Chili con carne

De orixe difusa, o chili con carne é un prato moi popular no norte de Mexico e nos Estados Unidos. É o prato oficial do estado de Texas e faise moito en competicións/festas gastronómicas onde hai moita xente. Non é de estrañar, xa que é de eses pratos dos que é imposíbel facer pouco, e polo tanto solucionan o xantar de varios días ou as ceas multitudinarias.

Para facer esta versión usei feixóns negros, que eran os que tiña na casa. Para cocelos, deixeinos a remollo a noite antes e ocínos durante unha hora. O chili con carme tamén se fai con feixóns vermellos ou "pintos", ide con ollo porque os tempos de cocción adoitan variar. Unha opción máis cómoda é mercalos cocidos en lata, pero a textura será máis caldosa.

Ingredientes (para catro ou cinco racións)

500 gr. de carne picada de porco u vitela

400 gr. de feixóns cocidos

300 gr. de tomates pelados en lata

1 cebola grande

1 pemento italiano

1 semente de caiena

4 ou 5 culleres de aceite de oliva

2 dentes de allo

1 culleriña de ourego

1 culleriña de prebe Perrins

1 culleriña de sal

  1. Quecemos o aceite nunha pota grande a lume medio.
  2. Cortamos o allo e as cebola en anacos moi moi pequenos, poñémolo todo a dourar no aceite.
  3. Cortamos o pemento do mesmo xeito, engadimos á pota.
  4. Botamos a carne na pota, remexendo de cando en vez cunha culler de pau, sempre a lume medio.
  5. Engadimos a caiena cortada finiña, o sal, o ourego e o prebe Perrins, remexemos.
  6. Cortamos os tomates de lata e engadímolos á pota. Tapamos e deixamos cocer 15 minutos a lume medio.
  7. Engadimos os feixóns, prbamos o guiso por se hai que corrixir o sal. Deixámolo cocer 15 minutos máis.
  8. Servímolo quente acompañado de nachos (chips de tortilla mexicana) e queixo Cheddar ou Emmental. Tamén queda ben con arroz branco ou cachelos ;).

Que aproveite!

chili_carne_1


Gaspacho clásico

Logo de probar versións máis exóticas do gaspacho (este de amorodos e mazá, ou este de manga con polo), imos despedir esta temporada cunha receita cada vez máis popular: o gaspacho andaluz clásico. Nesta receita os ingredientes son moi importantes, canto mellor o tomate e as verduras, mellor o gaspacho! O aceite tamén é importante, paga a pena botarlle un de calidade. Como todas as sopas e guisos, está mello ao día seguinte de facelo.

Dicir clásico é un pouco arriscado, porque cada un ten unha receita distinta da súa casa: eu fixen un mix de varias que me deron tendo en conta que tanto o pemento e o allo crus repítenme, así que puxen pouco de cada un. Hai xente que o prefire sen cogombro, con cebola, etc. As posibilidades son infinitas, e aínda queda moito verán para facer experimentos!

Ingredientes (para 3-4 racións)

1 quilo de tomates maduros

1 pemento verde italiano

Medio cogombro pelado

Un dente de allo

Un anaco de pan reseso

Media culleriña de sal (é mellor botar pouco ao principio e corrixir ao final)

4 culleres de vinagre de viño branco

4  ou 5 culleres  de aceite de oliva virxe extra

Un belisco de comiño (opcional)

  1. Lavamos os tomates, quitámoslles o corazón (a parte do talo e maila parte blanca de dentro). Cortámolos en dadiños. Se non vos gusta a pel, podedes escaldalos en auga fervendo durante 1 minuto, despois sairá con moita facilidade.
  2. Lavamos e cortamos o cogombro en rodiñas ou dados
  3. Lavamos e cortamos o pemento, quitándolle as sementes.
  4. Cortamos o allo o máis picado que poidamos.
  5. Mollamos o miolo do pan reseso en auga fría (tiramos ca codia).
  6. Botamos todos os ingredientes nunha trituradora ou non bol de batedora e batemos ata que se mesture todo. Probamos e correximos o vinagre e o sal segundo o gusto de cada un.
  7. Gardámolo na neveira e servímolo frío, acompañado de panciños, tomate  e/ou cogombro cortado, e un pouco de aceite de oliva.

Que aproveite!

gaspacho_clasico1


Crema rubia de verduras

Esta semana temos unha crema de verduras, que xa hai tempo que non caía ningunha por aquí. O nome venlle da cor que ten, grazas aos pementos de Piquillo e ao tomate. Aproveito para recomendarvos este post de César Lorenzo que explica moi ben as distintas tonalidades de pelo en galego, e por extensión, o significado de rubio, moitas veces esquecido ;)

Esta crema ten un sabor moi suave, sen dúbida é moi boa opción para as ceas e primeiros pratos... Que vos parece a idea?

