Gratín de cabaza con mozarella

Despois dunhas semanas moi apuradas e sen tempo de actualizar, volvemos cunha receita de cabaza,  que aínda se atopa de tempada! Este é un gratín moi doado de facer, unha receita de orixe italiana que atopei no marabilloso libro "Las verduras de mmuchas maneras" de Karen Leiz (que foi un súper agasallo de Nadal).

Para que sexa máis doado, recoméndovos que merquedes a parte superior da cabaza, a que ten máis carne e menos sementes, porque é mello para facer rodas do mesmo grosor. Lembrade quitarlle a pel, restos de semente, etc. Se vos gusta a cabaza (ou cabacú, como lle chaman nalgunhas zonas), botádelle un ollo a estas sopa de cabaza con ameixas ou a esta crema rubia de verduras.

Ingredientes (para 3 ou 4 racións)

600 gr de cabaza en rodas de 2 cm de grosor.

250 gr. (dous paquetes) de mozzarella

Dúas latas de tomates triturados

100 gr de queixo parmesán relado

1 cebola grande

4 ou 5 culleres de aceite de oliva

1 culleriña de azucre

Fariña

Tomiño

Aceite de xirasol para fritir

Sal e pementa negra moída

  1. Cortamos a cebola ben picada e sofritimola na tixola co aceite de oliva ata que comece a dourar.
  2. Engadimos os tomates triturados, un belisco de sal, o azucre e un pouco de pementa. Remexemos ben e deixamos cocer a lume medio 15 ou 20 minutos.
  3. Prequecemos o forno a 200º.
  4. Botar fariña nun prato fondo e pasar as rodas de cabaza por ela, sacundíndoas despois para que só quede unha capa fina.
  5. Quecemos o aceite de xirasol nunha tixola grande e fritimos a cabaza ata que comece a estar marrón (ollo, non negra). Retirámolas a un prato con papel absorbente e botámoslles un chisco de sal por riba.
  6. Untamos unha fonte para forno cunha culler de aceite de oliva. Nela colocamos a metade das rodas de cabaza, e botamos a metade do mollo de tomate.
  7. Estendemos a metade da mozzarella en láminas, engadindo tomiño por riba e un pouco do queixo parmesán relado. Repetimos a operación.
  8. Cocemos no forno durante 20 minutos, e servimos ben quente.

Que aproveite!


Patacas Hasselback con queixo do país e touciño

Estas patacas asadas teñen a súa orixe nun restaurante de Estocolmo, o Hasselback, nos anos 40. De Suecia saltaron a todo o mundo e hoxe en día é unha receita moi popular. As patacas quedan cunha textura similar ao fritilas, pero no forno, e a cantidade de ingredientes que aditen é amplísima, porque as patacas, coma o negro, van con todo.

Podedes meterlles difrenetes queixos, sobrasada e mel, ou siplemente aceite e follas de loureiro, han quedar riquísimas!

Ingredientes (para 4 entrantes, ou dos pratos)

4 patacas ben grandes

100 gr de queixo do país

60 gr. de touciño entrefebrado

Aceite ao gusto

Sal e pementa

  1. Prequecemos o forno a 200º, con calor arriba e abaixo.
  2. Lavamos as patacas e facémoslles fendas cada 0,3-0,5 cm. Para non chegar ao fondo, podedes apoialas no mesado e colocarle dous pauciños (dos de restaurante chinés) ao lados para que fagan de tope.
  3. Botamos un pouco de aceite de oliva entre as fendas e colocamos anaquiños de touciño no medio.
  4. Cocemos no forno durante 45 minutos.
  5. Colocamos o queixo nas fendas, quecemos 10-15 minutos máis con calor só por riba.
  6. Servimos quentiñas :P

Que aproveite!

patacas_hasselback


Polo asado á laranxa

Unha variante do clásico polo con limón, esta receita é súper doada de facer, un triunfo asegurado! Eu fíxena con contracoxas, porque son unha das partes con máis graxa do polo, van xenial para asar e sacar mollo ;)

Se vos gustan as receitas con carne de polo, podedes probar esta con soia, estes filetes ao mel, ou este guiso con olivas negras.

Se pola contra sodes máis de laranxa, recoméndovos esta torta con laranxa picada, ou unha sopa fría con laranxa e kiwi.

Ingredientes (para 4 racións):

4 contracoxas de polo

1 laranxa

Media cebola

6 culleres de aceite de oliva

Sal e tomiño

  1. Prequentamos o forno a 170º
  2. Pelamos e cortamos a cebola en rodas finas.
  3. Botamos tres culleres de aceite nunha fonte grande, de despois colocamos a cebola facendo unha capa uniforme, botamos un pouco de sal e tomiño por riba.
  4. Cortamos catro rodas da laranxa, aproximadamente dun centímetro de grosor. Co anaco que sobre facemos zume e botámolo na fonte.
  5. Repartimos as contracoxas na fonte, botamos un chisco máis de sal e tomiño e colocámoslle as rodas de laranxa por riba. Rematamos botando o aceite restante. (A graxa da carne ha de axudar tamén a facer o mollo).
  6. Cocemos no forno 30 ou 40 minutos, a altura media, ata que a pel do polo estea ben dourada. Servimos con patacas -cocidas ou fritidas- ou cun arroz branco.

