Galletas crocantes de cacaué

Unha das cousas que máis me gustan é mesturar salgado e doce, coma nesta receita. Estas galletas saen riquísimas, e van moi ben cun café con leite ou incluso acompañando a un xeado. Hai dúas cousas a ten en conta: se cambiades o unto por manteiga non van quedar tan crocantes, e os cacaués teñen que ser dos que veñen torrados e salgados, os de casca para pelares non valen (quedaría con moito menos sabor.

Se non vos convence este sabor, ou queredes probar cousas diferentes, pasádevos pola receita de galletas de arandos ou por esta das clásicas cookies de chocolate.

Ingredientes (para 24-28 unidades)

75 gramos de azucre moreno, máis un pouco para a cobertura.

100 gr de manteiga a temperatura ambiente

50 gr de unto de porco, a temperatura ambiente

175 de fariña de trigo

125 de cacaués salgados

Unha culleriña de fermento químico

Un ovo grandeiro

Unha culler de extracto de vainilla

Utensilios: batedora con triturador e variñas, papel de forno, espátula.

  1. Prequentar o forno a 190º.
  2. Nun bol grande, mesturar ca baterdora (cas variñas) o azucre, a manteiga, o unto, o ovo e o extracto de vainilla. Non cómpre darlle moitas voltas, con que quede mesturado vale ben.
  3. Engadimos a fariña e os cacahues. Ainda que pareza que queda moi espeso, é o propio desta masa.
  4. Poñemos o papel na bandexa do forno.
  5. Con dúas culleriñas, poñemos boliñas de masa, a unha distancia de 5 cm. Caberán 12 por quenda, máis ou menos. Neste punto pódense deixar como están e quedarán co centro máis tenro e os bordes crocantes (ver foto). Se queredes que queden crocantes de todo hai que aplastalas cunha espátula, e redondear os bordes para que non queden "pinchos" coma os desta foto (foi a quenda menos crocante):
  6. Botamos un pouco de azucre por riba e cocemos no forno durante 8-10 minutos. Lembrade que as galletas seguen a cocer un pouco ao sacalas, entón non pasa nada porque estean un pouco menos feitas na parte central.
  7. Deixamos arrefriar e gardámolas nun recipiente, estarán boas durante varios días. Son estupendas para acompañar o café ou unhas bolas de xeado de vainilla ou chocolate.

Cales son as vosas galletas favoritas? Que vos parece esta combinación doce/salgado?

 

 


Fermentando té na casa

Sabiades que se pode fermentar o té? Eu non, e cando oin falar da kombucha, unha bebida típica da zona de Manchuria, en China, tampouco o pensei moito no tema. O caso é que estase a facer popular pouco a pouco e un día un amigo comentoume que tiña un cultivo de sobras e así foi como me puxen co tema.

Neste caso, o té fermentase cun disco que parece un fungo, pero en realidade é unha colonia de lévedos e bacterias, coñecido coma scoby (do inglés symbiotic culture of bacteria and yeast). O resultado é unha bebida levemente gaseosa que sabe un pouco a sidra, está moito máis rica do que o seu aspecto suxire. Ten un pouco de alcol, pero non chega ao 1%.

Para facer a kombucha precisades té, azucre e un cultivo cun pouco de kombucha anterior. Véndense deshidratados por Internet, pero se preguntades en tendas ecolóxicas quizá vos poidan avisar de alguén que volo dea. Cada vez que facemos unha fermentación sae unha colonia nova, pero a vella pódese usar varias veces, así que pronto estará o mundo cheo delas :D

É importante que o té que usedes non leve engadidos, vale té verde, roxo ou negro, pero sen aceites nen froitas nen nada diso. A receita sería así (puxen varias fotos porque o proceso é fascinante e noxento a partes iguais, están ao final do artigo).

Ingredientes para litro e medio de kombucha:

Litro e medio de auga

4 ou 5 bolsiñas de té

100 - 125 gr. de azucre

Unha colonia "scoby" e un pouco de kombucha xa feita

  1. Fervemos a auga e apagamos o lume.
  2. Cando deixe de ferver, engadimos o té e deixámolo estar segundo as instruccións do fabricante.
  3. Engadimos o azucre e remexemos ata que disolva. Deixamos enfriar ata que acade temperatura ambiente.
  4. Botamos a mestura nun recipiente de cristal, e colocamos o scoby: Pode quedar flotando ou fundir, non pasa nada en ningún dos casos.
  5. Tapamos o recipiente e colocamoslle unha rolla limpa ou un pano de papel por riba e tensamola cunhas gomas elásticas.
  6. Deixámolo nun sitio aireado, sen luz directa e cunha temperatura estable que non baixe dos 18 graos. Detrás ou enriba da neiveira adoita ser bo sitio.
  7. Agardamos unha semana, destapamos e apartamos un pouco o scoby (que xa serán dous) e probamos cunha palla de plástico para ver se nos gusta o sabor. Cantos máis días estea, máis ácida e gaseosa quedará.
  8. Cando teñamos o sabor desexado, gardamos os scobys nun tupperware con 100 ml da kombucha. Iso pódese gardar no frogorífico, así estará en estado "durminte" ata a vindeira vez que queiramos facer kombucha. Poden quedar posos, é normal e pódense beber, pero se queredes que quede "limpo", pasádeo por un escoador de tea, dos de facer café de pota.
  9. Aguanta unha semana na neveira, máis ou menos, servímolo frío ou do tempo!
Así hai que tapalo
Os dous discos scoby. Ao final da fermentación sempre van quedar por riba.
Os scoby listos para a vindeira vez
"Kombucha" recén feita, co seu gas.

