Pasteliños de noces e dátiles

Volvemos cos doces, pero desta vez a inspiración vén de Grecia e Turquía, nunha especie de baklava "feito na casa". En realidade o baklava leva bastante máis traballo e sae un chisco distinto a esta receita, pero penso que ben vale como introducción ao mundo de doces con froitos secos.

Como saen uns doces bastante contudentes, recoméndovos tomalos ao almorzo ou á merenda cun té, xa que de sobremesa poden ser demasiado :D

Ingredientes (para 6- 8 unidades)

1 paquete de masa fresca de follado

50 gr. de azucre

50 gr. de noces moídas

50 gr. de dátiles sen óso ou de uvas pasas

50 gr. de pan relado

50 ml. de ron dourado

1 culleriña rasa de canela en po

A pel relada de medio limón

Azucre glass para decorar

  1. Deixar os dátiles ou as pasas en remollo durante media hora. Escorrer.
  2. Prequentar o forno a 150º, só pola parte superior.
  3. Nun bol, triturar tódolos ingredientes ata que quede unha masa suave e un chisco pegañenta.prep1
  4. Cortar a masa en rectángulos de 12 x 5 centímetros, aproximadamente. Colocar unha porción do recheo ao longo deixando un centímetro por cada lado, enroscar, formar un aro e apretar a masa para que peche ben.
  5. Colocar na bandexa do forno (usando o papel que trae a masa do follado) e cocer durante 20-25 minutos, ou ate que douren por riba.
  6. Esparexer o azucre galss por riba e deixar enfriar.

Bo proveito!

pseudo-baklava4


galletas de arandos

Galletas de arando

Esta receita saiu procurando facer unhas galletas que fosen máis secas que as cookies, para mollar no café do almorzo. A gracia está en que non se usa batidora e hai que amasar cas mans: ao principio semella unha porcallada pero é bastante entretido e non tampouco leva moito rato.

Eu merquei os arandos secos no Mercadona, tamén podedes usar pasas, pexegos secos, noces, etc.

Ingredientes (para 20 galletas, aproximadamente):

250 gr. de fariña

90 gr de manteiga fría

90 gr. de azucre

75 gr. de arandos secos

100 ml. de leite frío

1 ovo

2 culleriñas de fermento químico (Royal e semellantes)

Media culleriña de canela (opcional)

 

  1. Tamizar a fariña e o fermento nun bol grande.
  2. Engadir a manteiga en añaquiños, e amasar cas mans ata que teña todo unha textura semellante ao queixo relado de bolsa.
  3. Prequentar o forno a 200º
  4. Botar o azucre e os arandos no bol, seguir amasando.
  5. Nun prato fondo, batir o ovo e a leite. Verter o líquido no bol e amasar (cas mans!) ata que quede unha masa homoxenea.
  6. Colocar papel de forno nunha bandexa, ou untala cun pouco de aceite, Cunha culleriña, facemos boliñas de masa, con coidado de que non estean moi xuntas para que non peguen.
  7. Baixar a temperatura do forno a 180º e cocer durante 12-15 minutos ou ata que douren. Se quedan un pouco brandas polo centro, non vos preocupedes, hanse de por duras ao enfriar!

gall_arand3

gall_arand2

 


Biscoito de canela e mazá

Ultimamente estou a experimentar metendo máis froita nas queiques e nos pasteis, e a verdade é que paga a pena. Saen máis saborosos, duran máis (se usades froita fresca axuda a conservar a humidade) e engordan menos. Esta receita é unha adaptación desta, pero quitando o tomiño, que o deixarei para pasteis máis salgados. Tamén pode levar prebe de caramelo ou doce de leite, en plan merendola, pero eu prefiroa sen nada.

Ingredientes

100 gramos de fariña

100 gramos de azucre

2 ovos

125 mililitros de aceite de xirasol

3 culleres de leite gordo

1 culleriña de canela (non moi chea, ao ras)

1/2 culleriña de lévedo químico (tipo Royal)

1/4 culleriña de noz moscada

1/4 culleriña de sal

3 mazás pequenas (mellor se son un pouco acedas, tipo tabardilla)

Un chisco de manteiga ou aceite de xirasol para engraxar o molde.

maza1

  1. Prequentar o forno a 170º
  2. Nun bol botamos a fariña, o lévedo, a canela, a noz moscada e o sal. Batemos ata que estea ben mesturado.
  3. Noutro bol mesturamos o aceite, os ovos, o azucre e o leite.
  4. Botamos o contido do primeiro bol no segundo, remexendo con conta para que non se fagan grumos.
  5. Pelamos as mazas, sacámoslles os centros e cortámolas en dadiños pequenos.
  6. Botamos as mazás á masa e remexemos para que a masa cubra ben tódolos anacos.
  7. Engraxamos o molde, botamos a masa e cocémola entre 20 e 30 minutos, ata que estea dourado por riba e seco por dentro.

Que aproveite!