Pizza de centeo con espinacas e queixo azul

"Mariquiña da forneira/ se coceres faime un bolo,/ se mo fas, faimo de trigo,/ que centeo non cho como." Este refrán, tirado da Galipedia ilustra  preferencia que se tiña antes pola masa de fariña triga, xa que era máis branca e nutritiva ca de centeo. O que non tiñan en conta é o sabor tan rico do centeo, e a vida que lle da ás masas ;) Esta masa non queda tipo crocante, é máis ben esponxosa, pero así aguanta ben todo o que leva por riba!

Para facer esta receita usei fariña de centeo semi-integral, pero podedes usar a que queirades, xa que ao ir mesturada ca de forza, ha subir igualmente. Sobre o resto dos ingredientes, unhas pequenas anotacións: a mozzarella de búfala é moito mellor cá de vaca (é máis cara, pero ás veces paga a pena), a pasta  concentrada de tomate atópase nas grandes superficies e tamén vai moi ben para botarrle ó caldo de verduras e por último, as espinacas que empreguei son en conserva, deste xeito é moito máis rápido e práctico.

Ingredientes (para 3 ou 4 racións)

Para a base:

150 gr. de fariña de centeo

150 gr. de fariña triga, de forza + unha presa para amasaren

15 gr de levadura fresca

200 ml. de auga morna

Unha culleriña rasa de sal

2 culleres de aceite de oliva virxe extra 

Para a cobertura:

2 culleres de pasta concentrada de tomate

4 culleres de aceite de oliva virxe extra

1 bóla de mozzarella de búfala

200 gr. de espinacas cocidas e escoadas

60 gr. de queixo azul (roquefort, gorgonzola, etc)

  1. Colocamos a levadura fresca nun vaso, enchémolo con auga morna. Deixamos repousar 10 minutos.
  2. Nun bola grande mesturamos as dúas fariñas co sal e remexemos ben. Facemos un oco no medio e botamos o aceite e a auga do paso 1.
  3. Coa axuda dunha culler de pau, mesturamos ben a masa ata que estea homoxénea, tapamos o bol cunha rolla ou film transparente e deixamolo estar a carón dun radiador 1 hora polo menos. Se fose verán, non cómpre radiador (obvio).
  4. Prequecemos o forno a 200º.
  5. Cando a masa xa estea levedada, estendemos fariña nun mesado e amasamos un pouco cas mans, ata que non se pegue.
  6. Estendemos un papel de forno sobre a bandexa negra do forno e colocamos a masa. Estendémola tendo conta de que quede igual de grosa en todos os sitios.
  7. Botamos dúas culleres de aceite de oliva por riba, xunto ca pasta de tomate. Coa axuda da culler, estendémolo ben.
  8. Cortamos a mozzarella en anacos pequenos e repartímola coa espinaca por toda a pizza. Despois engadimos o queixo azul, tamén en anaquiños: o importante é que haxa de todos os sabores por toda a superficie. Despois botamos dúas culleres de aceite por riba.
  9. Cocemos a pizza na bandexa media do forno durante 20 miniutos, aproximadamente.
  10. Deixámola arrefríar uns intres fóra, colocada na bandexa de rexas do forno.

Que aproveite!

pizza_centeo_1

pizza_centeo_3

 

 


Pizza rápida de xamón e brócoli

Canto mais se cociña, máis se aprende a aroveitar ingredientes soltos que andan no frigorífico ou na despensa. A idea para esta pizza xurdiu de comer o brócoli que quedaba dun xeito mís apetitoso que cas patacas cocidas ou de guarnición, e o resultado foi delicioso... Se non tendes brócoli, probade a substituilo por acelgas, espinacas ou grelos, ha queda ben seguro!

O da pizza rápida, igual ca empanada, é un dicir, depende de con que o comparemos. Se é cunha pizza precociñada é moi lento, pero comparado a facer unha pizza con 24 horas de antelación para que fermente ben, entón si que parece rápido. Se vos dicidides a facer esta receita, contade unha hora e media de antelación para darlle tempo a levedar e preparar todos os ingredientes.

Ingredientes (para 3 ou 4 persoas)

300 gr. de fariña de forza, máis un chisco para amasar (para isto vale a triga normal)

200 ml de auga morna

20 gr. de fermento fresco

Media culleriña de sal

Unha culler de aceite de oliva

Para a cobertura

2 ou 3 culleres de mollo de tomate

Unha bola de mozzarella

2 ou 3 "pólas" de brócoli cocido

75 gr. de xamón serrano ou paletilla

Unha presa de queixo relado (tipo emmental, gouda, etc.)

Unha presa de cebola crocante (das que se usan para hot dogs, é opcional)

Un belisco de sal

  1. A masa de pizza é moi doada de facer: Nun bol  grande botamos a fariña e o sal, remexemos e facemos un oco no medio. Disolvemos o fermento na auga e metémolo no burato xunto co aceite.
  2. Remexemos cunha espátula ata formaren unha masa pegañenta pero que se separe das mans. Estendemos un pouco de fariña no mesado e amasamos. Colocamos a bola de volta no bol e tapamos cunha rolla ou film transparente.
  3. Deixamola estar nun sitio tépedo (a carón dun radiador, por exemplo) ata que doble o seu tamaño. Ha tardar unha hora, aproximadamente.
  4. Cortamos papel de forno para que teña a medida da bandexa e colocámolo no mesado. Estendemos a masa e ca axuda dun rodillo ou botella (ou cos dedos) facemos un rectángulo cun grosor máis ou menos homoxéneo.
  5. Prequentamos o forno a 250º
  6. Cortamos a mozarella en rodas finas, o brócoli en anaquiños pequenos e o xamón en tiras.
  7. Estendemos o mollo de tomate, colocamos a mozarella, o brócoli, o xamón, o queixo relado e a cebola, se a queredes. Que quede todo ben repartido, deixando unha marxe dun ou dous centímetros para que non desborde. Repartimos o sal por riba.
  8. Cocemola a altura media durante 15 minutos, ou ata que estea dourada polas beiras.

