Risotto de queixo parmesano e viño branco
Este artigo foi publicado orixinalmenteo 22 de xuño de 2013, esta é unha versión corrixida e con novas fotos.
350 gr. de arroz de gran redondo
1 culler de perixel - fresco ou seco
2 culleres de aceite de oliva
1 cebola pequena
100 gr. de manteiga
250 ml. de viño branco
200gr. de queixo parmesano - raiado ou en anacos moi pequenos
1 - 1,2 litros de caldo de verduras ou de polo
- Botar o aceite e a cebola nunha tixola grande, quentalo a lume medio durante cinco minutos, ata que a cebola estea branda e un pouco translúcida. Engadir o arroz e unha culler de manteiga, torrando o arroz 3 ou 4 minutos. Verter o viño e remexer pouco a pouco ata que o arroz absorba o líquido.
- Quentar o caldo nunha pota aparte ou no microondas, e botalo ós poucos na tixola. O mellor é usar un cullerón, enchelo e verter o contido, remexer ata que o arroz absorba o caldo e repetir o proceso ata rematar o líquido. Dependendo da cantidade que utilicedes, debería levar entre 12 e 15 minutos.
- Retirar do lume, engadir o resto da manteiga e o queixo, remexendo ben ata que derreta e estea uniforme.
- Servir nun prato decorándoo co perixel.
Que aproveite!
Cooperativa Campo Capela - Requeixo e moito máis!
A última fin de semana de agosto tiven a oportunidade de asistir á festa do requeixo de A Capela, unha aldea preto das fragas do Eume. Nela repartiron máis de 6000 racións de requeixo da cooperativa local, acompañadas de mel ou azucre: estaba boísimo! Suave e cremoso, as miña tarrina non durou nadiña...
Despois duns días, volvín pasar pola Capela, e din un chamado á fábrica Campo Capela a ver se a podía ir visitar. Dixeron que si a pesaren da pouca antelación e velaiquí está a reportaxe! A súa responsable comercial, Ana Vence, explicou todo o proceso, a gama de productos que elaboran ademáis do requeixo, a vez que sairon nun programa australiano e moitas cousas máis.
As orixes da cooperativa son do ano 1969, comezou coma cooperativa láctea e dende hai nove anos fabrican tamén derivados do leite. O seu produto estrela é o requeixo con leite cru, elaborado sen químicos: o leite chega e pasa aos tanques, onde repousa 24 horas a 22º. Sepárase a nata e lévase o callo do leite a uns sacos de tea, onde explusa o líquido antes de volver mesturarse ca nata para conseguir a textura axeitada. Aquí podedes ver como é o proceso:
Unha das cousas que máis me chamou a atención é a cantidade de soro que bota, e os usos que se lle dan. Na cooperativa colaboran con varios cociñeiros que o usan para mariñar carnes e peixes, e tamñen o envían a un obradoiro de licores de San Clodio (Ourense) para elaborar licor de soro de leite, algo que está na miña lista de cousas a probar!
Ademáis de requeixo, fan queixo de tetilla, o único da denominación feito con leite cru. Hai pouco comezaron a exportar, e o seu queixo xa se pode atopar en tendas especializadas de Inglaterra e Alemaña. Estas son as tarrinas do queixo mentres repousa
Tamén fan queixo "do País", en pezas de entre 500 gr e 25 quilos! e unha variante con anaquiños de chourizo recuberta de pementón. Velaiquí as imaxes:
Aparte de queixo fan tarrinas de nata, manteiga e manteiga cocida (da que se usa para facer as bicas).
Os requeixo da cooperativa pódese mercar no Gadis, en tendas diversas e nos supermercados das cooperativas coruñesas: Santa María do Val, Meirás, etc. O supermercado de El Corte Inglés distribúe toda a gama de produtos, e ás veces fan demostracións e degustacións. Tamén editaron un libro de erceitas con requeixo, e cada verán organizan un concurso de cociña con pratos doces e salgados.
Ana comentounos que están a piques de renovar e ampliar as instalacións, estou segura de que será todo un éxito. Polo momento xa saíron moitas veces na TV, e é de destacar que o programa australiano Cheese slices, especializado en queixos do mundo, fíxolles unha reportaxe que se emitirá en todo o mundo a través do Discovery Channel. Sairá este outono, estaremos pendentes para poder velo por Internet!
Cheesecake de queixo de cabra e iogur grego
Hai tempo que quería probar a facer unha torta de queixo estilo americano na casa, pero querría probar algo un chisco distinto, así que fixen unha adaptación desta, pero engadindolle noces á base (idea que penso repetir, queda moito máis rica) e cambiando as galletas de vainilla polas de avea para que non quede tan doce. A verdade é que estou moi satisfeita co resultado: semella levar máis traballo, pero en 20 -30 minutos máis o tempo de cocción está lista, un triunfo asegurado!
Unha receita axeitada para aqueles que non moi larpeiros (hai xente para todo!), xa que se a tomades sen mel ten un regusto salgado moi agradable. Agora que comeza o bo tempo é moi boa idea levala coma sobremesa dun picnic ;)
Ingredientes (para un molde de 25 cm de diámetro) :
360 gr. (dous paquetes) de queixo rulo de cabra
125 gr. de queixo para untar
1 iogur grego
2 ovos
75 gr. de azucre
Para a base
20 galletas de avea tipo "Digestive"
80 gr. de manteiga
Unha presa de noces peladas e picadas
Nota: esta torta é mellor facela nun molde desmontable.
