Sorbete de melón e mel

Chega o verán e con el as noticias da calor que fai! Como non podemos facer moito para cambiar isto, imos botar man dun refrescante sorbete! É a primeira vez que o fago coa máquina xeadeira e a verdade é que o resultado foi moi bo. Se non tendes, podedes facer a mestura igual e gardala no conxelador, remexendo cada 30 minutos ou media hora, igual cos xeados normais.

O truco para obter un bo sorbete é que o melón estea maduro, para ir mercar un recoméndovos que o cheiredes primeiro, os maduros teñen ese arrecendo característico tan bo (os outros non cheiran a nada). Outro xeito de saber a "madurez" do melón é premer cun dedo na parte que se une ca mata, se cede é que está no punto óptimo.

Ingredientes (para 4-6 racións)

1/4 de melón, variedade "piel de sapo"

1 vaso de auga

1 culler de mel,

2 se o melón non está doce dabondo.

Un chisco de canela (opcional)

  1. Cortamos e pelamos o melón, retirámoslle as sementes. Cortamos en dadiños de 2 cm. de grosor.
  2. Nun bol metemos todos os ingredientes e pasámolos pola batedora ou trituradora ata facer un líquido homoxeneo.
  3. Deixámolo arrefriar na neveira unha hora.
  4. Botámolo aos poucos na máquina xeadora.
  5. Servimos en vasiños, axiña, para que non derreta.

Que aproveite! sorbete_melon1


Sopa fría de melón e laranxa con kiwi

Receita ultra-rápida e ultra-doada para apañar nos días de calor.

Ingredientes:

500 gr. de melón - previamente enfriado

Zume de laranxa - A cantidade dependerá de como cortedes o melón

Un kiwi maduro

Medio vaso de sidra ou de cava.

 

  1. Cortar o melón en dadiños, botalo nun bol.
  2. Verter zume de laranxa ata que estea a piques de cubrir o melón. Engadir a sidra ou cava.
  3. Pasar pola batidora ata que estea homoxeneo.
  4. Cortar o kiwi en láminas finas.
  5. Servir a sopa nos pratos e decorala co kiwi.

Penso que esta é a receita máis agradecida (tempo+esforzo) das que escribín ata agora. Que aproveite!