Ensalada de pasta con tomates secos

Os que seguides este blog sabedes que aquí non somos moito de ensaladas. Só puxemos unha receita, tamén moi de verán, dunha de garavanzos. Pero esta ensalada de pasta pasou o filtro, e de que xeito! Está ben boa, é barata e conservase ben para levar nun tuper á praia ou ao monte.

Os tomates secos aquí en realidade viñan xa hidratados nunha bolsa. Se non, comprádeos secos e hidratádeos con auga (cocéndoos en auga fervendo uns 15 min) ou meténdoos nun frasco tapadiños con aceite de oliva, así consérvanse hidratados para cando os queirades usar. Para un extra de sabor, podédeslles engadir tomiño ou caiena.

Ingredientes (para 2 ou 3 racións)

200 gr. de pasta curta: laciños, caracois, macarróns pequenos, etc.

125 gr de mozzarella fresca

100 de bonito en aceite de oliva

1 cogombro

4 ou 5 metades de tomates secos

4 culleres de aceite de oliva virxe extra

1/2 culleriña de sal

1/2 culleriña de tomiño (opcional)

  1. Cocemos a pasta al dente.
  2. Reservamos 50 ml da auga de cocer nun vaso. Escoamos a pasta.
  3. Na mesma pota, engadimos o bonito, a mozzarella e os tomates, ben picado todo.
  4. Engadimos a pasta e remexemos pouco a pouco mentres engadimos un pouco da auga de cocer. Isto axudará a que ligue mellor.
  5. Engadimos o cogombro, pelado e picado, o aceite o sal e o tomiño. Remexemos ben.
  6. Deixamos repousar a lo menos dúas horas, idealmente dun día para outro. Pódese tomar fría ou do tempo.

E a vós, gustánvos as ensaladas de pasta?

 

 


Pasta con gambas e allo porro

Esta semana traemos unha receita ben doada de facer, que agadardamos que teña tanto éxito coma a de pasta con espinacas e mascarpone, unha das máis lidas do blog! Para facela non hai que comprar ingredientes exóticos, só leva porros, gambas e limón, mailo sal, a pementa e o aceite para facer o rustrido. É importante que os porros estean ben frescos, só imos utilizar a parte branca e verde claro. A parte escura, a das follas, pódese aproveitar para facer caldo, dálle un sabor moi rico.

Podedes usar a pasta que queirades, lembrade cocela ben! Desta vez usei unha pasta de algas de Bubela Artesá, un proxecto moi interesante que elabora pastas e cervexas en Lugo. Podedes ver os seus puntos de venda nesta ligazón.

Ingredientes (para dúas ou tres racións)

200 gr. de pasta

250 gr. de gambas peladas

2 porros grandes

Zume de medio limón

Reladura dun limón

3 ou 4 culleres de aceite

Sal e pementa

Queixo relado (opcional)

  1. Cocemos a pasta segundo as instruccións do fabricante. Retírámola ao un bol cando estea lista.
  2. Lavamos os porros, cortámolos pola metade horizontalmente, logo cada metade en dúas pero verticalmente, e cortamos tiriñas ao longo.
  3. Quecemos o aceite nunha tixola grande, cando estea quente botamos o porro e deixámolo a lume medio, remexendo de cando en vez ata que comece a dourar.
  4. Botamos as gambas, un pouco de sal e de pementa e deixamos cocer un par de minutos.
  5. Engadimos o zume e a reladura de limón e cocemos ata que as gambas estean ben feitas.
  6. Engadimos a pasta e deixamola quecer un chisco co rustrido.
  7. Servimos quente, cun pouco de queixo relado.

Que aproveite!


Gnocchi de ricotta e espinacas

Estes gnocchi son un pouco especiais, xa que en vez de estar feitos a base de pataca, son unhas boliñas rebozadas en fariña e logo cocidas estilo bolos do pote. Son típicos da rexión da Toscana, onde se coñecen coma "gnudis", que significa nus, xa que parecen o recheo dos raviolis, pero sen a pasta. É unha receita sinxela, pero leva bastante tempo, así que mellor deixala para a fin de semana ou días libres que teñades por aí.

Como nesta casa somos moi fans da comida italiana, xa temos un pequeno arquivo de receitas, se a vós tamén vos gusta, botádelle un ollo a estes arancinis de lacón e queixo, á pasta con grelos e salchichas ou a estes spaguetti á amatriciana.

Ingredientes (para 2 racións)

Medio quilo de espinacas frescas, ou un cuarto de conxeladas.

250 gr. de ricotta

1 ovo

50 de queixo "Parmiggiano"

15 gr. de manteiga

Un dente de allo

Un chisco de noz moscada moída.

