Vasiños de crema de mascarpone e cereixa

Xa levamos varias receitas con mascarpone nesta casa: o tiramisú e a pasta con espicanacas e mascarpone, pero a verdade e que por textura e sabor é un queixo moi versátil. A proposta desta semana e dunha sobremesa ben fresquiña, xa pensando nese verán que tanto está tardando :)

Ingredientes (para 8 vasos pequenos ou 5 normais)

250 gr. de cereixas sen óso

250 gr. de mascarpone

2 ovos

120 gr. de azucre

2 culleres de azucre avainillado (haino no Froiz, p.e.)

1 lámina de xelatina neutra

Un chisco de canela en po

10 galletas de manteiga tipo bretón (opcional, só se queremos unha base crocante)

 

  1. Se queredes unha base de galletas, esmagádeas coa trituradora, repartídeas nos vasiños aplastando cunha culler para que collan a forma.
  2. Lavar e escoar as cereixas, quitarlles o óso (é mellor usar un pauciño, coma xa explicara na torta de cereixas Twin Peaks). Reservar un feixe delas para decoraren ao final.
  3. Poñer a lámina de xelatina en remollo en auga fría durante 5 minutos.
  4. Meter as cereixas nunha pota coa lámina de xelatina (que ha derreter) a metade do azucre e maila canela. Cocer a lume medio durante 20-25 minutos. Pasar pola batidora para facer un puré. Deixar arrefriar.
  5. Romper os ovos separando as xemas das claras.
  6. Nun bol grande, bater as xemas co resto do azucre e o azucre avainillado. Cando estea mesturado, engadir o mascarpone aos poucos ata que a masa sexa homoxénea.
  7. Bater as claras ata que estean firmes, e ir engadindo a modiño á mestura do bol.
  8. Poñemos crema do mascarpone en cada vasiño ata a metade máis ou menos, engadimos por riba o puré de cereixa. Podemos decorar cas cereixas que queden enteiras (eu cominas polo camiño :D)
  9. Deixamos repousar no frigorífico unhas 6 horas coma mínimo.

Se non vos gustan as cereixas, podedes probar a facelo con amorodos, amoras ou incluso mango! Que aproveite!

vasinho_mascarpone4vasinho_mascarpone2vasinho_mascarpone5

 


Cheesecake de queixo de cabra e iogur grego

Hai tempo que quería probar a facer unha torta de queixo estilo americano na casa, pero querría probar algo un chisco distinto, así que fixen unha adaptación desta, pero engadindolle noces á base (idea que penso repetir, queda moito máis rica) e cambiando as galletas de vainilla polas de avea para que non quede tan doce. A verdade é que estou moi satisfeita co resultado: semella levar máis traballo, pero en 20 -30 minutos máis o tempo de cocción está lista, un triunfo asegurado!

Unha receita axeitada para aqueles que non moi larpeiros (hai xente para todo!), xa que se a tomades sen mel ten un regusto salgado moi agradable. Agora que comeza o bo tempo é moi boa idea levala coma sobremesa dun picnic ;)

Ingredientes (para un molde de 25 cm de diámetro) :

360 gr. (dous paquetes) de queixo rulo de cabra

125 gr. de queixo para untar

1 iogur grego 

2 ovos

75 gr. de azucre

Para a base

20 galletas de avea tipo "Digestive"

80 gr. de manteiga

Unha presa de noces peladas e picadas

Nota: esta torta é mellor facela nun molde desmontable.

