos a cabaciña, a cebola cortada moi finiña e a fariña, mesturamos ben para que non queden grumos.
  5. Preparamos a tixola co aceite (a cantidade dependerá do graxosas que as queirades, pero con 4 ou 5 culleres é dabondo).
  6. Facemos as chulas poñendo 3 culleres da masa e aplastando, tendo conta de deixar espacio entre elas. Deixamolas cocer 2 ou 3 minutos por cada cara, ata que estean ben douradas.
  7. Botámolas nun prato cuberto de papel de cociña, engadímoslle un pouco de sal por riba e servímolas quentiñas, con ou sen crema agria.

Que aproveite!

chulas_cabacinha2

chulas_cabacinha1


Pasta con cabaciñas

Unha receita moi sinxela para as ceas de verán! E nada máis que engadir ;)

Ingredientes (para dúas racións)

160 gr. de pasta

Dúas cabaciñas pequenas, en rodas cortadas á metade

3 cebolas tenras pequenas

Un feixe (30 gr.) de perixel

60 ml. de viño branco seco

Catro culleres de aceite de oliva, máis un chisco para o final

Queixo parmesán ao gusto

Sal e pementa

  1. Cocemos a pasta seguindo as instruccións do paquete, pero tendo conta de que quede un pouco dura: con 2 ou 3 minutos menos de cocción abondará.
  2. Mentres, cortamos as cebolas en rodas moi finas.
  3. Quecemos o aceite nunha tixola grande cunha tapa e botamos as cebolas a cocer a lume alto durante 1 minuto, tapado.
  4. Remexemos as cebolas cunha culler de pau, e engadimos as cabaciñas. Deixamos cocer 5 minutos, remexendo de cando en vez.
  5. Engadimos o viño e a metade do perixel, baixamos o lume e deixamos cocer 5 minutos máis. Ha de quedar moi tenro e un pouco translúcido. Engadimos sal e pementa e deixamos repousar.
  6. Escoamos a pasta reservando un vasiño da auga da cocción.
  7. Volvemos poñer a pota da pasta no lume e engadimos todo: a pasta escoada, un chisco da auga de cocción, un chisco de aceite de oliva, a mestura da tixola, o perixel e o queixo relado. Remexemos, se queda algo seca  ou non liga ben, engadimos un pouco máis de auga.
  8. Servimos quente, a desfrutar!

pasta_cabacinhas_3

pasta_cabacinhas_1


Crema rubia de verduras

Esta semana temos unha crema de verduras, que xa hai tempo que non caía ningunha por aquí. O nome venlle da cor que ten, grazas aos pementos de Piquillo e ao tomate. Aproveito para recomendarvos este post de César Lorenzo que explica moi ben as distintas tonalidades de pelo en galego, e por extensión, o significado de rubio, moitas veces esquecido ;)

Esta crema ten un sabor moi suave, sen dúbida é moi boa opción para as ceas e primeiros pratos... Que vos parece a idea?

Ingredientes (para catro racións)

Unha cabaciña

Unha cebola

Un tomate maduro

120 gr. de pementos do Piquillo

3 culleres de puré de pataca en po

1 pastilla de caldo (de polo ou verduras, o que vos guste máis)

Un belisco de sal

Media culleriña de ourego

2 ou 3 culleres de aceite de oliva, máis un pouco para decorar

  1. Lavamos e pelamos as verduras. Se queredes pelar o tomate, mellor fervédeo 30 segundos en auga quente, desde xeito a pel será moi fácil de retirar.
  2. Cortamos a cabaciña en rodas de algo menos dun centímetro, o mesmo ca cebola. Cortamos o tomate en anacos e metémo todas as verduras frescas, a pastilla de caldo, o ourego e o sal nunha pota.
  3. Botámoslle auga ata cubrir as verduras, e deixamos cocer aproximadamente 20 minutos, ata que estea todo brando.
  4. Engadimos os pementos de Piquillo e e o aceite e batemos ca batedora ata conseguiren unha textura homoxenea. Se queda moi líquido, ide engadindo o puré de pataca;se vos gusta como está, entón non fai falla.
  5. Servimola quentiña, decorada cunhas pingas de aceite

Que aproveite!

crema_rubia1