As mellores madalenas?

Idesme perdoar o titular pouco específico, pero de todas as receitas de madalenas que fixen, estas son as que máis me gustan: de sabor e de textura, son marabillosas! Ademáis teñen a vantaxe de que non hai que bater moito nin repousar a masa no frigorífico.

A receita e unha adaptación dunha que vin no Instagram de Aliter dulcia, un obradoiro de Xixón que ten moitas e moi boas receitas. Eu usei metade de fariña de millo, pero podedes cambiala por arroz ou castaña, ou facelo todo con fariña triga, como máis vos guste.

Ingredientes (para 24 unidades)

360 ml. de aceite de oliva virxe extra

300 gramos de azucre, máis un chisco para a cobertura

6 ovos

175 gr de fariña de trigo

175 de fariña de millo

13 gr de fermento químico

Un belisco de sal

Un chisco de canela ou noz moscada

Reladura dun limón (opcional)

Utensilios: batedora de variñas, cápsulas de papel, moldes de madalenas (de silicona ou de metal).

  1. Prequecemos o forno a 225º, arriba e abaixo.
  2. Bater os ovos co azucre a man. Non queremos que a mestura creza, con que estea ben homoxenea vale.
  3. Engadir o aceite de oliva e seguir batendo, despois botamos a fariña o fermento, o sal, a canela e a reladura de limón. Neste punto eu usei a batedora electrica cas variñas a velocidade mínima, porque é moi cansado bater tanto tempo a man.
  4. Encher as cápsulas de papel a unha altura de 3/4. Esparexer un pouco de azucre por riba ata facer unha costra finiña.
  5. Cocer no forno a media altura ata que a costra rompa e estean ben douradas. Levará uns 10 ou 15 minutos, dependendo do forno. É importante non abrilo, porque interrumpiría a "subida" das madalenas.
  6. Sacamos as madalenas e deixámolas arrefriar nunha bandexa de rexas, gardámolas nun recipiente hermético, estarán boas 3 ou 4 días, despois comenzar a secar.

Que aproveite!

 


Galletas de millo á moda brasileira

Estas galletas coñécense en Brasil coma "biscoitos de fubá", e son desas receitas tan típicas que teñen miles de versións. Para facelas cómpre fariña de millo, pero non da que se fai o pan de millo (cada vez máis difícil de atopar, por certo) senón a peneirada para repostería, que se vende na maioría de supermercados e tendas de alimentación (tamén se pode comprar en Portugal co nome de fariña de fubá).

Os que seguides este blogue xa sabedes que lle dámos moi forte o tema de queiques e galletas, os que acabades de chegar, podédesvos pasar por esta receita de galletas de millo con chocolate, este queique de millo e mascarpone, ou estas espectaculare galletas veganas.

Ingredientes (para 14-15 pezas coma as da foto do final do artigo)

375 gr de fariña de millo

125 gr de fariña de trigo

125 gr de azucre

125 gr de manteiga tépeda

4 xemas de ovo

2 culleres de leite gordo (enteiro)

Unha culleriña de extracto de anís (opcional)

Un belisco de sal

Un chisco de azucre glas e canela en po mesturados, para decoraren.

  1. Mesturamos os ingredientes nun bol grande e mesturamos coas mans. Se quedase tan seco que non despega das paeredes do bol, podemos engadir un chisco máis de leite.
  2. Deixamos repousar 15 minutos no frigorífico.
  3. Prequecemos o forno a 170º, por riba e por baixo.
  4. Colocamos papel de forno nunha bandexa
  5. Cun trebello de bolas de xeado (se non tendes, usade dúas culleres para coller unha cantidade algo máis pequena que unha pelota de golf) facemos bolas e colocámolas na bandexa a 4 ou 5 cm unhas doutras. Esmagámos un pouco cun garfo para aplanalas.
  6. Cocemos durante 10 ou 15 minutos, ata que comecen a dourar por riba. Retirámolas a unha bandexa de reixas para que lles dea o aire por baixo.
  7. Mentres están quentes e na reixa, esparexemos o azucre e a canela por riba, ao gusto.
  8. Gardámolas nun recipiente hermético, aguantan de 3 a 6 días en bo estado dependendo da humidade do lugar.