 

  1. Esmagamos as galletas, derretemos a manteiga e triturámolo todo xunto cas noces ata formaren unha pasta homoxénea. Se vedes que queda moi seca, engadide unhas pingas de auga para que estenda mellor.
  2. Prequentamos o forno a 180º.
  3. Quitámoslle a codia aos rulos de cabra e cortámolos en rodas de 2-3 cm.
  4. Metemos as rodas nun bol xunto co queixo para untar e quentámolos no microondas a potencia media para que abranden.
  5. No bol dos queixos botamos o azucre e batemos ca batedora. Cando estea ben mesturando engadimos os ovos, un de cada vez.
  6. Colocamos papel de forno no molde desmontable. Estendemos a pasta base esmagándoa ben cunha culler.
  7. Vertemos a pasta de queixo a modiño, alisamos a superficie para que non quede burbullas.
  8. Cocemos a torta no forno durante 45 aproximadamente. Se vos gusta cremosa, sacádea antes: aínda que o centro estea líquido callará pouco a pouco. Se vos gusta más compacta, deixadea ata que saian manchas na superficie, como fixen eu.
  9. Deixamos repousar 6 horas, coma mínimo.
  10. Decoramos con mel e servimos.

Que aproveite!

cheesecake-cabra1cheesecake-cabra3


Tiramisú

As orixes do tiramisú son incertas: hai que di que se inventou nun burdel para "animar" aos clientes, outros din que se lles daba ás mulleres que acababan de parir, ou aos mariñeiros de cea, cando chegaban de traballar. "Tira mi su" vén sendo algo así como "levantáme" en italiano, así que ten sentido para todas esas explicacións. O que si é seguro é que se trata dun postre moderno, dos anos 60, que se orixinou no Veneto e o Piamonte, malia que xa está estendido por toda Italia e máis aló!

Unha receita clásica, que se pon de moda cada certo tempo e que é moi doado facer na casa. E ademáis, non cómpre forno! Como é unha receita tan popular cada casa ten as súas versións. Esta é unha mestura entre un par de recomendacións de amigos italianos e os consellos deste artigo.

O de montar as claras é para que quede máis lixeiro, e se queredes que saia aínda máis leve, non engadades as xemas. Tamén podedes quitar o alcol, ou a pel relada do limón. O caso é ir probando ata que deades ca versión perfecta para vós!

Ingredientes (para 6- 8 racións)

400 gr. de queixo mascarpone

4 ovos

200 gr de biscoitos tipo savoiardi - tamén chamados de ovo, ou lady fingers por algunhas marcas

200 ml de café recén feito

75 gr. de azucre

2 culleres de ron dourado - tamén vai ben o viño de Porto

Cacao en po sen azucre, ao gusto de cada un

Un belisco de sal

Un chisco de pel relada de limón ou de laranxa - opcional

Utensilios: molde pouco fondo (mellor se é transparente), batidora de variñas.

  1. Separamos as xemas dos ovos e gardámolas nun vaso.
  2. Batemos as claras co sal ata que monten e queden duras, mellor se usamos unha batidora de variñas. Reservamos.
  3. Nun bol grande, batemos as xemas co azucre ata que quede unha masa pálida.
  4. Quecemos un chisco o queixo mascarpone no microondas (potencia media, ha de quedar tépedo) para que se mesture mellor.
  5. Engadimos o mascarpone pouco a pouco á masa das xemas, batendo para que non queden grumos.
  6. Engadimos a pel relada do limón se a queremos, e as claras a punto de neve. Batemos a man, para non quitar o ar e que a crema quede máis lixeira.tiramisu
  7. Nun prato fondo botamos o café e o alcol. Mollamos os biscoitos rapidamente (xa colleran a humidade cando repousen) e colocámolos facendo unha capa no molde.prep2
  8. Botamos unha capa da crema, cubrindo ben os biscoitos. Repetimos a o proceso para unha segunda capa de biscoitos/crema.prep3
  9. Esparexemos o cacao e deixamos o molde toda a noite no frigorífico.

Coñecedes máis versións do tiramisú? Contádeo nos comentarios!

tiramisu3 tiramisu5


Torta bicolor - Marmor kuche

Esta receita ten orixe alemá, onde se fai no inverno (como se pode adiviñar, ten calorías arreo). Triunfa bastante cos nenos porque ao abrila queda moi bonita: marmor quere decir mármore, polas vetas.

