Carne guisada con cognac e mostaza

Os guisos son ese pratos, que ademáis de dar gusto comelos, dá gusto facelos, especialmente se arrecenden coma este, non ides queres sair da cociña! Ideal para facer os días de frío, estará moito mellor 24 ou 48 horas despois de cociñalo.

Aínda que a lista de ingredientes é longa, é bastante doado de facer, o único que tendes que ter en conta é que o proceso dura 2 h e media, máis ou menos. No medio pódese deixar, pero aínda así hai que andar con conta de que non se pegue. Importante: hai que facelo nunha pota grande e de base larga.

Se non tendes cognac na casa, podédelo cambiar por brandy, xerez ou mesmo viño tinto. Neste caso e usei mostaza de gran (a que venden coma "ancienne"), que ten un sabor máis suave, pero na receita non sae especificado xa que depende do gusto de cada un. A cantidade pódese reducir ou aumentar, non pasa nada. Se vos gusta este condimento, botádelle un ollo a esta receita de albóndegas mariñadas con mostaza ou a estas couves de Bruselas con mel e mostaza.

Ingredientes (para 4-6 persoas)

Un quilo de carne de terneira, cortada para guisaren

100 gr. de touciño entrefebrado

250gr. de champiñóns

400 ml de caldo de verduras

80 ml de cognac

90 gr. de mostaza

Unha cebola

3 chalotas (pódense cambiar por outra cebola)

3 ou 4 cenouras

5 culleriñas de manteiga (ou máis, dependendo de como se dea a receita)

Unha presa de fariña

Sal e pementa

  1. Nunha pota ben grande, a lume medio, botamos o touciño ben picado.
  2. Pelamos e cortamos a cebola e as chalotas en anacos pequenos, e cando o touciño solte a graxa e comece a torrarse, engadímolas á pota e subimos o lume. Cocemos durante 10-15 minutos, ata que douren e comecen a estar transparentes. Apagamos o lume e reservamos nun bol.
  3. Botámoslle sal e pementa á terneira, e pasámola por fariña nun prato fondo. Engadimos dúas culleriñas de manteiga á pota e cando derretan comezamos a rustrir a carne a lume medio-alto (haberá que facer dúas quendas). Se se pega moito, engadide un chisco máis de manteiga. Cando a carne estea churruscadiña por fóra, retirámola ao bol do punto 2.
  4. Botamos o cognac na pota e rascamos o fondo cunha culler de pau para que despegue a costra que fixo a carne. É MOI DOADO. Engadimos o caldo e a mostaza e remexemos ben. Cando estea mesturado, engadimos o contido do bol e cocemos a lume baixo durante unha hora, remexendo de cando en vez.
  5. Engadimos as cenouras (peladas e cortadas en rodas) e deixamos cocer 40 minutos máis.
  6. Nunha tixola mediana engadimos unha culleriña de manteiga e os champiñons en láminas de 0,5 cm. Cocemos ata que estean marróns e engadímolos ao guiso, deixando cocer 5 minutos máis. Corriximos o sal se fose preciso e servimos quente.

É moi recomendable deixalo feito polo menos un día antes e quecelo antes de servir, estará DELICIOSO!


Chili con carne

De orixe difusa, o chili con carne é un prato moi popular no norte de Mexico e nos Estados Unidos. É o prato oficial do estado de Texas e faise moito en competicións/festas gastronómicas onde hai moita xente. Non é de estrañar, xa que é de eses pratos dos que é imposíbel facer pouco, e polo tanto solucionan o xantar de varios días ou as ceas multitudinarias.

Para facer esta versión usei feixóns negros, que eran os que tiña na casa. Para cocelos, deixeinos a remollo a noite antes e ocínos durante unha hora. O chili con carme tamén se fai con feixóns vermellos ou "pintos", ide con ollo porque os tempos de cocción adoitan variar. Unha opción máis cómoda é mercalos cocidos en lata, pero a textura será máis caldosa.

Ingredientes (para catro ou cinco racións)

500 gr. de carne picada de porco u vitela

400 gr. de feixóns cocidos

300 gr. de tomates pelados en lata

1 cebola grande

1 pemento italiano

1 semente de caiena

4 ou 5 culleres de aceite de oliva

2 dentes de allo

1 culleriña de ourego

1 culleriña de prebe Perrins

1 culleriña de sal

  1. Quecemos o aceite nunha pota grande a lume medio.
  2. Cortamos o allo e as cebola en anacos moi moi pequenos, poñémolo todo a dourar no aceite.
  3. Cortamos o pemento do mesmo xeito, engadimos á pota.
  4. Botamos a carne na pota, remexendo de cando en vez cunha culler de pau, sempre a lume medio.
  5. Engadimos a caiena cortada finiña, o sal, o ourego e o prebe Perrins, remexemos.
  6. Cortamos os tomates de lata e engadímolos á pota. Tapamos e deixamos cocer 15 minutos a lume medio.
  7. Engadimos os feixóns, prbamos o guiso por se hai que corrixir o sal. Deixámolo cocer 15 minutos máis.
  8. Servímolo quente acompañado de nachos (chips de tortilla mexicana) e queixo Cheddar ou Emmental. Tamén queda ben con arroz branco ou cachelos ;).

