Ensalada de quinoa, tomate, abacate e xarda

A quinoa é un ingrediente que non me inspiraba moito ao principio (canto tempo hai que está dispoñible, catro ou cinco anos? non sei) pero que cada vez uso máis porque en realidade é moi versátil. A que se vende en tendas ao granel adoita se máis cara (6€/quilo) pero o Lidl ten unha máis barata producida en España que ben vale para o que imos facer. Tamén podedes usala un ollo a esta quinoa con rustrido de lentellas, que fai moito avío para o día seguinte.

Os que sexades vexetarianos podedes cambiar a xarda por queixo feta, o que importa é o punto de salgado que lle dá á ensalada. Outra recomendación é usar un vinagre acedo ou zume de limón, xa que un de tipo doce (Módena) non fai tanto contraste e non queda tan rico.

Ingredientes (para dúas racións)

150 gramos de quinoa cocida

Un tomate grandeiro

Unha lata de xarda en aceite de oliva

Un belisco de sal

Aceite e vinagre ao gusto

Pementa negra (opcional)

  1. Cortamos o abacate pola metade longa, sacamos a carozo e retiramos a polpa cunha culler. Cortámolo en dados. Nota: É importante que todos os ingredientes estean a temperatura ambiente.
  2. Cortamos o tomate tamén en dados, sacamos a xarda da lata e esmagámola cun garfo para facer anacos coma os da foto.
  3. Repartimos a quinoa en dous pratos fondos, facendo un oco no medio para que quede máis bonito despois.
  4. Engadimos o tomate e o abacate, e despois a xarda (ou queixo feta, se optades pola opción vexetariana).
  5. Botamos un pouco de aceite e vinagre, sal e pementa ao gusto.
  6. Servimos!

Que vos parece? Usades moito a quinoa? Para que cousas? Deixade a resposta nos comentarios, ou no noso Twitter.


Gratin de tomate e allo porro con queixo

Os que teñades tomates de horta de sobra, que sorte tendes! Esta semana temos unha receita para aproveitar os máis maduros (se non son de horta tamén valen, eh) nun marabilloso gratín que serve como acompañamento ou como prato lixeiro de seu, acompañados de pan torrado.

O queixo que usei para facer esta receita era unha mestura desas que veñen xa feitas, de gouda e gruyère. En realidade vale calquera queixo graxo pero non moito, un de San Simón relado na casa iría ben, ou incluso un do Cebreiro en faragullas. Se facedes unha versión diferente, deixadea nos comentarios, ou no Twitter, que sempre fai ilusión.

Receitas semellantes a esta: cabaza gratinada con mozzarella, berenxenas con queixo Afuega'l pitu ou barcas de cabaciña con queixo San Simón,

Ingredientes (para 4 racións de acompañamento, ou 2 pratos principais):

2 tomates maduros grandes

2 allos porros medianos

100 gr. de queixo relado

4 culleres de aceite

Sal e ourego ao gusto

  1. Prequecemos o forno a 180º.
  2. Lavamos e cortamos os tomates en dados. De cada tomate teñen que saír 12-16 pezas.
  3. Lavamos os allos porros e quitámoslles a capa exterior e a parte verde das follas. Córtamolos en vertical e se a bandexa é pequena, en horizontal, para que caiban.
  4. Untamos a bandexa do forno con 2 culleres de aceite (eu usei aceote en spray, que é máis práctico).
  5. Colocamos os allos porros e por riba deles, os tomates. Encaixamos todo para que non queden ocos.
  6. Botamos o resto do aceite, o sal e o ourego.
  7. Metemos a bandexa no forno e cocemos durante 45 minutos, remexendo de cando en vez.
  8. Cando as verduras esteán moi brandas e un pouco douradas, botamos o queixo por riba e deixamos cocer 5 ou 10 minutos máis, con calor só pola parte de arriba.
  9. Servímolo quente, ou gardámolo para o día seguinte.


Albóndegas de atún e piñóns con mollo de tomate

Despois dunha pausa por mor de non ter tempo para nada...estamos de volta! E con que receita, amig@s, unhas albóndegas que arrecenden e saben a gloria!

Este é un prato típico do Sur de Italia, pero non teño moita máis información, así que paso aos consellos: o atún pode ser conxelado en filetes deses, o que non pode ser é en conserva. E o queixo grana padano évos moi doado de atopar nos supermercados, é coma unha versión máis barata do parmesano que tamén o podedes usar, pero para mesturar con outras cousas non paga a pena pagar o prezo máis caro.

Se vos gustan as albóndegas, pasadevos por esta receita de carne e xamón, ou estas de carne mariñada. E as máis exitosas do blog: as de polo con ananás.

Ingredientes (para 4 racións, aproximadamente)

400 gr. de atún, fresco

100 gr. de pan relado

50 gr. de queixo "grana padano" relado

50 gr. de piñóns

2 ovos

4 ou 5 culleres de aceite de oliva virxe extra

Unha culleriña de ourego

Media culleriña de canela en po

O zume e a reladura dun limón

Un belisco de sal e outro de pementa negra

Aceite de xirasol para fritir

Para o mollo:

Unha cebola

2 dentes de allo

2 latas de tomates en conserva, en anaquiños

4 ou 5 culleres de aceite de oliva virxe extra

Unha culleriña de ourego

Unha culleriña de vinagre balsámico

Perixel (opcional)