Esta é unha variante un pouco máis lixeira, cambiando o cacao pola marmelada de amoras. Ten un toque un pouco semellante á bica, e queda bastante seca: é ideal para mollar no te ou no café, mais non aguanta moitos días sen se converter nunha pedra. Se vos pasa, sempre podedes facer un pudin con ela.

Ingredientes (para unha torta de 8-10 racións)

3 ovos

375 gr. de fariña

250 gr. de azucre

125 ml. de aceite de xirasol + un pouco para engraxar

1 culleriña de fermento tipo Royal

4-5 culleres de marmelada de amoras (ou arandos)

Un chisco de pel relada de limón

Un chisco de sal

  1. Separamos as claras das xemas.
  2. Nun bol grandeiro, cun batedor de variñas, facemos as claras a punto de neve ata que estea consistente.
  3. Noutro bol, botamos as xemas e mais o azucre e batemos ata que a masa quede de cor pálida.
  4. Engadimos o aceite, seguimos batendo.
  5. Mesturamos a fariña co fermento e o limón, despois vertemos a mestura (a modiño) no mesmo bol onde antes botamos o aceite.
  6. Engadimos con moita conta o punto de neve no segundo bol, para non romper as burbullas de aire temos que bater ca man.
  7. Prequentamos o forno a 180º
  8. Engraxamos un molde e vertemos a metade da masa dentro.
  9. Botamos a mermelada no bol e mesturamos ben ata que a masa estea oscura e homoxenea.
  10. Cunha culler, botamos o resto da masa facendo pegotes na superficie da masa branca.
  11. Cun coitelo pequeno ou unha variña, remexemos un pouco para que se fagan "vetas" no interior da masa.
  12. Cocemos durante 40 minutos, aproximadamente. Para saber se está listo, introducide un coitelo limpio no medio, se sae seco é que xa está.

Que aproveite!

torta4 torta3


Madalenas de nata e noces

Un almorzo ou merenda ben calórico para estes días de frío. Non se me ocorre que dicir para presentalas, se as facedes, o sabor fala por sí mesmo! Só engadir un par de anotacións:

  • Con esta receita as madalenas non van subir como as que están feitas con aceite de oliva.
  • Ás veces recomendo cousas que me gustan moito (por gusto, non é que cobre de ninguén!) e desta vez son os moldes de silicona. Ao principio dábanme grima porque pensaba que non aguantarían ben, pero resisten todo, incluído o lavalouza.

Ingredientes (para 15 madalenas, aproximadamente):

3 ovos

225 gr. de fariña

125 de azucre de caña

200 ml. de nata de montar (35% MG)

1/2 sobre de lévedo químico

100 gr de noces

Un chisco de sal

Moldes de silicona; ou moldes de papel+unha bandexa par madalenas

 madalenas3

 

 

 

 

 

  1. Nun bol grande, batemos ben os ovos para que collan aire.
  2. Engadimos o azucre e seguimos batendo.
  3. Repetimos o proceso coa nata e coa fariña e o lévedo.
  4. Deixamos reposar a masa no frigorífico durante 20-30 minutos. O contraste entre o frío e a calor do forno fara que a masa soba máis.
  5. Prequentamos o forno a 170º, enchemos os molde masa ata a metade: tede conta con isto, que se vos pasades desbordan.
  6. Cocemos as madalenas no forno durante 15 minutos. Recoméndovos poñer a bandexa no medio, para que non queimen por riba. Cando estean redondiñas pola parte de arriba e esta estea dourada, sacámolas e deixámolas repousar. O tempo de cocción é orientativo, varía dependendo do forno, prestádelle atención por se acaso: se o deixades demáis (aínda que non queimen), baixa a masa e non quedan tan boas.

madalenas2

Fixestes madalenas na casa? Como foi  experiencia? Contádeo nos comentarios, ou no Twitter