As mellores madalenas?

Idesme perdoar o titular pouco específico, pero de todas as receitas de madalenas que fixen, estas son as que máis me gustan: de sabor e de textura, son marabillosas! Ademáis teñen a vantaxe de que non hai que bater moito nin repousar a masa no frigorífico.

A receita e unha adaptación dunha que vin no Instagram de Aliter dulcia, un obradoiro de Xixón que ten moitas e moi boas receitas. Eu usei metade de fariña de millo, pero podedes cambiala por arroz ou castaña, ou facelo todo con fariña triga, como máis vos guste.

Ingredientes (para 24 unidades)

360 ml. de aceite de oliva virxe extra

300 gramos de azucre, máis un chisco para a cobertura

6 ovos

175 gr de fariña de trigo

175 de fariña de millo

13 gr de fermento químico

Un belisco de sal

Un chisco de canela ou noz moscada

Reladura dun limón (opcional)

Utensilios: batedora de variñas, cápsulas de papel, moldes de madalenas (de silicona ou de metal).

  1. Prequecemos o forno a 225º, arriba e abaixo.
  2. Bater os ovos co azucre a man. Non queremos que a mestura creza, con que estea ben homoxenea vale.
  3. Engadir o aceite de oliva e seguir batendo, despois botamos a fariña o fermento, o sal, a canela e a reladura de limón. Neste punto eu usei a batedora electrica cas variñas a velocidade mínima, porque é moi cansado bater tanto tempo a man.
  4. Encher as cápsulas de papel a unha altura de 3/4. Esparexer un pouco de azucre por riba ata facer unha costra finiña.
  5. Cocer no forno a media altura ata que a costra rompa e estean ben douradas. Levará uns 10 ou 15 minutos, dependendo do forno. É importante non abrilo, porque interrumpiría a "subida" das madalenas.
  6. Sacamos as madalenas e deixámolas arrefriar nunha bandexa de rexas, gardámolas nun recipiente hermético, estarán boas 3 ou 4 días, despois comenzar a secar.

Que aproveite!

 


Madalenas de castaña e vainilla

Agora que vai tanto frío apetece quedar na casa e que mellor plan que facer unhas madalenas que sirvan de agasallo ou que solucionen uns cantos almorzos. Como presta comelas con café quentiño! Esta receita é moi doada, tanto que a podedes facer con nenos, seguro que se divirten fozando cos moldes de papel e o azucre :)

Se queredes ver máis receitas de madalenas, visitade a de madalenas con nata e noces, a de madalenas de chocolate, ou estas ben saudabeis de plátano e avea.

Ingredientes (para 14 madalenas, aprox.)

110 gr. de fariña de castañas

100 gr. de fariña de trigo

170 ml. de aceite de xirasol

100 gr de azucre normal

75 gr de azucre avainillado

60 ml. de leite (mellor se é gordo)

2 ovos

9 gr. de fermento químico

Un belisco de sal

Un chisco de azucre, avanillado ou non, para botar por riba

Utensilios:

Batedora de variñas

Moldes de papel para madalenas.

Moldes ou bandexa para madalenas

  1. Nun bol grandeiro botamos os ovos e o azucre, batemos ca batedora ata que aclare e teña unha textura esponxosa.
  2. Engadimos o leite, seguimos batendo.
  3. Engadimos o aceite aos poucos, mentres continuamos a bater.
  4. Nun prato fondo mesturamos as fariñas, o fermento e o sal, mesturamos cunha culler.
  5. Imos engadindo a mestura "sólida" á líquida mentres batemos, tendo conta de que non queden grumos.
  6. Tapamos cun film transparente e deixamos no frigorífico unha hora.
  7. Prequecemos o forno a 150º, por riba e por baixo.
  8. Colocamos os moldes de papel dentro dos de silicona (ou de metal, os que teñades) e enchémolos ata os 3/4, deixando marxe para que a masa suba. Esparexemos un chisco de azucre en cada madalena, formando una capa moi fina, para que logo quede crocante.
  9. Deixámolas cocer no forno durante 15 minutos, vixiando que non se pasen.
  10. Deixamolas arrefriar no mesado, e cando estean frías gardámolas nun tupperware ou nunha bandexa tapada cunha rolla.

Que aproveite!

 


Madalenas de plátano, avea e manteiga de cacaué

Voltamos ás madalenas, desta vez cunha receita moi orixinal a base de plátano e avea: son aptas para celíacos e tamén para vegan@s! Además, ao non levaren case azucre, son un almorzo moi san e completo, desde que enchen para toda a mañá!

OLLO: non saben moi doces, así que se queredes darlle máis sabor podedes botarlle agún condimento (eu usei granola con canela). Se queredes facer máis madalenas, tendes unha receita de nata e noces, e outra máis clásicas coma estas de chocolate.

