Cheesecake de queixo de cabra e iogur grego

Hai tempo que quería probar a facer unha torta de queixo estilo americano na casa, pero querría probar algo un chisco distinto, así que fixen unha adaptación desta, pero engadindolle noces á base (idea que penso repetir, queda moito máis rica) e cambiando as galletas de vainilla polas de avea para que non quede tan doce. A verdade é que estou moi satisfeita co resultado: semella levar máis traballo, pero en 20 -30 minutos máis o tempo de cocción está lista, un triunfo asegurado!

Unha receita axeitada para aqueles que non moi larpeiros (hai xente para todo!), xa que se a tomades sen mel ten un regusto salgado moi agradable. Agora que comeza o bo tempo é moi boa idea levala coma sobremesa dun picnic ;)

Ingredientes (para un molde de 25 cm de diámetro) :

360 gr. (dous paquetes) de queixo rulo de cabra

125 gr. de queixo para untar

1 iogur grego 

2 ovos

75 gr. de azucre

Para a base

20 galletas de avea tipo "Digestive"

80 gr. de manteiga

Unha presa de noces peladas e picadas

Nota: esta torta é mellor facela nun molde desmontable.

 

  1. Esmagamos as galletas, derretemos a manteiga e triturámolo todo xunto cas noces ata formaren unha pasta homoxénea. Se vedes que queda moi seca, engadide unhas pingas de auga para que estenda mellor.
  2. Prequentamos o forno a 180º.
  3. Quitámoslle a codia aos rulos de cabra e cortámolos en rodas de 2-3 cm.
  4. Metemos as rodas nun bol xunto co queixo para untar e quentámolos no microondas a potencia media para que abranden.
  5. No bol dos queixos botamos o azucre e batemos ca batedora. Cando estea ben mesturando engadimos os ovos, un de cada vez.
  6. Colocamos papel de forno no molde desmontable. Estendemos a pasta base esmagándoa ben cunha culler.
  7. Vertemos a pasta de queixo a modiño, alisamos a superficie para que non quede burbullas.
  8. Cocemos a torta no forno durante 45 aproximadamente. Se vos gusta cremosa, sacádea antes: aínda que o centro estea líquido callará pouco a pouco. Se vos gusta más compacta, deixadea ata que saian manchas na superficie, como fixen eu.
  9. Deixamos repousar 6 horas, coma mínimo.
  10. Decoramos con mel e servimos.

Que aproveite!

cheesecake-cabra1cheesecake-cabra3


Queique de amorodo

Xa hai tempo que quería facer un queique con amorodos dentro (e non por riba) pero tiña medo que o zume cortara a masa. Ao final atopei unha receita do sur dos Estados Unidos (perdín a ligazón :S) que ben serve para facer un pastel de aniversario ou como merenda para unha tarde especialmente larpeira.

Aínda que eu non o fixen, penso que o acompamento ideal sería unha bóla de xeado de vainilla ou nata batida. MMMMHHHH! Leva moita manteiga, pero o resultado final é moi lixeiro!

Ingredientes (para 10 racións aprox.)

150 gramos de amorodos en cachiños

250 gramos de azucre

325 gramos de fariña

200 gramos de manteiga (do tempo)

2 ovos grandóns

1 vaso de leite enteiro

3 culleres de zume de limón

3 culleres de xelatina de amorodo

1/2 culleriña de extracto de vainilla

1/2 culleriña de bicarbonato sódico

Un belisco de sal

Aceite de xirasol para engraxar o molde

Azucre glas para a decoración

manteiga

  1. Quentamos un chisco a manteiga no microondas, sen que chegue a derreter. Botámola nun bol co azucre e batemos ca batidora ata facer unha crema branquiña.
  2. Botamos unha culler de zume de limón no vaso de leite e deixamos repousar 15 minutos. Isto é a versión caseira do buttermilk, e ha servir para que o bicarbonato funcione coma fermento.
  3. Prequentamos o forno a 170º.
  4. Nun prato fondo mesturamos a fariña co bicarbonato, a xelatina e o sal.
  5. No bol do paso 1 engadimos os ovos, o resto do zume e mailo extracto de vainilla, batemos.
  6. Engadimos o leite e a mestura da fariña a modiño, batendo ben para que non queden grumos. A masa irá quedando cada vez máis rosiña polo efecto da xelatina.
  7. Engadimos os amorodos e batemos un chisco máis:prep1
  8. Engraxamos un molde que sexa un pouco fondo.
  9. Cocemos no forno durante 30-40 minutos, ou ata que ao meter un coitelo saia seco. Deixamos arrefriar (mellor encima dunha reixa, para que saia a humidade) e decoramos cun pouco de azucre glas.queique_amorodos5queique_amorodos4

Que aproveite!

 

 

 


Pasteliños de noces e dátiles

Volvemos cos doces, pero desta vez a inspiración vén de Grecia e Turquía, nunha especie de baklava "feito na casa". En realidade o baklava leva bastante máis traballo e sae un chisco distinto a esta receita, pero penso que ben vale como introducción ao mundo de doces con froitos secos.

