Polo rebozado ao mel

Polo rebozado ao mel

Xa sabedes que o polo é unha das miñas carnes favoritas*: vai ben con case todo! Desta vez probei a facer unha combinación doce-salgado, ademáis de crocante, e quedou super ben! Os filetes están bos só co rebozado, pero o mollo fai un contraste delicioso: é adictivo!

Se vos sobra mollo, coma me pasou a min, podedes probalo con filetes de porco, ou incluso de pato. Ou máis sinxelo: como acompañamento para un arroz ou un puré de patacas.

A receita é unha adaptación desta, pero cunhas proporcións máis axeitadas á xente que non vive en Norteamérica (menos mollo, menos fariña e menos ovo :D)

Ingredientes (para 2 ou 3 racións):

400 gr. de filetes de peito de polo

150 gr. de fariña

1 ovo grande, batido

1 culleriña de tomiño

1 cullleriña de ourego

1/2 culleriña de pementón

Sal e pementa

300 ml de aceite de xirasol, pra fritir

Para o mollo:

100 ml. de mel

2 culleres de mollo de soia

1 dente de allo, picado todo o que poidades

1 culler de Maizena

  1. Botamos o mel, a soia e o allo nunha tixola. Quecemos a lume medio durante 15 minutos.
  2. Nun vaso con 50 ml. de auga disolvemos a Maizena e engadimos esta mestura á tixola. Remexemos un par de minutos e retirámola do lume.
  3. Nun prato fondo, mesturamos a fariña e as especias. O ovo ha de estar noutro prato fondo, a carón.
  4. Se os filetes son moi largos, cortámolos en tiras: así collerán máis rebozado. Botámoslles sale e pementa, pasámolos polo prato da fariña, polo do ovo batido e outra vez na fariña, premendo ben para que quede compacto.
  5. Quecemos o aceite de xirasol nunha tixola pequena, cando estea ben quente botamos a fritir o polo. Con 2 ou 3 minutos por cada lado é dabondo, non fai falla que quede marrón.
  6. Retirámolo a un prato cuberto con papel de cociña.
  7. Servimos nos pratos: podedes botar o mollo por riba ou poñelo nunha cunca, por se a alguén non lle gustase (hai xente pra todo).

Que aproveite!

polo-rebozado-3 polo-rebozado-1

*"Eu o que quero é polo" non quedaba moi ben coma nome, pero é así...


Guiso de polo con olivas

Polo guisado con cebola e olivas negras

Esta semana toca un guiso con polo, a miña carne favorita. Xa vai un pouco de frío e apetecen pratos máis contundentes: este queda mellor se o facemos o día antes, xa que os sabores mesturaránse mellor.

A recita orixinal é do blog El comidista, esta é unha versión un pouco simplificada. Encántame como lle queda o tomiño e a mel á carne de polo, e tamén o sabor intenso das olivas: o vicio é andar apañándoas para mesturarlas na boca co resto de ingredientes, é unha explosión de sabor!polo-guisado-olivas2

Ingredientes (para 2 ou 3 racións, segundo o que comades)

2 coxas de polo

2 contracoxas, tamén de polo

2 cebolas pequenas ou unha grande

2 tomates pequenos de bote, pelados

150 gr. de olivas negras, con óso

1 culler de mel

1 culleriña rasa de tomiño

Un chisco de pementón doce

75 ml. de aceite de oliva

Sal e pementa

  1. Salpementamos o polo, quentamos o aceite nunha pota grande e douramos as partes por todos os lados.
  2. Cortamos a cebola en rodas finas.
  3. Retiramos o polo, baixamos o lume e cocemos a cebola a lume medio/baixo durante 30 minutos.
  4. Cortamos os tomates en dados, engadímosllos á pota xunto co mel, o tomiño o pementón. Metemos tamén o polo e deixamos cocer durante 1 hora a lume medio: Se o polo é de curral pode ser que precise máis tempo. Ao final a carne ten que estar branda e separarse dos ósos facilmente.
  5. Escaldamos as olivas durante 1 minuto e engadímolas ao guiso. Deixámolo cocer 15 minutos máis, sen tapa.polo-guisado-olivas4
  6. Para que saiba máis, é mellor deixar repousar unha noite.
  7. Para acompañaren, recoméndovos puré de patacas, cachelos ou arroz branco.

Que aproveite!

polo-guisado-olivas1


Especias: cales son e como usalas - 2ª parte

Seguimos coa guía de especias! A introducción podédela ler na primeira parte, pero estas son as razóns polas que todo o mundo debería ter especias na cociña.

  • Son baratas (a maioría)
  • Doadas de atopar
  • Duran moito
  • Danlle un toque especial a case calquera prato.