Ingredientes (para catro racións)

Unha cabaciña

Unha cebola

Un tomate maduro

120 gr. de pementos do Piquillo

3 culleres de puré de pataca en po

1 pastilla de caldo (de polo ou verduras, o que vos guste máis)

Un belisco de sal

Media culleriña de ourego

2 ou 3 culleres de aceite de oliva, máis un pouco para decorar

  1. Lavamos e pelamos as verduras. Se queredes pelar o tomate, mellor fervédeo 30 segundos en auga quente, desde xeito a pel será moi fácil de retirar.
  2. Cortamos a cabaciña en rodas de algo menos dun centímetro, o mesmo ca cebola. Cortamos o tomate en anacos e metémo todas as verduras frescas, a pastilla de caldo, o ourego e o sal nunha pota.
  3. Botámoslle auga ata cubrir as verduras, e deixamos cocer aproximadamente 20 minutos, ata que estea todo brando.
  4. Engadimos os pementos de Piquillo e e o aceite e batemos ca batedora ata conseguiren unha textura homoxenea. Se queda moi líquido, ide engadindo o puré de pataca;se vos gusta como está, entón non fai falla.
  5. Servimola quentiña, decorada cunhas pingas de aceite

Que aproveite!

crema_rubia1


Prebe de pemento asado - massa de pimentão

Todo un clásico da gastronomía portuguesa, a massa de pimentão e a base de moitos pratos, e ademáis, é moi doada de facer! O único pero é que hai que preparala cun día de antelación, pero despois dura varios días no frigorífico.

É difícil de crer que con tan poucos ingredientes saia unha cousa tan boa. A primeira vez que a fago na casa e non podo estar máis satisfeita co resultado: un mollo dunha bonita cor laranxa-vermella e cun sabor intenso (pero non picante!). É un ingrediente ideal para "adobar" bocadillos e tostas, e a semana que ven imos cociñar un prato ideal para o Nadal no que tamén se emprega, estade atentos!

Ingredientes (para 350 ml. de prebe, aprox.)

3 pementos vermellos grandes

2 dentes de allo

6 culleres de aceite de oliva virxe

2 culleres de sal gordo

 

  1. Lavamos os pementos, cortámolos pola metade e quitámoslles as sementes e as partes brancas. Cortamos en tiras de 3 cm. de diámetro, aproximadamente.
  2. Nun bol ou tupper grande, imos colocando as tiras, esparexendo o sal aos poucos. Remexemos cas mans para que quede ben distribuído.
  3. Deixamos repousar 24 horas a temperatura ambiente.
  4. Lavamos as tiras de pemento para quitarlle todo o sal que se poida e secámolas cunha rolla ou papel de cociña.
  5. Prequentamos o forno a 180º e colocamos papel de forno na bandexa. Poñemos as tiras ca pel cara arriba e cocémolas na parte de enriba do forno ata que estean negras. Ha levar 15 ou 20 minutos.massa_pimentao3
  6. Deixamos arrefriar e retirámoslles a pel. Ten que sair con facilidade.
  7. No vaso da batedora colocamos as tiras e os dous dentes de allo, picados. Batemos, e despois engadímoslle aceite de oliva, e batemos ata que teña unha textura homoxenea.massa_pimentao5massa_pimentao4

Este prebe pódese conservar no frigorífico durante dúas semanas, se está ben pechado. Como é un pouco forte e facelo leva moito tempo, tamén é boa idea conxelar unha parte nun recipiente de plástico, mellor se é hermético.

massa_pimentao1

 

 


Carne richada

A carne richada é un deses pratos que non coñecía para nada ata hai un par de anos. Non entendo moi ben como na zona Ourense a xente (case) nunca cociña isto, estando tan boa como esta. Como en todas as receitas tradicionais, hai 1000 versións diferentes e cada un di que a súa é a mellor: hai richada de Forcarei, da Peroxa, de Silleda, etc.

Eu fixen unha mestura de receitas que vin por aí e o meu gusto persoal: os pementos vermellos non me sentan ben e cambieinos polos de piquillo, que lle dan unha sabor doce moi interesante.

A miña recomendación principal é que a carne sexa moi boa e tenra: a que máis se emprega para este prato é a croca da vaca, pero vale calquera que non teña moito nervio nen moita graxa. Espero que vos guste, se tendes suxestións, ideas... deixádeas por favor nos comentarios!

Ingredientes (para 4 racións)

800 gr. de carne de vacún

100 gr. de tiras de pementos de piquillo

1 pemento verde

1 cebola grande

Unha presa de fariña de trigo

1/2 vaso de viño branco

Aceite de oliva

Sal e pementón (doce, picante ou mesturado: o que máis vos guste)

  1. Cortamos a carne en tiras pequenas, engadimos o sal e o pementón, rebozámolas na fariña. Retiramos a un prato.
  2. Cortamos a cebola e os pementos en tiras finiñas.carne_richada
  3. Nunha tixola quentamos o aceite e fritimos a cebola e os pementos a lume medio, ata que estean brandos. Retiramos a un prato.carne_richada3
  4. Engadimos un pouco máis de aceite na tixola e fritimos a carne, durante pouco tempo. Cando estea pasada polos lados (na foto, obvio, só esta lista por un), baixamos o lume e engadimos o viño branco. Cocemos durante 2 minutos máis. Mesturamos co pemento e a cebola, remexendo ben para que os sabores se mesturen.
  5. Servimos de seguida, acompañados de cachelos ou patacas fritidas, ao gusto de cada un!

carne_richada2

Que aproveite!