Sal e pementa

Un prato de fariña "00" (a de facer pan)

Para acompañaren:

20 gr. de manteiga

Follas de salvia fresca, ou salvia seca

20 gr. de queixo relado

  1. Cocer as espinacas durante 5 minutos en auga fervendo con sal.
  2. Escoar todo o que se poida.
  3. Nunha tixola derretemos a manteiga e fritimos as espinacas durante 2 minutos. Deixamos arrefriar, e se sobra auga, escoámola. E importante que non quede líquido ningún.
  4. Cortamos as espinacas moi finas nunha táboa de madeira. Se aínda soltan líquido, apretádeas cas mans no fregadeiro.
  5. Nun cunco grande botamos as espinacas, o ovo, a ricotta, as especias e mailo queixo relado. Mesturamos ben para que todos os ingredientes queden repartidos.
  6. Preparamos un prato chan ca fariña, e outro sen fariña ao lado.
  7. Humedecemos as mans e facemos boliñas do tamaño dunha noz grandeira.
  8. Este paso require un chisco de paciencia: Rebozamos as boliñas na fariña e pasamolas ao prato limpo. Deixamolas repousar 10 min., volvémolas rebozar ca fariña e deixámolas no prato con fariña unha hora. Despois dámoslle unhas voltas sueves nas mans para que queden ben feitiñas e collan ben a fariña (ver foto de abaixo).
  9. Cocemos as boliñas en auga fervendo. En canto soban á superficie, retirámolas cunha escumadeira e botámolas nos pratos onde as imos servir.
  10. Derretemos a manteiga ca salvia e botámoslla por riba. Finalizamos co queixo relado!

Que aproveite!

 


Pasta con cabaciñas

Unha receita moi sinxela para as ceas de verán! E nada máis que engadir ;)

Ingredientes (para dúas racións)

160 gr. de pasta

Dúas cabaciñas pequenas, en rodas cortadas á metade

3 cebolas tenras pequenas

Un feixe (30 gr.) de perixel

60 ml. de viño branco seco

Catro culleres de aceite de oliva, máis un chisco para o final

Queixo parmesán ao gusto

Sal e pementa

  1. Cocemos a pasta seguindo as instruccións do paquete, pero tendo conta de que quede un pouco dura: con 2 ou 3 minutos menos de cocción abondará.
  2. Mentres, cortamos as cebolas en rodas moi finas.
  3. Quecemos o aceite nunha tixola grande cunha tapa e botamos as cebolas a cocer a lume alto durante 1 minuto, tapado.
  4. Remexemos as cebolas cunha culler de pau, e engadimos as cabaciñas. Deixamos cocer 5 minutos, remexendo de cando en vez.
  5. Engadimos o viño e a metade do perixel, baixamos o lume e deixamos cocer 5 minutos máis. Ha de quedar moi tenro e un pouco translúcido. Engadimos sal e pementa e deixamos repousar.
  6. Escoamos a pasta reservando un vasiño da auga da cocción.
  7. Volvemos poñer a pota da pasta no lume e engadimos todo: a pasta escoada, un chisco da auga de cocción, un chisco de aceite de oliva, a mestura da tixola, o perixel e o queixo relado. Remexemos, se queda algo seca  ou non liga ben, engadimos un pouco máis de auga.
  8. Servimos quente, a desfrutar!

pasta_cabacinhas_3

pasta_cabacinhas_1


Spaghetti á amatriciana

Coma moitas receitas tradicionais, esta pasta ten moitísimas variantes, e sempre hai o risco de ofender a algún italiano con elas :D A orixinal vén da rexión de Amatrici, preto de Roma, e tén ata festa popular.

A receita orixinal leva guanciale, que é a fazula curada do porco. Tamén se usa para facer a receita orixinal da carbonara (non esas con nata que poñen en moitos restaurantes). Pódese atopar en tendas gourmet ou online, pero por temas de comodidade cambiena por touciño entrefebrado curado. Outro dos ingredientes orixinais é o queixo pecorino, que se pode cambiar por un parmesán, un manchego ben curado ou un coma O rexo, que ademáis ten unha producción sustentable. O caso é que teña un sabor intenso e un pouco salgado.

Por último, quería engadir un crédito, xa que a receita está sacada do marabilloso blogue La ragazza col matarello, onde podedes atopar ducias de receitas itailianas en español.

Ingredientes (para 4 racións)

350 gr. de spaghetti ou outra pasta alongada

100 gr. de touciño entrefebrado ou guanciale, en cubiños

4 tomates de lata, en anacos

100 ml. de viño branco, seco

4 culleres de aceite de oliva virxe extra

1 cebola grande

1 semente de caiena (opcional)

100 gr. de queixo curado relado

Un chisquiño de sal

  1. Nunha tixola grande (é onde mesturaremos todo ao final) pasamos o touciño, sen aceite, ata que comece a churruscar. Botamos o viño e deixamos cocer a lume medio-baixo ata que case non quede líquido.
  2. Nunha pota, imos cocendo a pasta segundo as instruccións do fabricante. É mellor deixala pouco pasada, xa que logo ha cocer máis.
  3. Retiramos o touciño a un prato e fritimos a cebola no aceite de oliva, sen limpar a tixola. Cando comece a transparentar, engadimos o sal, a caiena e os tomates. cocemos durante 10 minutos, engadimos un par de culleres da auga de cocer a pasta, e 1 minuto despois, a pasta escoada.
  4. Remexemos ben e engadimos a metade do queixo relado.
  5. Servimos quente co resto do queixo, para que cada quen lle bote ao gusto.

Que aproveite!

amatriciana_2