Cinco alimentos que fai avío conxelar
Despois dos consellos para cocer a pasta, os de como facer o bechamel, e o que se pode facer cun limón...chegan uns consellos para conxelar comida! O conxelador é un electrodoméstico un pouco infravalorado (polo menos nas zonas urbanas, penso eu) pero cun pouco de xeito podeselle sacar partido para conservar máis cousas que carne ou peixe. Tende en conta que o que sae do conxelador nunca vai estar mellor que cando entrou, así que planificade un pouco e metede sempre cousas frescas e/ou en bo estado. O reseso é mellor tiralo ;)
- Froita: o sabor da froita non cambia, pero a textura si, así que o mellor é pelala, quitarlle as pébedas e gardala cortada, para facer batidos ou sobremesas con ela. Os froitos vermellos son especialmente agradecidos para conxelar, así que aproveitade o verán para teramoras, framboesas e arandos durante todo o ano!
- Verduras: Pasa o mesmo que ca froita, o mellor é gardalas lavadas e cortadas, ou xa cociñadas. Non se deben conxelar verduras que se han consumir crúas, como a leituga ou cenouras, xa que a súa textura non terá nada que ver ca crúa.
- Herbas aromáticas: un truco súper doado e práctico é facer unha mestura cas herbas que queiramos conservar e aceite de oliva. Batemos todo ata ter unha especie de "pesto" e gardámolo na bandexa dos cubiños. Así teremos porcións de herbas pequenas para irlle botando aos guisos!
- Nata batida: ha de estar batida antes de conxelar, do contrario arriscámonos a que se corte durante o desconxelado. Se sobra de facer unha sobremesa, gardade chisco para guarnición de larpeiradas futuras. PD: a manteiga tamén se pode conxelar para usar logo.
- Pan: sempre é boa idea conxelar nas porcións que se van utilizar logo. No caso do pan, a mellor idea e gardar as rebandas separadas por un film transparente e ilas desconxelando na torradeira ou sanduicheira. O pan de molde non aguanta moi ben por mor da textura, así que mellor é pedir unha bola e que vola corten na panadería.
Que cousas máis conxelades? Contádeo nos comentarios!
Xeado de iogur natural
Vai chegando a calor e con ela as ganas de facer larpeiradas frías. A desta semana é súper doada de facer: xa sei que digo isto a cotío pero desta vez é moi certo! Co que custa un frozen yoghurt dos que venden nos centros comerciais sae unha sobremesa para 5 ou 6.
Se preferides o xeado máis tradicional, podédeslle botar un ollo a este de vainilla e queixo Philadelphia, a este de cereixas e chocolate negro, ou a este de lima e alfábega, moi refrescante!
Ingredientes (para 600ml de iogur)
3 iogures naturais (non desnatados)
1 iogur grego
50 gr. de azucre
50 gr. de azucre de caña (pódese cambiar polo normal)
Zume de medio limón
Un belisco de sal
- Nun bol grandeiro, mesturar os iogures e o azucre ata que este disolva. Despois engadimos o zume e mailo sal:. Non vos preocupedes pola acidez: ao conxelaren, os sabores "acougan" e non se notan tanto.
- Metemos a mestura na máquina de facer xeados ata que saia unha textura cosistente. Normalmente tarda 45 min-1 hora, consultade as instruccións do fabricante. Se non tendes máquina, botade a mestura nun tupper pouco fondo e metédeo no conxelador. Despois dunha hora, remexede cunha culler de pau, así ata 3 ou 4 veces, para que a masa non cristalice.
- Cocolámolo nunha cunca 10 ou 15 minutos antes de servir, acompañado de marmelada ou confitura de froitos vermellos.
Que aproveite!!
Cinco trucos para facer bechamel
O bechamel é orixinario do norte de Italia, pero popularizouse polo mundo a través da cociña francesa. O seu nome ven dun señor chamado Louis de Bechamel, a quen un cociñeiro adicoulle este mollo para honralo, e así quedou o nome. Tamén é coñecido nanlgúns lugares coma mollo branco. A súa preparación é doada: quentar aceite ou manteiga, botar fariña, remexer, botar leite e condimentos, e volver remexer. O que require é moita atención para que non se estrague no proceso.
É a base de moitos outros mollos, e resulta moi útil para gratinar cousas ao forno, ou para rebaixar a intensidade do sabor dalgúns ingredientes. A cremosidade dependerá da cantidade de fariña que lle botedes, neste exemplo quedou unha consistencia media, coma para facer lasaña. Imos aló cos trucos!
- O bechamel pódese facer con aceite de oliva, manteiga, ou cunha mestura dos dous. O sabor do aceite de oliva será un pouco máis forte co da manteiga, a consistencia dependerá principalmente da cantidade de fariña que lle botemos. Tende conta coa cantidade de aceite (ou manteiga) co que comezades. Para un mollo de consistencia media, eu comecei botando 100 ml. de aceite e acabei con case 700 ml. de mollo.
