Torta de cenoura e avea

Unha desas receitas que se atopan por casualidade, buscando un uso para os flocos de avea que tiña abandonados pola cociña. Estaba eu a buscar tortas con avea, e din con esta receita, que despois eu modifiquei un chisco ao meu gusto.

Un par de cousas: se de normal os queiques están mellor ao día seguinte, este está mellor aos dous días, non esfarela tanto coma na foto (era o 1º día e esfarelaba todo) e o sabor do aceite de oliva notábase máis. Eu usei un da variedade hojiblanca con bastante acedume, dálle un sabor moi intenso. Se non sodes fans da intensidade do aceite, probade cun de oliva suave, ou incluso un de xirasol.

Ingredientes (para 8 racións, aprox, un molde de 25 cm. de diámetro)

3 ovos

120gr de azucre moreno de caña

150gr de cenoura relada

100gr de copos de avena + Unha présa para decoración

75gr de fariña de avea

75 gr. de fariña de trigo

90ml de aceite de oliva (ou de xirasol)

1/2 culleriña de canela en po

1/4 culleriña de noz moscada

15 gr. de fermento químico

Un belisco de sal

  1. Prequentamos o forno a 180º.
  2. Nun bol grande batemos os ovos co azucre, ata que clareen e formen unha pasta homoxenea.
  3. Engadimos a cenoura e o aceite, seguimos batendo.
  4. Engadimos a fariña, as especias, o fermento e o sal, batemos.
  5. Untamos un molde cun chisquiño de aceite e botamos a masa.
  6. Para que os flocos non afundan no queique, o truco é rebozalos con fariña de trigo, pódese facer cas mans, deixando caer a fariña que sobre. Estendémolos por riba da masa.
  7. Cocemos no forno durante 35-40 minutos, ata que estea ben dourado por riba.
  8. Deixamos no molde un día ou dous, servímolo de almorzo ou merenda!


Torta de queixo estilo xaponés

É unha das receitas máis breves e sinxelas que ides atopar en toda a páxina! Tanto, que só ten tres ingredientes, catro se contamos o chisco de sal :) As tortas de queixo "xaponesas" adoitan ser moi lenes e de sabor suave, cunha textura semellante aos sufflés.

A receita orixinal non é tradicional: seica hai uns anos que unha moza xaponesa colgou a súa receita en Youtube, que acabou por ser viral. Non é de estrañar, xa que paga moito a pena facer este doce: pouco esforzo e un resultado abraiante! O único a ter en conta é o molde: precísase un redondo de 20-22 cm. de diámetro e 4 cm de altura, polo menos, e outro máis grande para metelo con auga.

Para os que sodes fans das tortas de queixo, botádelle un ollo a esta de queixo do Cebreiro, ou esta de queixo de cabra e iogur grego.

Ingredientes (para unha torta de 4-6 racións)

4 ovos pequenos, ou 3 grandes
150 gr. de chocolate branco
125 gr. de queixo crema (tipo Philadelphia)
Un belisco de sal

  1. Prequecemos o forno a 170º.
  2. Rachamos o chocolate en anacos e colocámolo nun bol para derretelo no microondas a potencia baixa. O mellor é ir facendo quendas curtas, para que non haxa risco de que churrusque. Outra alternativa é derretelo nunha pota a lume moi baixo.
  3. Remexemos o chocolate derretido e mesturámolo co queixo e co sal ata formaren unha masa homoxénea.
  4. Separamos a clara dos ovos nun bol grande e botamos as xemas na mestura do paso 2, remexendo ata que mesturen ben
  5. Montamos as claras a punto de neve ata que fagan "picos", é dicir, que teñan unha textura moi consistente.
  6. Engadimos un pouco do punto de neve á outra mestura, remexendo sempre na mesma dirección para evitar que se desfaga moito. O mellor é empregar unhas variñas manuais, ou senón, dous garfos.
  7. Engadimos o resto do punto de neve en dúas quendas, repetimos o paso 5.
  8. Metémolo no molde pequeno e colocámolo no molde grande. Despois botamos auga ata que chegue á metade do molde pequeno.
  9. Cocemos no forno durante 25-30 minutos, ata que estea ben dourado por riba. Apagamos o forno e deixamos estar 15 minutos máis, depois sacamos o molde principal e deixamos que arrefríe nun mesado. A masa ha baixar moito: é normal.
  10. Deixámolo repousar un mínimo de 4 horas, e servímolo con marmelada de froitos vermellos, ou con crema de cacao.

Que aproveite!

torta_queixo_2


Torta de queixo do Cebreiro

Os que ledes este blog dende o principio xa sabedes que eu son moito de meter cousas nos queiques e tamén moi fan do queixo do Cebreiro, así que era unha cuestión de tempo que se xuntaran as dúas cousas ;) Se non tendes este queixo, podédelo cambiar por requeixo ou algún outro queixo cremoso.

Esta torta é moi doada de facer (non está na sección "Especial badocas" por nada!) e ten un sabor moi suave que seguro que lle gusta ata a aqueles que non gustan do queixo. Podédela acompañar de mel, marmelada de froitos vermellos, marmelo ou noces. En calquera caso, está deliciosa!