Que vos parece? Fariades kombucha na casa?

PD: Aproveito este artigo para facer publi de Radio Liverdade, onde colabora o amigo da kombucha (grazas Emilio!), é unha radio comunitaria de Ourense que ten programas ben interesantes :)


Panquecas

Hoxe traemos unha receita ben sinxela, unhas panquecas para almorzar desas que se ven tanto nas películas de USA. As panquecas non teñen case sabor de si, o bonito é a súa textura e que combinan con todo . Teñen tantos buratiños que absorben calquera líquido que se lle bote: leite condensado, zume de pradairo (maple syrup), mel quente, etc.

Nalgunhas tendas de produtos nortemericanos venden un preparado ao que engadirlle leite, pero a non ser que sexades un pouco langráns, isto faise na casa en 5 min máis o tempo de tixola. É recomendable usar unha pequena (de 12-16 cm. de diámetro) porque teñen que ter alomenos  un centímetro de grosor para que queden ben. O truco é ir facendo ata que remate a masa, non cómpre ser moi exactos!

Ingredientes (para 4 ou 5 panquecas coma as da foto: é un prato pequeno)

180 gr de fariña

180 ml de leite

Un ovo

Unha culleriña de fermento químico

Unha culler de manteiga en pomada (opcional)

Un belisco de sal

Manteiga ou aceite de xirasol para a tixola

  1. Quecemos a tixola a lume medio cun pouco de manteiga ou aceite (3 ou 4 pingas bastarán).
  2. Nun bol betemos o leite co ovo e a menteiga tépeda.
  3. Imos engadindo a fariña, o fermento e o sal. Non fai falta batelo moito, cando teña unha consistencia similar ás filloas xa vale.
  4. Botamos un pouco de masa na tixola, cando doure por abaixo dámoslle a volta, en total 2-4 minutos por lado. Ao principio o lume terá que estar un pouco máis alto, despois pódese baixar.
  5. Repetimos o proceso para todas as panquecas.
  6. Servimos quentes co condimento que máis vos guste.

Que aproveite!


Cadradiños de chocolate (sen forno)

Esta receita é unha das máis sinxelas que levamos publicado, está pensada para facer con cativos ou para aqueles que non teñen forno na casa. Bueno, en realidade é para calquera que giste do chocolate. Se estades nese grupo, mirade tamén esta receita de torta de mousse de chocolate e café ou esta de cookies de chocolate: lambiscadas para todos!

Unha vez feita pódese gardar varios días na neveira ou incluso no conxelador.

Ingredientes (para 9 ou 12 cadrados, dependendo do molde e as porcións)

300 gr. de chocolate de fundir

180 ml. de leite condensado

100 gr. de galletas

80 de noces

30 gr. de cacau en po

  1. Picamos as galletas nunha trituradora ata que se fagan po.
  2. Nun bol de cerámica botamos 100 gr. de chocolate e fundímolos no microondas. A mellor opción é poñelo en modo "Desconxelar" e facer intervalos de 30 segundos, revisando e remexendo cada vez.
  3. Nun bol grande mesturamos o po do paso 1, o cacau, o leite condensado, as noces picadas e o chocolate derretido, remexendo cunha culler de pau.
  4. Nun molde cadrado ou rectangular estendemos a masa e aplastámola ca culler de pau ata que quede lisa e uniforme. Deixamos arrefriar.
  5. Derretermos o resto do chocolate repatindo o paso 2, estendémolo por riba usando unha culler normal, ata que quede liso. Deixamos arrefriar fóra e logo metémolo no frigorífico, deixándoo repousar a lo menos dúas horas. Ao día seguinte aínda estará mellor.

Que vos parece? Ídelo facer na casa?

cadradinhos_chocolate_1


Xeado de pexego con framboesa

Coñecedes o Peach Melba? é unha sobremesa bastante famosa nos países anglosaxóns, e consiste en pexegos cocidos nun xarope, acompañados dunha xelatina de framboesa todo sobre un xeado de vainilla. Débelle o nome á cantante de ópera Nellie Melba, a quen lle adicou o cociñeiro a súa creación.

A cousa é que eu non o coñecía e tampouco o probara, pero buscando receitas novas de xeado xurdiu unha que combinaba todo nun. Aproveitade para facelo, gardalo e lembrar nuns días as últimas calores do verán ;)

Ingredientes (para 600 ml de xeado)

2 pexegos, pelados, sen óso e cortados

200 ml de nata para bater (35% MG)

40 ml. de zume de pexego

40 ml. de leite enteiro (gordo)

60 gr. de azucre avainillado

Unha culler de zume de limón

Un belisco de sal

Para a pasta de framboesa

100 gr. de framboesas

Unha culler de ron

Dúas culleres de azucre de caña

  1. Nunha tixola, quecemos o zume de pexego, os anacos de pexego e o azucre a lume medio, ata que estean brandos.
  2. Deixamos arrefriar, lonxe do lume.
  3. Mentres, imos preparando a pasta de framboesa: nun bol mesturamos todo e esmágamolo cun garfo. Metemos no frigorífico
  4. Cando a mestura do punto 1 estea fría, botámola nun bol ca nata, o leite e o limón, pasamos a batedora ata que teña unha textura homoxénea e aveludada.
  5. Deixamos no frigrífico 1 hora, e despois metémolo 10 minutos no conxelador.
  6. Imos botando a mestura na xeadeira, seguindo as instruccions do fabricante.
  7. Estendemos nun recipiente de plástico, intercalando capas da pasta de framboesa. É recomendábel deixar repousar media hora no frigorífico antes de comelo.

Que aproveite!

xeado_pexego_2

xeado_pexego_1