Aquí tendes unha pequena descrición, suxestións de uso e truquiños para cada unha delas:

Loureiro

Loureiro

O loureiro vén do Mediterráneo oriental, é unha das especias máis empregadas nos fogares galegos. Nalgunhas zonas chámanlle gamallo. Ademáis de cultivarse en fincas, podémolo atopar coma parte da vexetación salvaxe: xeralmente en lugares húmidos, pretos dos regos.

Un dos usos máis coñecidos é o de metelo a cocer co mariscos, mais tamén se pode utilizar para guisar coello con patacassolombo de porco con cervexa ou asar un polo.

Menta

Follas de menta

Unha das especias máis coñecidas, especialmente no seu uso tópico para cando un roza unha estruga. Por se algún non o sabía, axuda a quitar o proído, e sempre están preto unha da outra ;)

Na cociña úsase moito en pratos de verán polo seu sabor refrescante, e tamén para facer cocktails coma o mojito. Estas son as miñas suxestións para empregala: crema de menta para un pastel de chocolate, para facer unha limonada ou para adobar un cous-cous frío.

Noz moscada

Noz moscada

A noz moscada é unha especia bastante habitual estes tempos, xa que é moi doada de atopar e o seo prezo é barato. Tomada en grandes cantidades pode producir efetos alucinóxenos semellantes aos da marihuana, pero en doses pequenas non ten estas "contraindicacións" e serve para darlle aroma e sabor a unha grande variedade de pratos.

Unha das combinacións máis coñecidas e a do bechamel con noz moscada, coma neste timbal de pasta. Tamén queda ben botar un chisco na tortilla de patacas antes de cocela, ou no puré de patacas de sobre ;) Tamén se pode facer unha sopa brasileira de cebola e tomate.

Nos doces, dalle un toque especial á torta de cenoura e as cookies con manteiga.

Pementón

Pementón doce

Un clásico da gastronomía galega, a súa orixe remóntase ao descobrimento de América. Por mor dunha confusión, chamouselle pemento a cousas que non eran, como explicara no artigo da pementa de Caiena.

O pementón adoita ser doce, as receitas que eu recomendo: lagostinos ao espeto, polo asado adobado con pemento ou un guiso de berenxenas e feixóns.

Ourego

Ourego

Igual que a alfábega, é un clásico da cociña italiana e mediterranea. As follas son máis aromáticas cando están secas que cando están verdes. En Galicia haino nos montes e tamén se cultiva: para aproveitalo hai que apañalo ao final de agosto ou primeiros de setembro (antes de que choiva) cortar as flores e desbota-las follas e os troncos leñosos. Despois gardase nunha caixa de cartón ou nun saquiño de lenzo ata que estean secas de todo. Despois é recomendable conservalas nun tupperware ou nunha bolsa de plástico.

Podedes empregalo para facer uns canelóns de filloas, engadirllo á zorza antes de facer os chourizos, adobar carnes ao forno ou pan co olivas e especias.

Romeu

romeu romeu

As súas follas son moi fragantes, arrecenden máis secas ca verdes. É un arbusto que se atopa na rexión mediterránea da Europa meridional, Norte de África e tamén en Asia menor.

En Galicia é pouco frecuente que se dea en estado silvestre. Tamén se coñece co nome "alecrín".

Usos recomendables: para un solombo con patacas, facer un polo con mel, tomiño e romeu ou para aromatizaren aceite de oliva.

Tomiño

Tomiño

Outra herba aromática que se consume seca, ten unha fragancia moi intensa, polo que se emprega en estofados, grellas, adobos, mariñados (os de olivas, por exemplo). Ten propiedades dixestivas, pero hai que andar con conta nas cantidades que empreguemos, non vai ser que todo saiba a tomiño

Posibles receitas:  sopa de farigola (tipica de Cataluña), magret de pato, albóndegas de pavo con prebe de tomate ou para un sinxelo arroz branco con tomiño.

Xenxibre

Xenxibre, enteiro e moídoTípico da cociña asiática, trátase dunha raiz que se toma de cotío seca e relada. Crece nas rexións tropicais do mundo. As variedades máis aprezadas xeralmente proceden de Australia, India ou Xamaica, as máis cosumidas veñen de China ou Perú. Dende hai uns anos é habitual atopalo fresco en supermercados e tendas especializadas.

Ten un punto picante que fai que contraste con moitos sabores. Velaiquí algunhas recomedacións: unhas vieiras ao vapor de lima, uns fuciños de porco con patacas, xenxibre e cenouras, ou unhas galletas de xenxibre.

Se tendes as raices frescas, un te chai feito na casa. Está delicioso!

Ademáis da especia, Xenxibre é o nome dunha aldea de Lugo :D

E vós? Usades moitas especias? Onde as mercades? Deixade os vosos comentarios aquí mesmo, no Twitter ou no Facebook.