Xeado de pexego con framboesa

Coñecedes o Peach Melba? é unha sobremesa bastante famosa nos países anglosaxóns, e consiste en pexegos cocidos nun xarope, acompañados dunha xelatina de framboesa todo sobre un xeado de vainilla. Débelle o nome á cantante de ópera Nellie Melba, a quen lle adicou o cociñeiro a súa creación.

A cousa é que eu non o coñecía e tampouco o probara, pero buscando receitas novas de xeado xurdiu unha que combinaba todo nun. Aproveitade para facelo, gardalo e lembrar nuns días as últimas calores do verán ;)

Ingredientes (para 600 ml de xeado)

2 pexegos, pelados, sen óso e cortados

200 ml de nata para bater (35% MG)

40 ml. de zume de pexego

40 ml. de leite enteiro (gordo)

60 gr. de azucre avainillado

Unha culler de zume de limón

Un belisco de sal

Para a pasta de framboesa

100 gr. de framboesas

Unha culler de ron

Dúas culleres de azucre de caña

  1. Nunha tixola, quecemos o zume de pexego, os anacos de pexego e o azucre a lume medio, ata que estean brandos.
  2. Deixamos arrefriar, lonxe do lume.
  3. Mentres, imos preparando a pasta de framboesa: nun bol mesturamos todo e esmágamolo cun garfo. Metemos no frigorífico
  4. Cando a mestura do punto 1 estea fría, botámola nun bol ca nata, o leite e o limón, pasamos a batedora ata que teña unha textura homoxénea e aveludada.
  5. Deixamos no frigrífico 1 hora, e despois metémolo 10 minutos no conxelador.
  6. Imos botando a mestura na xeadeira, seguindo as instruccions do fabricante.
  7. Estendemos nun recipiente de plástico, intercalando capas da pasta de framboesa. É recomendábel deixar repousar media hora no frigorífico antes de comelo.

Que aproveite!

xeado_pexego_2

xeado_pexego_1


Cookies de pexego e noces de Macadamia

Seguimos cos postres e merendas con froita, pero esta vez desecada, que os pexegos xa non están en tempada. O truco desto é non cocelas moito, tanto ten se quedan brandas, ao enfriar endureceran pero quedarálles o centro brandiño e suave. De aí que non as chame galletas, son unha cousa un pouco distinta.

Duran tres ou catro días se as gardades nun pote ben pechado, tamén podedes facer a masa e gardala no conxelador para facer as cookies outro día.

Ingredientes

125 gramos de fariña

100 gramos de manteiga, derretida

100 gramos de pexegos desecados (adoitan vendelos preto das uvas pasas, tamén valen albaricoques)

75 gramos de noces de Macadamia (eu conseguinas no Eroski)

60 gramos de azucre moreno

50 gramos de azucre glass

1 ovo

Unha culler de ron dourado

1/2 culleriña de sal

1/2 culleriña de lévedo químico (tipo Royal)

pexego-noces3

  1. Prequentar o forno a 170º
  2. Colocar papel de forno na bandexa negra (non na do grill, que senón quedan raias).
  3. Nun bol, mesturar a manteiga cos azucre, bater ata que claree un chisco e teña un aspecto homoxeneo.
  4. Engadir o ovo e o ron, seguir batendo.
  5. Nun prato, mesturar a fariña, o lñevedo e o sal. Botar aos poucos no bol mentres batemos.
  6. Cortamos os pexegos secos en anacos moi pequenos e botámolos na masa.
  7. Repartimos a masa en na bandexa (unha culler de masa será dabondo para unha galleta) e decoramos coas noces partidas pola metade.
  8. Cocemos durante 10 ou 15 minutos, na altura media do forno para que non queimen por riba.

pexego-noces2

Que aproveite!

PD: Por se vos gustou, recupero unha receita con froita disecada, pan con tomates e cebola.