  1. Primeiro preparamos o mollo quecendo o aceite nunha tixola grande e botando a cebola e o allo, cortados en rodas finas. Cociñamos a lume medio ata que a cebola estea semi-translúcida e branda.
  2. Engadimos o resto dos ingredientes do mollo e cocemos durante 15 minutos a lume medio, remexendo de cando en vez.
  3. Preparamos as albóndegas cortando o atún en dados pequenos, e fritíndoo co aceite nunha tixola ca canela e os piñóns.
  4. Engadimos o sal e a pementa e deixamolo estar 5 minutos.
  5. Botamos a mestura nun bol grandeiro e deixamos arrefriar.
  6. Botamos o pan, o ourego, o queixo relado, os ovos batidos, o zume e a reladura do limón dentro do bol.
  7. Esmagamos a mestura cun garfo e amasamos cas mans ata que se mesture todo ben.
  8. Facemos albóndegas do tamaño dunha noz grande, colocámolas nun prato para meter no frigorífico unha hora.
  9. Quecemos o aceite de xirasol na mesma tixola das albóndegas e fritímolas ata que estean douradas (ver foto inferior).
  10. Cando estean listas, imolas colocando nun prato forrado con papel de cociña para que absorba o exceso de aceite.
  11. Servimos co mollo e un pouco de perixel cortado: pódense comer con pan (recomendable para ir mollando) ou con pasta ou arroz branco.

Que aproveite!


Gratín de cabaza con mozarella

Despois dunhas semanas moi apuradas e sen tempo de actualizar, volvemos cunha receita de cabaza,  que aínda se atopa de tempada! Este é un gratín moi doado de facer, unha receita de orixe italiana que atopei no marabilloso libro "Las verduras de mmuchas maneras" de Karen Leiz (que foi un súper agasallo de Nadal).

Para que sexa máis doado, recoméndovos que merquedes a parte superior da cabaza, a que ten máis carne e menos sementes, porque é mello para facer rodas do mesmo grosor. Lembrade quitarlle a pel, restos de semente, etc. Se vos gusta a cabaza (ou cabacú, como lle chaman nalgunhas zonas), botádelle un ollo a estas sopa de cabaza con ameixas ou a esta crema rubia de verduras.

Ingredientes (para 3 ou 4 racións)

600 gr de cabaza en rodas de 2 cm de grosor.

250 gr. (dous paquetes) de mozzarella

Dúas latas de tomates triturados

100 gr de queixo parmesán relado

1 cebola grande

4 ou 5 culleres de aceite de oliva

1 culleriña de azucre

Fariña

Tomiño

Aceite de xirasol para fritir

Sal e pementa negra moída

  1. Cortamos a cebola ben picada e sofritimola na tixola co aceite de oliva ata que comece a dourar.
  2. Engadimos os tomates triturados, un belisco de sal, o azucre e un pouco de pementa. Remexemos ben e deixamos cocer a lume medio 15 ou 20 minutos.
  3. Prequecemos o forno a 200º.
  4. Botar fariña nun prato fondo e pasar as rodas de cabaza por ela, sacundíndoas despois para que só quede unha capa fina.
  5. Quecemos o aceite de xirasol nunha tixola grande e fritimos a cabaza ata que comece a estar marrón (ollo, non negra). Retirámolas a un prato con papel absorbente e botámoslles un chisco de sal por riba.
  6. Untamos unha fonte para forno cunha culler de aceite de oliva. Nela colocamos a metade das rodas de cabaza, e botamos a metade do mollo de tomate.
  7. Estendemos a metade da mozzarella en láminas, engadindo tomiño por riba e un pouco do queixo parmesán relado. Repetimos a operación.
  8. Cocemos no forno durante 20 minutos, e servimos ben quente.

Que aproveite!


Quinoa con rustrido de lentellas

A quinoa é un pseudo cereal (igual que o trigo mouro), moi típico da zona dos Andes. Os principais países produtores son Bolivia e Perú, onde é unha parte moi importante da súa alimentación. En Europa púxose de moda hai uns anos, grazas as súas propiedades nutritivas e a súa doada dixestión.

Para comprala podedes ir aos supermercados, onde venden paquetes preparados, ou nas tendas a granel que están a xurdir polas vilas e cidades, onde sae un pouco máis económica. Haina de tres tipos: branca, vermella e morada. A branca é a máis popular polo seu sabor neutro, as outras variedades teñen un sabor máis "terroso".

NOTA: É importante lavar a quinoa antes de cocela para quitarlle o sabor amargo.

Veredes que esta receita está no apartado vexetariano malia levar gambas, é porque son fácilmente substituíbles por pementos, alcaparras, caiena... o caso é experimentar!

Ingredientes (para catro racións, aproximadamente)

200 gr. de quinoa branca

200 gr. de lentellas cocidas

Dous tomates ben maduros (valen os pelados de lata)

Media cebola grande ou unha pequena

100 gr. de gambas peladas (ou pementos, alcaparras, etc.)

4 culleres de aceite de oliva virxe extra

Sal e pementa negra

  1. Nunha tixola grande botamos o aceite e quecémolo. Botamos a cebola cortada en tiras finiñas e baixamos o lume a intensidade media.
  2. Deixamos cocer 5 minutos e engadimos as gambas.
  3. Cocemos un par de minutos máis antes de botar o tomate cortado en dados, o sal e a pementa. Cocemos durante 5 minutos e botamos as lentellas.
  4. Cocemos 10 minutos máis, sempre a lume medio, apagamos e deixamos repousar.
  5. Para facer a quinoa hai que lavala antes con auga tépeda. Nunha tixola ou pota pequena botamos a quinoa, un chisco de sal e dúas partes (400 ml) de auga e cocemos a lume alto durante 20 minutos. Ao remataren, remexemos cunha culler de pau.
  6. Servimos a quinoa nun prato e botamos o rustrido por riba.

Que aproveite!

quinoa3