Ingredientes (para 6 racións, aproximadamente)

3 ovos

150 gramos de queixo do Cebreiro

1 iogur grego

1 medida (de iogur) de azucre

1 medida e cuarto de fariña

2 medidas de leite gordo (enteiro)

Un belisco de sal

Un chisco de manteiga ou aceite de xirasol para engraxaren o molde

  1. Prequentamos o forno a 180º
  2. Quentamos un pouco o queixo no microondas, para que abrande, pero sen chegar a derreter.
  3. Nun bol batemos todos os ingredientes ata formaren unha crema homoxenea.
  4. Engraxamos o molde (eu usei un de 20 cm de diámetro e aínda sobrou un pouco para outro máis pequeno).
  5. Botamos a crema, deixando un par de centímetros de marxe co borde superior do molde. A masa ha subir bastante, e non queremos que saia polas beiras.
  6. Cocemos no forno ata que quede dourado/marrón polas beiras, e a parte do centro un pouco máis branda. Así queda máis cremosa: se vos gusta sequiña, deixádea un pouco máis no forno.
  7. Deixamos arrefriar, e cando estea completamente fría (ha baixar todo o que subiu no forno), servímola.

Que aproveite!

torta-queixo--1 torta-queixo-2 torta-queixo-3


Torta de mousse de chocolate e café

Velaiquí unha reecita para os ultra-larpeiros: unha deliciosa torta de mousse con chocolate derretido, nata batida e aroma de café e crema de augardente. Unha explosión de sabor que de seguro ha triunfar nas comidas familiares ou aniversarios!

Como é unha desas cousas das que non se pode facer pouco, recoméndovos dúas cousas: ou facedes vasiños coma os de esta receita, ou vos asegurades de que vai haber moita xente para comela, xa que a enchenta pode ser boa!

Podedes substituir a crema de augardente por caña, licor café ou ron, ou deixalo sen alcol, tamén está bó! Na cobertura podedes usar cacao en pó, queda mellor se despois lle ides colocar unhas letras :)

Ingredientes (para 8 ou 10 racións)

500 ml. de nata para bater

250 gr de chocolate negro

3 claras de ovo

100 gr. de azucre (preferiblemente glass)

60 ml. de auga

20 ml de café soluble

6 láminas de xelatina neutra

60 ml de licor de augadente (opcional)

Améndoas laminadas ou cacao en po para decorar

Para a base

15 bolachas tipo Digestive

25 gr. de manteiga

3-4 culleres de leite

Hai que usar un molde desmontábel de 24 cm de diámetro, aproximadamente, e papel de forno.

  1. Forramos a base do molde co papel de forno e pechámos. Ten que quedar así:molde
  2. Quentamos un chisco a manteiga para que abrande.
  3. No triturador (ou vaso da batedora) botamos as bolachas, a manteiga e o leite, trituramos.
  4. Estendemos a pasta no fondo do molde, alisándoa cunha culler. Deste xeito aillaremos a base para que non saia o contido.
  5. Nunha pota quecemos a auga co café soluble, e engadimos a xelatina. Usamos ese líquido para derreter o chocolate, botándoo en anacos pequenos, a modiño. Deixamos arrefriar.
  6. Nun bol grande, batemos a nata co azucre ata que teña unha textura consistente.
  7. Batemos as claras de ovo ata que estean brancas.
  8. Engadimos o contido da pota no bol grande, tendo conta de que a nata non baixe: Para isto precisamos batelo a man cunhas variñas.
  9. Repetimos a operación cas claras. Se queredes botarlle o alcol, é o momento tamén :)
  10. Vertemos no molde e alisamos a masa cunha espátula ou coitelo longo.
  11. Gardámola no frigorífico durante 12 horas coma mínimo, para que calle.
  12. Antes de desmoldala, decoramos con améndoas lamindas ou cacao en po.

Que aproveite!

torta-mousse4 torta-mousse3


Torta de mazá caramelizada

Hai dúas semanas estiven visitando Ferrolterra e quedei abraiada da cantidade de maceiras que había, e tamén das mazás que andaban polo chan sen que ninguén as recollese. Apañei un par de bolsas, e como aínda estaban un pouco verdes e duras, decidín facer compota, e despois unha torta: a miña propia versión dun doce estadounidense que lin neste marabilloso blogue.

O resultado foi boísimo, a mazá caramelizada está deliciosa e fai moi bo contraste co follado crocante. Se queredes levar a merenda a un nivel superior, acompañádeo de nata montada ou de xeado de vainilla!

Ingredientes para 6 racións:

1 paquete de follado rectangular de 350 gr, aproximadamente

2 mazás grandeiras, peladas, sen sementes e cortadas en anacos

160 ml. de zume de mazá

80 ml. de auga

80 gr. de azucre

25 gr. de manteiga

Un chisco de canela

Un belisco de sal

50 ml. de leite gordo para pintar por riba

  1. Nunha tixola grande botamos as mazás, o azucre, o sal e maila auga. Deixamos quecer a lume medio durante 20 minutos.
  2. Engadimos o zume e cocemos 15 ou 20 minutos máis, ata que as mazás estean case desfeitas. Esmagámolas cunha culler de pau.
  3. Baixamos o lume e remexemos 10 minutos máis, remexendo ben para que a pasta non pegue na tixola. Neste momento tenque ter unha cor marrón clara, coma a do caramelo.
  4. Engadimos a canela e a manteiga, retiramos do lume. Deixamos arrefriar por completo.
  5. Prequentamos o forno a 200º
  6. Sacamos 2 tercios da masa de follado, cortamos, estendemos e pinchamos cun garfo para que non suba demáis ao quecer.
  7. Estendemos a mazá caramelizada, deixando una marxe dun centímetro polos lados.
  8. Co tercio que sobra do follado facemos tiras verticais, que iremos cortando á medida para colocalas en diagonal. O máis sinxelo é comezar polas esquinas e acabar no centro. Pegámolas ás marxes do follado
  9. Pintamos co leite o pastel, para que doure mellor. O máis recomendable é facelo cun pincel de silicona.
  10. Quecemos no forno a unha altura media durante 30 minutos, ou ata que estea ben dourado.

Que aproveite!

torta-maza-2torta-maza-3 torta-maza-1