Que aproveite!

chili_carne_1


Costela de porco glaseada ao forno

Esta receita é unha adaptación desta do marabilloso blogue Palachinka, onde podedes atopar moitas receitas larpeiras e especialidades balcánicas (en inglés). Leva moito tempo facela pero o resultado paga a pena 200%: a carne queda tenra e aromática, e a combinación co prebe agridoce é soborosísima! Non digades despois que non vos avisei ;)

Ingredientes (para 4 ou 5 racións)

1,5  quilos de costelas de porco

1,25 l. Coca-Cola, ou outra bebida de cola

1 pau de canela

125 gr. azucre moreno

60 gr. (3 culleres) de mel

130 gr. ketchup

2 culleres de mostaza

2 culleres de mollo Worcester

60 ml. de mollo de soia

    1. Prequecer o forno a 160º
    2. Cubrir o fondo dunha pota con papel de aluminio e colocar as costelas e o pauciño de canela. Botar un litro de cola e cubrir con máis papel de aluminio. Cocer no forno durante dúas horas, aproximadamente.
    3. Namentres, preparamos o mollo, que é o especial da receita. Mesturamos nunha tixola o azucre, o mel, o ketchup, a mostaza e o mollo Worcester con medio litro de Coca-cola. Cocemos a lume medio, remexendo de cando en vez ata que teña unha consistencia de xarope. Ao rematar hai que untar isto nas costelas cun pincel (de silicona), tende conta de que non quede nen moi líquido nen moi espeso.
    4. Sacamos a pota do forno logo de dúas horas e colocamos as costelas nunha bandexa de asar. Tiramos co líquido sobrante.
    5. Estendemos o mollo sobre as costelas cun pincel de cociña e metémolas no forno. Colocamos a bandexa negra con papel de prata por baixo, para recoller as pingas e que non atufe o forno. Nesta fase só compre calor na parte superior do forno.
    6. Tras 10 minutos, dámoslle a volta ás costelas e pintámolas polo outro lado. Repetimos a operación (dúas pintadas por cada lado).

Que aproveite!

costela_3

costela_5


Polo ao viño tinto

Despois dunhas semanas de "dieta branda" , voltamos ca acarne ao blo, desta vez cunha combinación moi especial: polo guisado ao viño tinto. A verdade é que está moi bo, e como o polo évos tan agradecido, podedes cambiar o viño por cervexa ou incluso cola, que seguro ha quedar ben tamén. Só hai que ter en conta dúas cousas: canto mellor o viño, máis sabedeiro o guiso (non é plan de usar un carísimo, pero tampouco San Simón) e que estará máis bo ao día seguinte.

Se vos gusta a carne de polo, non deixedes de botarlle un ollo a esta receita de polo rebozado con mel, ou a esta de polo asado con laranxa

Ingredientes (para 4 racións)

4 coxas ou contracoxas de polo

80 gramos de manteiga

Unha cebola grandeira

100 ml de viño tinto

Sal e pementa negra

  1. Pelamos e cortamos a cebola en rodas finas, de 5 mm. aproximadamente.
  2. Poñemos unha pota grande a lume medio e derretemos a manteiga. Hai que ir con ollo porque a  manteiga queima máis axiña ca o aceite, e entón non serviría.
  3. Douramos a cebola na mateiga durante 10 minutos, a lume medio.
  4. Botámoslle sal e pementa ás coxas de polo e pasámolas á pota para que douren. Cando estean dun lado, dámoslles a volta, que non quede ningunha parte crúa.
  5. Botamos o viño e deixamos quecer, sempre a lume medio, durante 20-30 minutos, dependendo do tamaño das pezas.
  6. Servimos acompañado de arroz, patacas, ou simplemente pan!

Que aproveite!

polo_vinho_3

 


Noodles con carne, verduras e soia

Xa sei que non é un prato moi típico destas datas (en realidade, de ningunhas :D) pero quería aproveitar que o outro día fixen uns noodles cunha receita taiwanesa e quedaron súper saborosos. En realidade aqueleina cos ingredientes que tiña máis a man, a receita orixinal é ésta, e leva moitas máis cousas...

Este é un prato que precisa un pouco de paciencia, sobre todo para cortaren todo ben picado, despois faise de contado! Se queredes abraiar a alguen cun prato distinto, estes noodles son ideais, tamén podedes substituir a vitela por polo (ou por froitos secos, se non queredes comer carne). E se non dades comprado noodles, empregade arroz branco, tamén está moi rico! As instruccións para cocer o arroz branco son éstas.

Ingredientes (para dúas racións grandes):

150 gr. de noodles (de trigo ou arroz)

150 gr. de carne de vitela, cortada en dadiños.

1 cebola pequena, mellor se é doce

1 dente de allo

Medio feixe de apio

150 gr. de cogumelos en conserva, cortados en anacos pequenos.

5 culleres de aceite de xirasol

Sal e pementa

Unhas ramiñas de herba limoeira ou de ceboliño, para a decoración.

Para o mollo:

150 ml. de auga, morna

1/2 pastilla de caldo de polo

3 culleres de mollo de soia

1 culler de vinagre de Módena

1 culler de azucre moreno de caña

  1. Cocemos  os noodles segundo as instruccións do fabricante.
  2. Nun bol pequeno, mesturamos os ingredientes do mollo, remexendo ben para mesturar. Deixamos repousar.
  3. Quentamos o aceite de xirasol nunha tixola grande, a lume medio. Cortamos as ramas do apio en rodas finas (ollo, as follas non se comen!) e botámolas a dourar. Facemos o mesmo coa cebola, mesturando todo durante 3 ou 4 minutos, ata que douren.
  4. Cortamos o allo o máis pequeno que poidamos, engadímolo á tixola.
  5. Botamos a carne a fritir cas verduras, durante 2 minutos, non ten que estar feita de todo aínda. Engadimos tamén os cogumelos ben cortadiños, remexendo ben.
  6. Engadimos o mollo, o sal e a pementa e deixamos que coza (sen chegar a ferver) durante 2 ou 3 minutos.
  7. Colocámos os noodles nun prato, botamos o preparado da tixola por riba e decoramos cas herbas cortadas en rodiñas finas.

Que aproveite!

 

noodles_3