Que vos parece? Fixestes a proba? Deixa a túa experiencia no comentarios, ou no noso Twitter.


Galletas de millo e chocolate negro

Voltamos á carga cunha larpeirada ben boa! Estas galletas son moi fáciles de facer, igual que a mega galleta de noces que publicamos hai uns días. A súa orixe é italiana e en principio levan pasas molladas en ron (podedes ver a receita orixinal nesta ligazón) pero eu cambieina por chocolate porque penso que é un acompañamento ideal para o millo, igual que cando tomaba pan de millo con nocilla para merendar: que delicia! Tamén podedes cambialo por noces, améndoas, arandos... Seguro que ha quedar boísimo!

Ingredientes (para 15 galletas aprox.)

100 gr. de fariña triga

105 gr. de fariña milla

50 gr. de azucre, máis un chisco para a decoración

75 gr. de manteiga sen sal, tépeda

50 gr. de chocolate negro, picado

2 xemas de ovo

2 culleres de leite gordo (enteiro)

Media culleriña de fermento químico (tipo Royal)

1 belisco de sal

  1. Nun bol grande mesturamos as fariñas, o chocolate, o fermento e o sal e remexemos ben.
  2. Cunha culler, formamos un oco no medio e botamos as xemas de ovo, o leite e a manteiga. Amasamos ben ata formarmos unha pasta homoxénea. Debe ser flexible e non deixar restos nas mans. Se vedes que esfarela é que está un pouco seca: a solución é botarlle un pouco máis de leite.
  3. Coa axuda dun film transparente, facemos un cilindro de 4-5 cm. de diámetro, enroscando as puntas coma se fose un chourizo.
  4. Deixamos na neveira a lo menos unha hora.
  5. Prequecemos o forno a 160º.
  6. Cun coitelo ben afilado, facemos rodas dun centímetro de grosor. Botamos un pouco de azucre nun prato e rebozámolas un chisco polos dous lados.
  7. Cocemos no forno a altura media ata que douren, aproximadamente uns 15 minutos, pero depende do forno, andade con conta.
  8. Deixamos arrefriar, estarán máis boas logo dunhas horas de repouso.

Que aproveite!

galleta-millo-chocolate_3

galleta-millo-chocolate_4


Queique de millo e mascarpone

Coma tantas outras, esta receita naceu de aproveitar cousas que xa tiña na casa: unha vai comprando para facer outras receitas e logo quedan botes de todo a medio gastar. E así que cambiei a fariña de trigo pola de millo e no canto de usar aceite de xirasol ou manteiga coma noutros queiques, decidín probar o mascarpone: non sei por cal dos dous cambios é, pero a textura é moi especial, non se asemella en nada a outros queiques que probei.

Un aviso para os máis larpeiros: esta torta non queda moi doce de por si, pero podédela acompañar de máis mascarpone e mermelada, ou de mel, chocolate, etc.

Ingredientes (para 8-10 racións)

180 gr. de queixo mascarpone, morno

220 gr. de fariña de millo

150 gr. de azucre de caña

4 ovos

1 culler de lévedo químico

Un belisco de sal

Aceite de xirasol para o molde

Mascarpone e marmelada de arandos para acompañar

  1. Prequentamos o forno a 170º
  2. Separamos as xemas das claras, cadansúa nun bol.
  3. Batemos as claras co sal ata facer punto de neve.
  4. Engadimos o azucre e os mascarpone ás xemas e batemos ata formaren unha masa homoxénea.
  5. Mesturamos a fariña de millo co lévedo nun prato.
  6. Engadímola aos poucos á mestura das xemas.
  7. Engadimos as claras a punto de neve e batemos a man para que non baixen e quede o queique máis esponxoso.
  8. Aceitamos o molde. Se queda moito aceite, limpamos cun pano de papel.
  9. Cocemos no forno durante 30-40 minutos, ata que estea ben dourado. Para ver se coceu ben, metemos un coitelo ou unha agulla de calcetar, ao sacar ten que estar seco/a.

Que aproveite!queique-millo3queique-millo1queique-millo2