Carne guisada con cognac e mostaza

Os guisos son ese pratos, que ademáis de dar gusto comelos, dá gusto facelos, especialmente se arrecenden coma este, non ides queres sair da cociña! Ideal para facer os días de frío, estará moito mellor 24 ou 48 horas despois de cociñalo.

Aínda que a lista de ingredientes é longa, é bastante doado de facer, o único que tendes que ter en conta é que o proceso dura 2 h e media, máis ou menos. No medio pódese deixar, pero aínda así hai que andar con conta de que non se pegue. Importante: hai que facelo nunha pota grande e de base larga.

Se non tendes cognac na casa, podédelo cambiar por brandy, xerez ou mesmo viño tinto. Neste caso e usei mostaza de gran (a que venden coma "ancienne"), que ten un sabor máis suave, pero na receita non sae especificado xa que depende do gusto de cada un. A cantidade pódese reducir ou aumentar, non pasa nada. Se vos gusta este condimento, botádelle un ollo a esta receita de albóndegas mariñadas con mostaza ou a estas couves de Bruselas con mel e mostaza.

Ingredientes (para 4-6 persoas)

Un quilo de carne de terneira, cortada para guisaren

100 gr. de touciño entrefebrado

250gr. de champiñóns

400 ml de caldo de verduras

80 ml de cognac

90 gr. de mostaza

Unha cebola

3 chalotas (pódense cambiar por outra cebola)

3 ou 4 cenouras

5 culleriñas de manteiga (ou máis, dependendo de como se dea a receita)

Unha presa de fariña

Sal e pementa

  1. Nunha pota ben grande, a lume medio, botamos o touciño ben picado.
  2. Pelamos e cortamos a cebola e as chalotas en anacos pequenos, e cando o touciño solte a graxa e comece a torrarse, engadímolas á pota e subimos o lume. Cocemos durante 10-15 minutos, ata que douren e comecen a estar transparentes. Apagamos o lume e reservamos nun bol.
  3. Botámoslle sal e pementa á terneira, e pasámola por fariña nun prato fondo. Engadimos dúas culleriñas de manteiga á pota e cando derretan comezamos a rustrir a carne a lume medio-alto (haberá que facer dúas quendas). Se se pega moito, engadide un chisco máis de manteiga. Cando a carne estea churruscadiña por fóra, retirámola ao bol do punto 2.
  4. Botamos o cognac na pota e rascamos o fondo cunha culler de pau para que despegue a costra que fixo a carne. É MOI DOADO. Engadimos o caldo e a mostaza e remexemos ben. Cando estea mesturado, engadimos o contido do bol e cocemos a lume baixo durante unha hora, remexendo de cando en vez.
  5. Engadimos as cenouras (peladas e cortadas en rodas) e deixamos cocer 40 minutos máis.
  6. Nunha tixola mediana engadimos unha culleriña de manteiga e os champiñons en láminas de 0,5 cm. Cocemos ata que estean marróns e engadímolos ao guiso, deixando cocer 5 minutos máis. Corriximos o sal se fose preciso e servimos quente.

É moi recomendable deixalo feito polo menos un día antes e quecelo antes de servir, estará DELICIOSO!


Torta de cenoura e avea

Unha desas receitas que se atopan por casualidade, buscando un uso para os flocos de avea que tiña abandonados pola cociña. Estaba eu a buscar tortas con avea, e din con esta receita, que despois eu modifiquei un chisco ao meu gusto.

Un par de cousas: se de normal os queiques están mellor ao día seguinte, este está mellor aos dous días, non esfarela tanto coma na foto (era o 1º día e esfarelaba todo) e o sabor do aceite de oliva notábase máis. Eu usei un da variedade hojiblanca con bastante acedume, dálle un sabor moi intenso. Se non sodes fans da intensidade do aceite, probade cun de oliva suave, ou incluso un de xirasol.

