Madalenas de castaña e vainilla

Agora que vai tanto frío apetece quedar na casa e que mellor plan que facer unhas madalenas que sirvan de agasallo ou que solucionen uns cantos almorzos. Como presta comelas con café quentiño! Esta receita é moi doada, tanto que a podedes facer con nenos, seguro que se divirten fozando cos moldes de papel e o azucre :)

Se queredes ver máis receitas de madalenas, visitade a de madalenas con nata e noces, a de madalenas de chocolate, ou estas ben saudabeis de plátano e avea.

Ingredientes (para 14 madalenas, aprox.)

110 gr. de fariña de castañas

100 gr. de fariña de trigo

170 ml. de aceite de xirasol

100 gr de azucre normal

75 gr de azucre avainillado

60 ml. de leite (mellor se é gordo)

2 ovos

9 gr. de fermento químico

Un belisco de sal

Un chisco de azucre, avanillado ou non, para botar por riba

Utensilios:

Batedora de variñas

Moldes de papel para madalenas.

Moldes ou bandexa para madalenas

  1. Nun bol grandeiro botamos os ovos e o azucre, batemos ca batedora ata que aclare e teña unha textura esponxosa.
  2. Engadimos o leite, seguimos batendo.
  3. Engadimos o aceite aos poucos, mentres continuamos a bater.
  4. Nun prato fondo mesturamos as fariñas, o fermento e o sal, mesturamos cunha culler.
  5. Imos engadindo a mestura "sólida" á líquida mentres batemos, tendo conta de que non queden grumos.
  6. Tapamos cun film transparente e deixamos no frigorífico unha hora.
  7. Prequecemos o forno a 150º, por riba e por baixo.
  8. Colocamos os moldes de papel dentro dos de silicona (ou de metal, os que teñades) e enchémolos ata os 3/4, deixando marxe para que a masa suba. Esparexemos un chisco de azucre en cada madalena, formando una capa moi fina, para que logo quede crocante.
  9. Deixámolas cocer no forno durante 15 minutos, vixiando que non se pasen.
  10. Deixamolas arrefriar no mesado, e cando estean frías gardámolas nun tupperware ou nunha bandexa tapada cunha rolla.

Que aproveite!

 


Cheesecake con marmelada de níspero

Despois dun pequeno retraso (estas semanas xuntaseme moito traballo, e teño menos tempo para actualizar do que me gustaría), voltamos cunha sobremesa moi xeitosa: cheesecake con marmelada de nísperos! En realidade pode ser de calquera sabor, os máis parecidos a este serían a marmelada de ameixa ou a de albaricoque, pero se vos gusta experimentar, probade con laranxa amarga, ou cenoura, seguro que está boísima.

O queixo crema que useo foi o Philadelphia, pero podedes usar outro tipo, coma o mascarpone. Nas fotos a base sae un chisco esfarelada porque só estivo no frigorífico 6 horas, se a deixades toda a noite, evitaredes ese problema. Se queredes ver máis doces sen forno, pasádevos por esta receita de mousse de manga, ou esta torta de mousse de chocolate e café!

Ingredientes (para 8-10 racións, un molde de 24 cm de diámetro)

300 gr. de queixo crema

250 gr. de marmelada

200 ml de nata de bater (35% MG)

100 gr. de azucre

Zume de dous limóns

3 follas (ou medio sobre) de xelatina neutra

Para a base

200 gr de galletas tipo Dixestive

85 gr. de manteiga tépeda

50 gr. de améndoa moída

  1. Nunha trituradora, ou a man, picamos as galletas moi finiñas, mesturámolas ca améndoa e a manteiga.
  2. Colocamos papel de forno no molde desmontable e estendemos a masa do paso 1, apretando cunha culler ata que quede unha superficie lisiña. Gardamos no frigorífico.
  3. Disolvemos a xelatina en 60 ml de auga.
  4. Nunha tixola botamos dúas culleres de marmelada, a xelatina (se son láminas quitádelle a auga) e o zume de limón. Quecemos a lume alto ata que ferva, apagamos e deixamos arrefriar.
  5. Nun bol grande batemos a nata, tendo conta que non monte de todo, interésanos que quede un pouco solta.
  6. Noutro bol, mesturamos o queixo crema co contido da tixola. Remexemos a modiño ata formaren unha masa homoxenea.
  7. Engadimos a nata en dúas ou tres quendas, mentres batemos cunhas variñas.
  8. Sacamos o molde do frigorífico e estendemos o contido do bol alisándoo cunha culler por riba.
  9. Deixamos repousar a lo menos 8 h.
  10. Estendemos o resto da mermelada, e xa está listo para servir.

Que aproveite!

cheesecake-nisperos-1


Abacates recheos ao forno

Sei que en galego o xeito "oficial" é aguacate. Pero, igual que os cacaués a palabra abacate gustame moito máis! Moi populares dun tempo a esta parte, os abacates son moi nutritivos e teñen propiedades antioxidantes. O truco é atopalos bos e que non haxa que pagar unha letra da hipoteca por eles (nesta ocasión só puiden cumprir o primeiro, ¬¬U). Nota: Se tendes a sorte de ter ovos de paspallás, é o momento perfecto para usalos (no canto dun de galiña).