Que aproveite!

polo-laranxa-3 polo-laranxa-2


Empanada rápida de bonito

O de rápida é un dicir, porque unha empanada rápida-rápida non pode ser, pero aquí tendes unha versión máis sinxela para facer na casa, en máis ou menos media hora (sen contar o forno).

A receita para a masa está sacada do libro Cocina gallega de Álvaro Cunqueiro e Araceli Iglesias (igual cas vieiras ao forno, boísimas!) e ao non levaren fermento, fai un efecto máis de enchenta cando a comes, aparte de ter unha textura un pouco máis areosa. O tema do recheo vai a gusto de cada un, a min gustame con moito, hai xente que as prefire máis finiñas.

O tema da zaragallada: eu comprei unha lata da cooperativa O rosal nunha tenda da Guarda, sei que teñen bastante distribición, así que penso que estará dispoñible nos supermercados habituais. Se queredes facela vós, só tendes que sofritir unha cebola a lume medio, engadir un pemento verde e un tomate cortados, deixándoos no lume ata que queden brandos.

Ingredientes (para unha empanada de 6-8 racións)

1 vaso pequeno de viño branco

1 vaso pequeno de aceite de oliva

1 vaso pequeno de leite gordo (enteiro)

Unha culleriña rasa de sal

Fariña de trigo: non hai medidas, a que colla a masa

1 ovo para a cobertura

Para o recheo:

Unha lata de zaragallada

350 gr. de bonito en conserva

Ovo cocido relado (opcional)

Sal e pementa

  1. Quentamos a zaragallada nunha tixola, engadimos o atún, o sal e a pementa. Quecemos 10 minutos, para que se mesturen os sabores.prep3
  2. Nunha pota botamos o viño, o aceite, o sal e o leite. Quecemos ata que estea a punto de ferver e retiramos. Vai ter un aspecto como de que o leite cortou, non pasa nada mentres non cheire mal.
  3. Deixamos arrefriar e tamizamos a fariña pouco a pouco na pota. Imos remexendo cunha culler mentres engadimos a fariña. Cando teña unha textura flexible e se despegue das paredes da pota, está lista. Se vos pasastes coa fariña, podedes engadir un pouco de líquido do rustrido do paso 1 e seguir remexendo. Velaiquí unha foto da masa lista
    prep2
  4. Amasamos brevemente coas mans e facemos unha bola coa masa. Partímola en dous, deixando unha parte algo máis grande ca outra.
  5. Prequentamos o forno a 180º, nos dous lados.
  6. Estendemos a parte grande sobre papel de forno. Dámoslle forma ata que estea rectangular. Colocamos sobre a bandexa do forno.
  7. Repartimos o recheo uniformemente, deixando unha marxe de 3 cm. polas beiras.
  8. Estendemos a parte de enriba (é máis doado sobre un papel de forno) e colocámola por riba do rustrido. Facemos un burato no medio e dobramos a parte de abaixo cara arriba para pechar ben a empanada. Se sobra masa, podedes facer unhas tiras para decorar.
  9. Batimos o ovo cunhas pingas de auga e barnizamos a empanada cun pincel.prep4
  10. Cocemos no forno á altura media durante 30-40 minutos, ou ata que estea ben dourada.

Fixestes algunha vez empanada caseira? Como foi o resultado?

Empanada rápida de bonito e ovoEmpanada rápida de bonito e ovo

 

 


Coca de cabaciña con salchichas e pementos

Se, como di aquel, unha pizza é unha empanada mal feita, a coca sería unha versión aínda peor :D En realidade é moi semellante á pizza, só que non adoita levar queixo e a masa é un pouco distinta: ao principio as cocas eran o xeito de aproveitar a masa do pan que non levedara. O nome "coca" vén de la palabra kok do neerlandés, e ten o mesmo raigame que os cake inglés ou o kuchen alemán. Son típicas de Baleares, Cataluña e o Rosellón, e poden facerse doces ou salgadas.

Como o que eu quería era algo rápido, fixen un chisco de trampa e usei masa de follado xa feita. Para que non soba moito hai que pinchala cun garfo varias veces. Tamén podedes usar masa tipo brisa, ou facela vós segundo esta receita en vídeo. Respecto ás salchichas, eu usei as tipo nuremberger, que son as que máis me gustan, pero valen de calquera tipo.

Ingredientes para unha coca de 28 cm. de diámetro aprox)

Un paquete de masa de follado redonda

1 cabaciña grande

150 gr. de pementos de piquillo

4 salchichas pequenas cortadas en rodas

Aceite de oliva ao gusto

Sal e pementa

  1. Sacamos a masa da neveira e deixámola repousar 5 minutos. Pinchámola varias veces co garfo.
  2. Prequentamos o forno a 180º
  3. Quitámoslle a tona á cabaciña cun pelador. Eu deixo un pouco porque queda logo máis bonito, pero vai a gustos. Cortámola ao longo pola metade.
  4. Facemos lonchas finiñas (2-3 milímetros) ao longo co mesmo pelador. Pódese facer cun coitelo, pero leva máis tempo.prep1
  5. Botámos un pouco de aceite de oliva encima da masa, estendémolo cunha espátula ou culler.
  6. Engadimos a cabaciña, as salchichas e os pementos cortados en anacos finos. Botamos un chisco de aceite por riba, preferentemente en espiral ou facendo zigzag, para repartilo mellor. Engadimos un pouco de sal e pementa.
  7. Cocemos no forno durante 25 minutos ou ata que as beiras douren e as verduras queden brandiñas.

Que aproveite!

coca