- Esmagamos as galletas, derretemos a manteiga e triturámolo todo xunto cas noces ata formaren unha pasta homoxénea. Se vedes que queda moi seca, engadide unhas pingas de auga para que estenda mellor.
- Prequentamos o forno a 180º.
- Quitámoslle a codia aos rulos de cabra e cortámolos en rodas de 2-3 cm.
- Metemos as rodas nun bol xunto co queixo para untar e quentámolos no microondas a potencia media para que abranden.
- No bol dos queixos botamos o azucre e batemos ca batedora. Cando estea ben mesturando engadimos os ovos, un de cada vez.
- Colocamos papel de forno no molde desmontable. Estendemos a pasta base esmagándoa ben cunha culler.
- Vertemos a pasta de queixo a modiño, alisamos a superficie para que non quede burbullas.
- Cocemos a torta no forno durante 45 aproximadamente. Se vos gusta cremosa, sacádea antes: aínda que o centro estea líquido callará pouco a pouco. Se vos gusta más compacta, deixadea ata que saian manchas na superficie, como fixen eu.
- Deixamos repousar 6 horas, coma mínimo.
- Decoramos con mel e servimos.
Que aproveite!
Cous cous con polo e verduras
Cando comecei a cociñar máis "en serio" o que facía era apuntar unha receita, comprar tódolos ingredientes e facela. Ao final sempre sobraba algo e co tempo aprendín a improvisar receitas con ingredientes soltos, que resulta moito máis proveitoso.
Esta receita xurdiu para aproveitar carne de polo e un tomate, ao que lle engadín porro cortado, e tamén patacas fritidas para un efecto döner kebab :D A verdade é que é unha receita moi fácil e queda moi boa.
En Marrocos o xeito tradicional de presentar o cous cous é facendo unha piramide e colocando o resto do prato arredor. Probei a moldealo cun molde de repostería de silicona, de aí que lle quedasen eses furaquiños. Tamén se pode facer media esfera cunha cunca grande, igual que o arroz tapado.
Ingredientes (para dúas racións)
250 gr. de cous cous
250 ml. de caldo de polo
1 filete grande de peituga de polo
1 porro
1 tomate pequeno
1 pataca pequena
1 culler de manteiga
Un chisco de aneto
3 culleres de aceite de oliva
Sal e pementa
- Poñemos a unha tixola ao lume cunha culler de aceite de oliva.
- Cortamos o porro en rodas finas e botámolo na tixola. Dourámolo a lume medio. Cortamos o tomate en dados e engadímolo á tixola.
- Pelamos e cortamos a pataca en láminas moi finas. Apartamos a verdura a un lado da tixola, botamos dúas culleres de aceite no outro, e cando estea quente, douramos as patacas (teñen que estar cortadas moi finas).
- Cortamos o polo en anacos pequenos, botámoslle o sal e a pementa e pasámolo pola tixola co resto dos ingredientes. Cando estea cocido, retiramos todo a un prato.
- Sen lavar a tixola (para aproveitar o sabor) poñemos o caldo de polo a ferver. Cando estea, retirámos a tixola do lume e botamos o cous cous ca manteiga e o aneto. Remexemos un chisco e deixamos estar 3 minutos, ata que dobre o seu tamaño.
- Nun bol ou molde facemos una forma co cous cous. Colocámola no centro dun prato e decoramos co rustrido arredor.
Que aproveite!
Scones salgados con queixo e mostaza
Nun principio esta receita ía ser doce, pero como ultimamente xa probamos madalenas e cous-cous doce decidinme por unha versión salgada, ideal para tomar de merenda con pavo ou xamón, ou para acompañar unhas cervexas. Ou as dúas cousas á vez!
Os scones son unha receita orixinaria de Escocia e son moi típicos no Reino Unido como parte do high tea: a merenda cea. Sérvense abertos pola metade e recheos de manteiga e marmelada. Estes son unha adaptación desta receita de Jamie Oliver.
Ingredientes (para 7 ou 8 pezas)
250 gr. de fariña
75 gr. de manteiga fría
1 ovo
2 culleres de leite + 2 para "barnizar"
3 fatias de queixo
1 culleriña ben chea de mostaza en gran
1/4 de culleriña de comiño - opcional
1/2 culleriña de sal
- Prequentamos o forno a 220º
- Cortamos a manteiga en dadiños. Nun bol botamos a fariña e a manteiga e amasamos cas mans ata que semelle pan relado. Non cómpre amasar moito tempo, a manteiga non ten que derretir por completo. Facemos un oco no medio.
- Nun prato fondo batemos o ovo co sal, a mostaza e o comiño.
- Botamos o líquido no oco do paso 1 e remexemos cas mans de novo ata formaren unha masa homoxénea que se despegue facilmente das paredes do bol.
- Botamos un chisco de fariña nun mesado, colocamos a bola de masa e esmagámola para que quede con grosor uniforme de 2- 2,5 cm.
- Preparamos unha bandexa con papel de forno.
- Ca axuda dun vaso sacamos círculos de masa e colocámolos na bandexa ca parte lisa cara arriba.
- Botamos dúas culleres de leite no vaso, e cun pincel (ou cos dedos) barnizamos a parte superior dos scones.
- Cocemos no forno durante 10 minutos, ou ata que estean dourados por riba. Se queredes que queden máis crocantes, deixadeos repousar sen nada, se vos gustan máis tenros, tapádeos cun trapo de algodón nada máis sacar do forno.
Que aproveite!