Arepas fritidas recheas de lacón e grelos
As arepas son un prato moi popular en Colombia, Panamá e Venezuela, o típico prato que causa infinidade de leas sobre cal é a máis aunténtica, cal está máis rica, etc. :D Pódense facer de catro xeitos: asadas, á grella, fervidas ou fritidas. Son moi doadas de facer, e pódense gardar dun día para outro.
Co gallo do amistoso da selección galega de fútbol contra Venezuela, aproveitamos para facer unha mestura de receitas das que me gustan a mín, coma os arancinis de lacón, ou a pizza de queixo Cebreiro. Para facer as arepas utlicei a fariña PAN amarela, moi doada de atopar nos supermercados (e que serve tamén para rebozar filetes, con fantásticos e crocantes resultados!) e para que fosen máis cremosas, boteille queixo en crema San Simón, que podedes substituir por calquera queixo cremoso graxo, tipo Camembert. A cantidade vai ao gusto de cada un.
Ingredientes (para 8 arepas, aproximadamente)
180 de fariña de millo PAN
250 ml de auga morna
1 culleriña rasa de sal
Aceite de xirasol para fritir
Para o recheo
200 gr. de lascas de lacón
150 gr. de grelos en conserva
Queixo San Simón (ou outra variedade) en crema
- Nun bol ou cunca grande mesturamos a fariña, a auga e o sal. Remexemos cas mans ata formaren unha pasta da consitencia da plastilina. OLLO: esta fariña tarda un pouco en absorber a auga, ide botándoa aos poucos, para asegurar que quede ca consistencia correcta. Pode ser que teñades que engadir un chisco de auga ou de fariña, o caso é que non se peque nas mans e non esfarele. Deixamos repousar 5 minutos.
- Quecemos o aceite nunha tixola grande, que chegue ata un pouco máis arriba da metade, para que cubra as arepas.
- Facemos cas mans bólas do tamaño de 4 cm de diámetro, aproximadamente.
- Aplastámolas cas mans ata formar unha torta de 8 -10 cm. de diámetro e 1,5 cm. de grosor, pinchámolas no medio cunha agulla de calcelar ou un coitelo afiado. O burato ten que atravesar a arepa, para que pase o aceite.
- Frímolas na tixola dándolle voltas ata que queden ben douradas. Retíramolas nun prato con panos de papal para que solten o exceso de graxa e deixamos arrefriar durante 10- 15 min. OLLO: saen moi quentes.
- Abrímolas pola metade e enchémolas co queixo en crema, grelos e lacón.
Que aproveite!
Quiche de brócoli, lacón e cebola seca
É a segunda vez que publico unha quiche, pero esta saiu tan boa que hei poñer máis proximamente :) Esta quiche combina o brócoli co lacón (o de fiambre, no o do cocido) e a cebola seca precociñada, un dous meus últimos descobrimentos, que xa empreguei para facer unha lasaña rápida de grelos.
Se o que vos gusta é o brócoli, podeedes probar esta pizza, e se queredes máis ideas para facer con lacón, botádelle un ollo a este psicodeliciosos arancinis con lacón e queixo.
Un consello: a quiche sairá do forno con moita humidade, porén estará moi fráxil. Deixádea enfriar polo menos 30 minutos antes de cortala, senón ha romper e esparexer polos lados. Pódese comer quente ou fría.
Ingredientes (para 4-6 racións)
Un paquete de "masa brisa"
Un brócoli pequeno (ou medio grande)
150 gr. de lacón cortado
2 ovos
200 ml. de nata de 35% MG
100 ml. de leite gordo (enteiro)
Unha présa de cebola seca
Media culleriña de sal e un chisco de noz moscada
- Cortamos as pólas do brócoli e cocémolas en auga fervendo durante 3 ou 4 minutos. Quitámoslle a auga e deixamos arrefriar.
- Prequecemos o forno a 180º.
- Colocamos papel de forno molde redondo e desmontable. Colocamos a masa brisa no centro e pegamos as beiras cos dedos nas paredes do molde. Pinchamos varias veces cun garfo o centro da masa, para que non soba.
- Cortamos o lacón e o brócoli en anacos pequenos. Mesturamos e despois esparexémolos pola masa brisa, tendo conta de que non queden ocos grandes.
- Nun bol mesturamos a nata, o leite, os ovos, o sal e máis a noz moscada, batemos a man un par de minutos. Vertemos a mestura na masa brisa, ten que de tapar un chisco a coliflor e mailo brócoli.
- Botamos a cebola seca por riba e cocemos no forno durante 30 minutos, ou ata que as beiras estean ben douradas.
Que aproveite!
Arancinis de lacón e queixo
Os arancini son unha receita típica de Italia que, igual que as croquetas, serve para aproveitar as sobras do risotto. Chamánse así porque asemellan pequenas laranxas, o tamaño e forma varía nas diferentes rexións italianas: en Sicilia son máis grandes e picudos, mentres que na península son pequeniños. Este é o tamaño que imos usar nesta receita, porque é máis doado fritilos así.
O recheo pode variar, se por algunha razón estrañísima non vos gusta o lacón e o queixo, podedes probar chícharos, espinacas, carne picada, etc. A miña receita é unha variación desta, que leva cordeiro.
Ingredientes
25 gr. de manteiga
200 gr de arroz redondo
600ml de caldo de polo
1 culler e media de aceite de oliva
1 cebola grande, cortada en anacos moi pequenos
2 dentes de allo, pelados e esmagados
150 gramos de lacón cocido
100 gr de queixo brie, de Arzúa, calquera que sexa suave
2 ovos batidos
100gr de pan raiado
50gr de fariña, para rebozar
1 culler de tomiño
Sal e pementa
Aceite de xirasol, para fritir
- Derretir a manteiga nunha tixola. Botar o arroz, e cano quente, engadir 100ml de caldo. Ferver durante dous minutos ata que o arroz absorva o caldo e repetir a operación ata acabar o líquido (leva aproximadamente 40 minutos). Reservar.
- Quentar o aceite de oliva noutra tixola grande, botar a cebola e o allo e remexer. Cando a mestura estea branda, engadir o lacón co sal e a pementa e douralo.
- Quitar a meirande parte do aceite e verter o arroz do paso 1, xunto co tomiño, o queixo en dadiños e un chisco máis de pementa. Remexer cun pau e facer bolas cas mans, de aproximadamente 50 gramos cada unidade.
- Colocar a fariña, os ovos e o pan raiado en diferentes pratos. Rebozar primeiro coa fariña, logo cos ovos e finalmente co pan.
- Nunha tixola botar aceite de xirasol ata que haxa 0,5 cm de profudidade. Cando estea quente (facede a proba botando unha miguiña, debería dourar en 30-40 segundos) fritir as bolas tendo coidado que se se fagan por todos os lados.
- Colocar nun plato con papel de cociña por debaixo, para que chunche a graxa sobrante. Se os comedes de seguido estarán máis crocantes, pero se os deixades para o día seguinte, terán máis sabor ;)