Ingredientes (para 7 ou 8 madalenas)

225 gr. de flocos de avea

2 plátanos ben maduros

180 ml. de leite de avea

60 gr. de manteiga de cacaué

Un chisco de azucre de caña

Unha culleriña e media de bicarbonato sódico

Un belisco de sal

Chips de chocolate, noces, granola... (opcional)

  1. Prequecemos o forno a 170º.
  2. Picamos a avea na trituradora, ata que quede como unha fariña. Retíramola a un bol, mesturándoa co sal e o bicarbonato.
  3. Rompemos o plátano en anacos e metémolo na trituradora ca manteiga e o leite de avea. Batemos ata obtermos unha textura homoxenea.
  4. Mesturamos todo no bol e engadimos o "complemento opcional"  que queiramos.
  5. Botamos o azucre por riba e cocemos no forno durante 20 minutos, ou ata que estean ben douradas pola parte de arriba. Para saber se están feitas por dentro, podemos pinchalas cunha agulla de calceta, se sae seca é que está lista.
  6. Deixamos arrefríar e gardamos nun tupper hermético.

Que aproveite!

madalena_avea_platano_3

madalena_avea_platano


Madalenas de chocolate

Esta semana traemos un doce ben doado e sabedeiro: madalenas de chocolate! É tan fácil de facer que ata o podedes facer cos cativos, que de seguro han disfrutar co proceso.

A outra vez que fixen madalenas empreguei só moldes de silicona pero como estas eran para levar, comprei uns de papel e metinos nos de silicona, para que non cedesen. Se non tendes moldes de silicona para agunatar os de papel, podedes empregar uns de flan de usar e tirar que venden nalgunhas ferreterías, coma estes. O azucre avainillado véndese na sección de especias, o Froiz ten incluso marca propia, moi barata.

Se sodes chocolateiros, botádelle un ollo a esta torta de mousse de chocolate, ou a este queique de plátano, chocolate e noces.

Ingredientes:

2 ovos

90 gr. de azucre avainillado

80 gr. de fariña

50 gr. de cacao en po

100 ml de aceite de xirasol

40 ml. de leite gordo (enteiro)

1/2 sobre de fermento químico

Un belisco de sal

Un pouco de azucre glass, para decoraren

  1. Nun bol grande, batemos os ovos co azucre ata que saia unha pasta homoxénea.
  2. Engadimos o aceite e o leite, continuamos a bater.
  3. Nun prato fondo, mesturamos a fariña, o cacao, a levadura e mailo sal. Engadimos a modiño á mestura do paso 2, mentres batemos.
  4. Deixamos repousar o bol no frigorífico durante unha hora, tapado cun film ou papel de prata.
  5. Prequecemos o forno a 210º.
  6. Enchemos os recipientes de papel (ou de silicona) ata os 3/4, senón han rebosar.
  7. Metémolas no forno 10 minutos, colocando a bandexa na segunda fenda do  forno por abaixo. Cando a masa soba,  baixamos a temperatura a 180º e cocémolas 5 ou 10 máis na terceira fenda por baixo (a 2ª por riba) para que queden ben feitas. É un proceso delicado, o mellor é agardar xunto ao forno cunha agulla de calcetar, e comprobar que se fixeron ben pinchando nelas: se a agulla sae seca, é que xa están.
  8. Deixamos arrefriar e decoramos co azucre glas.

Que aproveite!

master3

madalena1

 

 


Madalenas de nata e noces

Un almorzo ou merenda ben calórico para estes días de frío. Non se me ocorre que dicir para presentalas, se as facedes, o sabor fala por sí mesmo! Só engadir un par de anotacións:

  • Con esta receita as madalenas non van subir como as que están feitas con aceite de oliva.
  • Ás veces recomendo cousas que me gustan moito (por gusto, non é que cobre de ninguén!) e desta vez son os moldes de silicona. Ao principio dábanme grima porque pensaba que non aguantarían ben, pero resisten todo, incluído o lavalouza.

Ingredientes (para 15 madalenas, aproximadamente):

3 ovos

225 gr. de fariña

125 de azucre de caña

200 ml. de nata de montar (35% MG)

1/2 sobre de lévedo químico

100 gr de noces

Un chisco de sal

Moldes de silicona; ou moldes de papel+unha bandexa par madalenas

 madalenas3

 

 

 

 

 

  1. Nun bol grande, batemos ben os ovos para que collan aire.
  2. Engadimos o azucre e seguimos batendo.
  3. Repetimos o proceso coa nata e coa fariña e o lévedo.
  4. Deixamos reposar a masa no frigorífico durante 20-30 minutos. O contraste entre o frío e a calor do forno fara que a masa soba máis.
  5. Prequentamos o forno a 170º, enchemos os molde masa ata a metade: tede conta con isto, que se vos pasades desbordan.
  6. Cocemos as madalenas no forno durante 15 minutos. Recoméndovos poñer a bandexa no medio, para que non queimen por riba. Cando estean redondiñas pola parte de arriba e esta estea dourada, sacámolas e deixámolas repousar. O tempo de cocción é orientativo, varía dependendo do forno, prestádelle atención por se acaso: se o deixades demáis (aínda que non queimen), baixa a masa e non quedan tan boas.

madalenas2

Fixestes madalenas na casa? Como foi  experiencia? Contádeo nos comentarios, ou no Twitter