Esta receita dalle un toque quentiño que presta moito no inverno, e se non vos gusta o touciño podedelo cambiar por queixo feta ou noces! Para ver máis pratos lixeiros, probade esta receita de ensalada grega de garavanzos, ou esta crema de batata e cenoura.

Ingredientes (para unha ración)

Un abacate

Un ovo grande

2 tiriñas de touciño (ou un anaco de queixo feta)

Un chisco de sal

  1. Quecemos o forno a 170º
  2. Pasamos o touciño pola tixola ata que quede crocante. Reservamos.
  3. Metemos o ovo nun vaso e pinchámolo cun garfo, sen bater.
  4. Abrimos o abacate en dúas metades e quitámoslle o óso. Cunha culler facemos o oco un pouco máis grande (reservamos a carne que sobre).
  5. Botámoslle sal ao abacate e enchémolo co ovo, sen que chegue e rebosar.
  6. Cocemos durante 15-20 min na parte superiori do forno, ata que ovo calle e o abacate teña pintiñas douradas.
  7. Decorámolo co touciño e o resto da carne.

Que aproveite!

abacate-forno-2


Biscoito de mel e noces

Coma tantas outras receitas, este biscoito xurdiu de improvisar algo cando me decatei que que xa partira os ovos e non había azucre na casa. Varias búsquedas en Internet despois, estaba facendo este queique que saiu ben saboroso!

Se sodes uns larpeiros e queredes ver máis receitas, probade esta de chocolate branco e pistacho, ou esta de mazá e canela.

Ingredientes (para un biscoito de 6-8 racións)

4 ovos

Un iogur natural

80 gr. de manteiga derretida

200 ml. de mel

325 gr. de fariña

Unha culleriña de levadura química

Un belisco de sal

Un feixe de noces peladas e esmagadas (pódese cambiar polo froito seco que queirades)

  1. Prequecemos o forno a 170º.
  2. Nun bol grande batemos os ovos, a menteiga derretida, o iogur, e o mel. O mellor é pasar o mel un chisco polo microondas, a temperatura media, para que estea máis líquido.
  3. Engadimos a fariña mesturada ca levadura química e o sal, seguimos batendo.
  4. Poñemos nun molde de silicona (ou un de metal/cerámica engraxado) e cocemos no forno durante 30 minutos, con calor por arriba e por abaixo. Como isto dos fornos depende moito, idelle botando un ollo e se está dourado, pinchádeo cunha agulla de calcetar: se sae seca é que está listo.
  5. Deixamos arrefriar, ao día seguinte estará no seu punto máis aromático.

Que aproveite!

biscoito_mel_3


Xeado de chocolate negro

Despois do éxito das receitas do xeado de cheesecake ou o de lima e alfábega, hoxe traemos un xeado máis tradicional que de seguro ha gustar a todo o mundo: xeado de chocolate negro! Para un resultado espectacular é mellor investir nun chocolate de calidade, que teña a lo menos un 70% de cacao.  A marca Lindt é moi boa, así coma a "JD Gross", que venden nos supermercados Lidl. Para facer contraste acompañarémolo dunha mermelada de framboaesa ou laranxa amarga, que combinan moi ben co chocolate.

Veredes que a receita non especifico o tipo de leite nin de nata, porque isto depende moito da graxa que lle queirades meter. Eu fíxeno con leite desnatado e nata 20% MG porque era o que tiña na casa, pero canta máis cantidade de graxa, máis aveludado ha quedar. Ollo: precísase unha máquina de facer xeados.

Ingredientes (para 3/4 de litro, máis ou menos)

500 ml. de leite

200 ml de nata

150 gr. de azucre

125 gr. de chocolate negro

4 xemas de ovo

65 gr. de cacao en po

1 culleriña de extracto de vainilla

Un belisco de sal

Améndoas, marmelada de framboesa ou laranxa amarga para acompañaren

  1. Botamos o leite e a nata nunha tixola ben grande. Quecemos a lume medio, e disolvemos o chocolate e mailo cacao en po. Retiramos do lume.
  2. Nun bol, batemos as xemas de ovo durante 1 minuto. Despois engadimos o azucre e batemos ata que colla unha textura pastosa e aclare a súa cor.
  3. Botamos un cuarto da mestura da tixola, aos poucos para que non calle o ovo de todo, e remexemos ben ata que non se distingan as dúas texturas.
  4. Botamos o contido do bol de volta na tixola, e quecemos de novo a lume medio, remexendo cunha culler de pau ata que espese. Para que vos fagades unha idea, ao pasaren o dedo pola culler, ten que quedar unha liña limpa, sen que a mestura se volte xuntar inmediatamente no medio da liña.
  5. Engadimos o sal e o extracto de vainilla, remexemos.
  6. Deixamos arrefriar e metemos no frigorífico durante unha hora.
  7. Metémolo na máquina de xeados segundo as instruccións do fabricante, ata acadar a textura desexada. Normalmente para que quede firme cómpre deixala entre 45 min e unha hora.
  8. Unha vez feito, o xeado aguanta 3 ou 4 días no conxelador, metido nun recipiente con tapa. Lembrade sacalo 10 minutos antes de comelo para desgustalo ao máximo.

Que aproveite!

xeado-choco-2