Ingredientes (para 8 racións, aprox, un molde de 25 cm. de diámetro)

3 ovos

120gr de azucre moreno de caña

150gr de cenoura relada

100gr de copos de avena + Unha présa para decoración

75gr de fariña de avea

75 gr. de fariña de trigo

90ml de aceite de oliva (ou de xirasol)

1/2 culleriña de canela en po

1/4 culleriña de noz moscada

15 gr. de fermento químico

Un belisco de sal

  1. Prequentamos o forno a 180º.
  2. Nun bol grande batemos os ovos co azucre, ata que clareen e formen unha pasta homoxenea.
  3. Engadimos a cenoura e o aceite, seguimos batendo.
  4. Engadimos a fariña, as especias, o fermento e o sal, batemos.
  5. Untamos un molde cun chisquiño de aceite e botamos a masa.
  6. Para que os flocos non afundan no queique, o truco é rebozalos con fariña de trigo, pódese facer cas mans, deixando caer a fariña que sobre. Estendémolos por riba da masa.
  7. Cocemos no forno durante 35-40 minutos, ata que estea ben dourado por riba.
  8. Deixamos no molde un día ou dous, servímolo de almorzo ou merenda!


Crema de cenoura e batata

Este ano o outono está a tardar moito, pero cando chege o frío, tende esta receita a man que vos ha facer moito avío ;) É unha crema moi suave e saborosa, apta para vexetarianos e tamén para veganos!  Tendo en cota que a receita leva poucos ingredientes, o mellor aceite que lle podedes botar é un intenso, tipo cornicabra ou hojiblanca, estará aínda máis saborosa!

Para os que queirades facer cremas, botádelle un ollo a esta categoría. Tamén hai bastantes algunhas con batata (tamén coñecida coma boniato ou batata doce), que eu son moi fan, xa a fixen asada ou en rolos doces.

Ingredientes (para catro ou cinco racións)

2 batatas medianas

3 cenouras grandes, ou 4 medianas

1 porro grande

5 culleres de aceite de oliva virxe + un chisco para o final

Un belisco de sal

Unha culleriña de ourego (opcional)

  1. Cortamos a parte branca do porro en rodas dn centímetro.
  2. Nunha pota grande, notamos dúas culleres de aceite de oliva e sofritimos o porro nelas, a lume medio-baixo.
  3. Pelamos as cenouras e as batatas, cortámolas en anacos pequenos (2 ou 3 cm de grosor).
  4. Botámolas na pota xunto co sal e botamos auga ata cubriren todo o contido.
  5. Cocemos durante 30 minutos, ata que a batata estea ben branda.
  6. Deixamos arrefriar un pouco, engadimos o resto do aceite e batemos ca batedora ata que sexa unha crema homoxénea.
  7. Servimos decorada cunhas pingas de aceite e un pouco de ourego.

Que aproveite!

crema_cenoura_1


Quiche vexetal con anacardios

Aínda que non son vexetariana (raro sería tendo un blogue que se chamase así) ultimamente ando a experimentar con pratos sen carne. Esta quiche é moi gustosa e sinxela de facer, sobre todo porque fixen trampa e comprei o follado xa feito, igual que na receita de palmeiriñas. En total levará pouco máis dunha hora.

Penso que é unha boa idea para facer logo do Entroido se quedades cansados do cocido. Ollo, que aínda que non leva carne si leva nata, polo que é bastante farturenta ;)

Ingredientes (4-5 porcións)

1 paquete de follado redondo

8 follas grandes de acelgas

4 cenouras

3 anacos de coliflor

Un feixe de anacardios (60 gr. aproximadamente)

150 ml. de nata para cociñar (a de 18% de materia graxa)

1 ovo grande

1/4 de culleriña de noz moscada

Sal

  1. Enchemos unha pota de auga, quentámola e botamos a coliflor a cocer. Cando leve 10 minutos, engadimos as acelgas limpas e sen talo e as cenouras cortadas en cachos pequenos.
  2. Escoamos as verduras e reservamos.
  3. Prequentamos o forno a 180º
  4. Nunha tixola botamos a nata e quentámola a lume medio xunto ca noz moscada.prep1
  5. Cortamos os anacardos en anacos pequenos
  6. Botamos as verduras e mailos anacardios na tixola, deixamolo estar a lume medio durante 10 minutos. prep4
  7. Batemos o ovo e botámolo na mestura.
  8. Estendemos o follado nun molde redondo. Para que non soba no forno, pinchámolo varias veces cun garfo:prep2
  9. Enchemos o follado co contido da tixola.
  10. Cocemos no forno durante 25 minutos, ou ata que estea ben dourado nas beiras e o recheo algo seco (callado). Depende moito do forno, tende conta disto.

Nota: Recomendo comelo no mesmo día, xa que o follado colle a humidade do recheo e ao día seguinte non está crocante.

Que aproveite!

quiche_vexetal3