Que aproveite!

pizza-rapida-brocoli-3  pizza-rapida-brocoli1


Pizza "Cebreira"

Nun principio o nome da pizza ía ser "pizza con masa de millo, bonito, cebola e queixo do Cebreiro", pero como non caibía, queda abreviado que soa mellor. Quen sabe se se algún día se converterá nun nome de uso común :D

Como podedes ver nas fotos, o resultado é un pouco "focacciesco", porque non estendín a masa dabondo e creceu demáis. Además, o queixo do Cebreiro non derrerta tan ben coma a mozarella, pero paga a pena polo sabor tan especial que le dá.

Isto das masas vai un pouco por gustos, se vos gusta a gordiña e suave facédela tal cal, se queredes algo máis fino e crocante, podedes ler uns consellos no blogue "Uno de dos", grandes expertos neste tema. O do ourego dentro da masa vén de Kukinhas, que ten unha estupenda selección de pizzas, entre moitas outras receitas. A mín gustame o efecto estético, pero podédelo poñer co queixo, quedará un sabor máis intenso.

Ingredientes (para unha pizza grandona)

100 gr. de fariña milla

100 gr. de Maizena

100 gr. de fariña de forza (a que venden na panadería)

200 ml. de auga morna

12 gr. de lévedo fresco

1 culler de aceite de oliva virxe + un chisco para o final

3 culleriñas de pasta de tomate concentrada (pódese substituir por tomate fritido)

180 gr. de queixo do Cebreiro

1 lata de ventresca de bonito

1/2 cebola morada

1 culleriña de ourego

Aceite de oliva virxe ao gusto

Sal

  1. Nun bol, mesturamos todas as fariñas cun media culleriña de sal e o ourego, remexemos.
  2. Botamos a metade da auga morna nun vaso e derretemos o lévedo dentro.
  3. Engadimos a auga (a do lévedo e a outra) a modiño mentres remexemos. Botamos tamén a culler de aceite e seguimos remexendo ata que a masa case non quede pegada ás mans.prep1
  4. Facemos unha bola, metémola no bol, tapámolo cun pano e dexamos repousar 2 horas. Se vai frío, deixádeo máis tempo. Este é o aspecto despois de pinchalo un poucoprep2
  5. Sacamos a masa do mol e amasamos un par de minutos.
  6. Colocamos papel de forno nunha bandexa e esparexemos un pouco de fariña milla, para que non quede pegado. Estendemos a masa todo o que poidamos.prep3
  7. Prequentamos o forno a 180º pola parte de abaixo.
  8. Untamos a pasta de tomate, engadimo o queixo esfarelado, o bonito e maila cebola en rodas. Rematamos botando un pouco de aceite e sal.
  9. Cocemos na segunda balda do forno (empezando por abaixo) durante 15-20 minutos.
  10. Acendemos o forno pola parte de arriba tamén, subimos a bandexa dúas baldas e deixamos 5 ou 10 minutos máis.Pizza "Cebreira", con queixo de Cebreiro

E vós? Anivádesvos a facer pizza na casa?

Que aproveite!

Pizza "Cebreira", con queixo do Cebreiro


Coca de cabaciña con salchichas e pementos

Se, como di aquel, unha pizza é unha empanada mal feita, a coca sería unha versión aínda peor :D En realidade é moi semellante á pizza, só que non adoita levar queixo e a masa é un pouco distinta: ao principio as cocas eran o xeito de aproveitar a masa do pan que non levedara. O nome "coca" vén de la palabra kok do neerlandés, e ten o mesmo raigame que os cake inglés ou o kuchen alemán. Son típicas de Baleares, Cataluña e o Rosellón, e poden facerse doces ou salgadas.

Como o que eu quería era algo rápido, fixen un chisco de trampa e usei masa de follado xa feita. Para que non soba moito hai que pinchala cun garfo varias veces. Tamén podedes usar masa tipo brisa, ou facela vós segundo esta receita en vídeo. Respecto ás salchichas, eu usei as tipo nuremberger, que son as que máis me gustan, pero valen de calquera tipo.

Ingredientes para unha coca de 28 cm. de diámetro aprox)

Un paquete de masa de follado redonda

1 cabaciña grande

150 gr. de pementos de piquillo

4 salchichas pequenas cortadas en rodas

Aceite de oliva ao gusto

Sal e pementa

  1. Sacamos a masa da neveira e deixámola repousar 5 minutos. Pinchámola varias veces co garfo.
  2. Prequentamos o forno a 180º
  3. Quitámoslle a tona á cabaciña cun pelador. Eu deixo un pouco porque queda logo máis bonito, pero vai a gustos. Cortámola ao longo pola metade.
  4. Facemos lonchas finiñas (2-3 milímetros) ao longo co mesmo pelador. Pódese facer cun coitelo, pero leva máis tempo.prep1
  5. Botámos un pouco de aceite de oliva encima da masa, estendémolo cunha espátula ou culler.
  6. Engadimos a cabaciña, as salchichas e os pementos cortados en anacos finos. Botamos un chisco de aceite por riba, preferentemente en espiral ou facendo zigzag, para repartilo mellor. Engadimos un pouco de sal e pementa.
  7. Cocemos no forno durante 25 minutos ou ata que as beiras douren e as verduras queden brandiñas.

Que aproveite!

coca