Como saen uns doces bastante contudentes, recoméndovos tomalos ao almorzo ou á merenda cun té, xa que de sobremesa poden ser demasiado :D

Ingredientes (para 6- 8 unidades)

1 paquete de masa fresca de follado

50 gr. de azucre

50 gr. de noces moídas

50 gr. de dátiles sen óso ou de uvas pasas

50 gr. de pan relado

50 ml. de ron dourado

1 culleriña rasa de canela en po

A pel relada de medio limón

Azucre glass para decorar

  1. Deixar os dátiles ou as pasas en remollo durante media hora. Escorrer.
  2. Prequentar o forno a 150º, só pola parte superior.
  3. Nun bol, triturar tódolos ingredientes ata que quede unha masa suave e un chisco pegañenta.prep1
  4. Cortar a masa en rectángulos de 12 x 5 centímetros, aproximadamente. Colocar unha porción do recheo ao longo deixando un centímetro por cada lado, enroscar, formar un aro e apretar a masa para que peche ben.
  5. Colocar na bandexa do forno (usando o papel que trae a masa do follado) e cocer durante 20-25 minutos, ou ate que douren por riba.
  6. Esparexer o azucre galss por riba e deixar enfriar.

Bo proveito!

pseudo-baklava4


Torta de laranxa, mandarina e améndoas

Xa queda pouco para o Nadal, e aproveito para recuperar unha receita que fixen hai un ano e tivo moito éxito entre os comensais en Noiteboa. Se estades fartos de polvoróns e turrón, ide xuntando o ingredientes para probar isto!

Ten un puntiño amargo, porque leva a pel dos cítricos cocida, pero compénsano a améndoa e o azucre: É unha adaptación, quitando o chocolate e cambiando algunhas proporcións, de esta do blog El comidista, seguro que xa o coñecedes :D

Ingredientes (para 15 racións, aproximadamente):

5 ovos

250 gramos de azucre de caña

125 gr. de améndoa moída

100 gr. de fariña (para os celíacos: pódese substituir pola mesma cantidade de améndoa )

1 laranxa

1 mandarina

1 culleriña de fermento Royal

Manteiga ou aceite de xirasol para untar o molde

Azucre glas e/ou améndoas laminadas para decorar

  1. Cocemos a laranxa e a mandarina durante 30 minutos. Cambiamos a auga e cocemolas outros 30 minutos. Escoamos e deixamos enfriar.
  2. Prequentamos o forno a 190º
  3. Nun bon grande batemos os ovos e o azucre. Engadimos as améndoas moídas e batemos.
  4. Cortamos a mandarina e a laranxa pola metade para ver que non teñan sementes. Partímolas en anacos pequenos, botámolos no bol e batemos.
  5. Engadimos fariña e fermento á mestura e seguimos batendo ata que teña unha consistencia homoxénea.
  6. Untamos o molde con mateiga ou aceite de xirasol.
  7. Cocemos no forno durante 45 minutos, máis ou menos. Para saber se está, introducimos un coitelo na masa, e se sae seco, está listo!
  8. Decoramos esparexendo o azucre e as améndoas laminadas.

Que aproveite!

torta_laranxa_amendoas4


Queique de plátano con chocolate e noces

Un queique MOI calórico pero que está delicioso, e ademáis, aguanta ben unha semana se o gardades nun sitio fresco e seco (no frigorífico non, que colle humidade!)

Ingredientes:
150 gr de fariña
30 gramos de cacao
2 culleriñas de levadura química
½ culleriña de bicarbonato (se non tendes, botade un chisco máis de levadura)
½ culleriña de sal
125 gr de manteiga (derretida)
150 gr de azucre
2 ovos grandóns
4 plátanos pequenos (moi maduros)
60 gr de noces esmagadas
100 de chocolate negro en anaquiños
1 culleriña de extracto de vainilla

  1.  Prequentar o forno a 170º
  2. Nun bol mediano, botar a fariña, a levadura, o bicarbonato e o sal e remexer (cas mans ou cunha culler de pau).
  3. Nun bol grande, botar a manteiga derretida e azucre, bater ata que estean ben mesturados. Engadir os ovos, un de cada vez, mentres se bate. Esmagar os plátanos cun garfo e botar a pasta no bol.
  4. Engadir o chocolate, as noces e o extracto de vainilla, seguir batendo. Botar a mestura do bol mediano, un tercio de vez, remexendo ben.
  5. Verter a masa nun molde untado con chisco de manteiga morna ou aceite de xirasol. Mellor se o molde é cadrado, para poder facer rebanadas despois, as medidas aproximadas serían 23 x 13 x 7cm. Podédes facer tamén queiques individuais en boles de cerámica de fondo redondeado. Cocer no forno a 180º durante  30 minutos. Para saber se  está listo, meter un coitelo, e se sae case limpo é que xa está.

Nota 1: Este queique vai moi ben para aproveitar eses plátanos ennegrecidos que ás veces quedan no froiteiro. Como xa vos comentara na receita de batido de amorodos, pódense conxelar perfectamente: un truco para que a polpa non perda cor é aderezala con zume de limón antes de conxelar.

Nota 2: Se tendes tazas de café grandes con fondo redondo, e un chisco de paciencia, podédelas usar de moldes e facer tartiñas individuais, ou aproveitar a masa que non caibe no molde, coma na foto.

Redondiño e esponxoso
Redondiño e esponxoso

Que aproveite!