- Se ides facer croquetas, botade máis cantidade de fariña e se queredes poñelo nunha xerriña para verter nalgures, botade algo menos. Tende en conta que ao arrefriar, aínda que sexa un pouco, ha espesar.
- Para que saia sen grumos, é recomendable tamizar a fariña cun escoador. Se coce un pouco no aceite, é normal, o que hai que evitar é que se poña marrón. Outra cousa boa para evitar o temidos grumos, é quentar o leite antes de botalo.
- Para que quede ben, hai que ir baixando o lume no proceso. Comezamos co lume alto para quentar o aceite, baixámolo ao engadir a fariña e botamos leite aos poucos, sempre remexendo. Cando xa estea o leite mesturado, podemos apagalo e seguir remexendo un pouco para que siga a espesar. O normal é tardar uns 15 ou 20 minutos en facer o bechamel.
- O sal bótase ao final, xunto cas especias: vaille moi ben a noz moscada e a pementa negra.
Crema de ovo
A receita de hoxe é un clásico en moitos fogares e restaurantes de España: a medio camiño entre a crema pasteleira e o flan, a crema de ovo (coñecida pola maioría da xente coma natillas) é unha sobremesa moi saborosa e dixestiva, aporta moitas calorías para estes días de inverno e o ingredientes son ben doados de atopar ;)
Podedes cambiar as ramas de vainilla por unha de canela, e experimentar ca decoración: no canto de galletas eu usei biscoitos saboianos (ou de soletilla) pero teño pendente probar con cacao en po, noces moídas... e se tivese un soprete, tería feito crema catalá! Pero iso queda xa para outra vez...
Ingredientes (para 8 racións)
800 ml. de leite enteiro
8 xemas de ovo
300 gr. de azucre
3 culleres de Maizena
2 ramas de vainilla
Un belisco de sal
Canela e galletas para decorar
- Botamos o leite cas ramas de vainilla nunha pota. Quecemos ata ferver e retiramos do lume e deixamos arrefriar.
- Nunha pota máis grande batemos as xemas de ovo, a Maizena, o sal e o azucre ata facer unha pasta. Poñemola a cocer a lume medio.
- Retiramos as ramas de vainilla e botamos o leite a modiño na pota do paso dous, sen deixar de remexer.
- Cando a crema acade unha textura espesa, apagamos o lume e deixamos repousar un par de minutos.
- Colocamos a crema nos recipientes e deixamos arrefriar a temperatura ambiente.
- Servimos os vasos (ou cuncas) decorados con canela en po e unha galleta.
Xeado de cheesecake
Eu sigo aproveitando a xeadeira que comprei hai unhas semanas para faceren sabores "raros" que non se atopan por aí. Neste caso é un xeado feito a base de queixo crema (coma o Philadelphia), vainilla, ovo e anacos de galletas Dixestive. É unha adaptación dunha receita de Nigella Lawson: podédela ler aquí, xunto con máis suxerencias para os xeados....boísimos!
Os xeados conteñen diferentes cantidades de graxa segundo os ingredientes que conteñan, e iso condiciona a sensación de frío ou calor que transmeten. Isto vén ao conto porque neste caso ten bastante graxa, que o fai lene e "cálido" polo que o podedes facer tamén en inverno, para despois de comer ;)
Ingredientes (para 6-8 racións)
350 ml. de nata para bater
175 ml de leite gordo
125 gr de queixo en crema
200 gr de azucre, mellor se é glas
1 ovo
2 ramas de vainilla (ou unha culleriña de extracto)
Zume de medio limón
6-8 galletas "Digestive" ou de avea, o caso é que esfarelen
- Quentamos o leite nunha tixola e poñemos a vainilla para que infusione durante 5 minutos, sen que chegue a ferver. Se usamos extracto, mesturámolo co leite.
- Engadimos o queixo en crema, e o azucre, remexendo. o lume non pode estar moi alto.
- Batemos o ovo e engadímolo á tixola, mesturando todo. Apagamos o lume e deixamos enfriar.
- Batemos a nata nun bol grande, ata que quede consistente.
- Vertemos o contido da tixola no bol, a modiño para que non baixe. Engadimos o zume de limón e remexemos un pouco a man.
- Deixamos enfriar no frigorífico.
- Se temos xeadeira, seguimos as instruccións do fabricante. Se non, metede o bol no conxelador e sacádeo para remexer a man cada 30 minutos, unhas 4 ou 5 veces. Isto evitará que o xeado cristalice e quede duro.
- Para usar as galletas hai dúas opcións: podédelas esmagar e engadir á crema do xeado, ou podedes facer "cortes" co xeado no medio de dúas galletas. Nas fotos distínguense as dúas versións.
Que aproveite!
