Xeado de lima (e alfábega)

Este verán aínda non usara moito a xeadeira, e andaba a darlle voltas a que sabores podía facer na casa. Lembrei que unha vez probara a combinación de lima e alfábega nunha xeadería e non podo estar máis contenta co resultado! Unha crema refrescante e non moi doce, perfecta para o verán! A cor beis que ten é porque usei azucre de caña, se usades o normal ha quedar branca coma a neve.

Se non tendes alfábega (ou parécevos  moi atrevido o meter prantas nun xeado) podédelo deixar de lima soa, ou engadirlle raspas de limón ou de chocolate negro. Se vos gusta o sabor desta froita, botádelle un ollo a esta gorentosa torta fría.

Ingredientes (para 5-6 racións)

200 ml. de nata para bater (35% MG)

150 ml. de leite enteiro

160 gr. de azucre

Zume e pel relada dunha lima

6 ou 7 follas de alfábega

1 culler de mel (opcional)

  1. Mesturamos todos os ingredientes agás a alfábega nun bol, e deixamos arrefriar na neveira.
  2. Imos introducindo a mestura aos poucos na xeladeira. Despois engadimos a alfábega en anacos, que se mesture, pero que non rompa demáis. Se non tendes máquina xeladeira metédeo nun recipiente no conxelados e remexede cada 30 min, para que non cristalice.
  3. Servimos decorado cunha folla de alfábega. Se sobra, aínda aguantará dous ou tres días no conxelador.

Que aproveite!

xeado_lima1

 


Rolos doces de batata, laranxa e noces

Un dos meus descubrimentos máis recentes é a batata. Ás veces tomase asada ou en crema, o que non coñecía é a súa utilidade para repostería, seica en inglés lle chaman sweet potato. Para facer a masa precisades fariña de forza, tamén chamada "de panadeiro" : fai que levede mellor e aguante mellor o amasado. Véndena en case todas as panaderías. O fermento seco véndeno nalgúns supermercados e en tendas especializadas en produtos naturais.

Estes rolos son unha das receitas máis complicadas ate o de agora, por iso puxen fotos de tódolos pasos importantes. Se seguides todos os pasos non ha ser difícil, pero tede en conta que levará unhas 3 horas polo menos. Mellor deixala para a fin de semana ;) Se queredes facer doces con froita máis doados, probade este queique de mazá, ou este de amorodos.

Ingredientes (para 12 pezas)

1 batata grande (250 gr.)

250 ml de leite 50 gr. de manteiga

2 culleradas rasas de azucre

Reladura dunha laranxa

Zume dunha laranxa

650 gr. de fariña de forza

1 culleriña de sal

4,5 gr. de fermento seco (medio sobre)

Aceite de xirasol para amasaren

Para o recheo:

100 gr. de noces peladas e picadas

100 gr. de azucre de caña

2 culleriñas de canela moída

Flocos de manteiga (fanse cun coitelo cando está fría)

  1. Pelamos a batata, cortámola en rodas finas e despois en anacos pequenos. Pasámola pola trituradora ata formaren unha pasta. Tamén podédela relar a man.rolos_boniato_prep1
  2. Quentamos o leite ata que estea a piques de ferver. Engadimos a pasta de batata, a manteiga, o azucre, a reladura e o zume da laranxa e remexemos.
  3. Deixamos repousar ata que estea a temperatura ambiente, engadimos o sal, o fermento e a fariña. Remexemos ben e deixamos repousar 10 minutos.
  4. Untamos o mesado co aceite de xirasol (mellor usade un pano de papel) e vertemos a masa. Amasámola a modiño durante 5 minutos e volvemos a metela no bol. Tapamos cun film transparente e deixamos repousar durante unha hora, remexendo unha ou dúas veces cunha culler de pau.rolos_boniato_prep2
  5. Limpamos o mesado de aceite e esparexemos fariña. Botamos a masa do bol e amasamos ata que despegue ben das mans.
  6. Estendemos a masa facendo un rectángulo dun centímetro de grosor.rolos_boniato_prep2b Botámos as noces, a canela, o azucre e mailos flocos de manteiga.rolos_boniato_prep3
  7. Indo con conta, enrolamos a masa ata facer un cilindro. Cortamos en 12 rodas e colocámolas nunha bandexa con papel de forno. Deixamos repousar unha hora máis.rolos_boniato_prep4
  8. Prequentamos o forno a 180º e metemos a bandexa durante 20 minutos, máis ou menos, ata que os rolos douen por riba. Eu puxéno un pouco máis quente, e por iso quedaron un pouco máis churruscados por riba. AVISO: cada forno é un mundo, así que vixiade os rolos mentres cocen!

Que vos parece a repostería con boniato ou pataca? Probaste máis receitas deste tipo?rolos3rolos4

 


Petisco de berenxena - Baba ganoush

Hoxe temos un prato típico de Oriente Próximo: é un entrante moi popular en Xordania, Líbano, Palestina, Siria e Israel e ten moitas variantes, coma o patlıcan salatası  turco ou o muttabal. Como eu tampouco son experta no tema, procurei facer a versión máis sinxela, se coñecedes trucos ou consellos para mellorala, avisade nos comentarios ;)

Ao faceren a receita é importante torrar ben as berenxenas, xa que o gusto levemente afumado é una das características principais do prato. Tamén hai que ter conta, pero isto xa vai por gustos, de non pasar as berenxenas pola batedora: con anaquiños é máis saboroso. É un prato ideal para petiscar entre horas cuns panciños ou para comer de primeiro prato acompañado de pan de pita torrado, está delicioso!

Ingredientes (para catro persoas)

Dúas berenxenas medianas

2 ou 3 culleres de tahini (pasta de sésamo)

2 ou culleres de aceite de oliva virxe extra + un chisco para decorar

Zume dun limón

Sal e pementa ao gusto

Un dente de allo ben picado e esmagado

Perexil freco picado (opcional)

  1. Prequentamos o forno a 170º e colocamos papel de forno na bandexa negra. Lavamos as berenxenas e cortámolas pola metade ao longo. Colocámolas na bandexa coa pel cara arriba e pinchámolas 3 ou 4 veces cun garfo.
  2. Poñemos a cocer a bandexa na parte de arriba do forno durante 15 minutos, ata que comece a cheirar a queimado e a pel estea negra. Dámoslle a volta e cocemos 15 minutos máis, ata que torren (pero non moito) polo outro lado.
  3. Retiramos a bandexa e deixamos arrefriar.
  4. Nunha cunca ou prato fondo grande botamos o tahini e o zume de limón, remexemos ata mesturar ben e engadimos o aceite, o allo, o sal e a pementa. Remexemos ata facer unha pasta homoxénea.
  5. Pelamos as berenxenas e sacámoslles o líquido que han de ter no interior. Isto pódese facer de dous xeitos: nun coador, apretando cun garfo, ou apretando cas más. Tampouco cómpre apretar moitísimo, con que saian unhas pingas de cada metade, abonda.
  6. Botamos as tiras de berenxena na cuna ou prato e esmagamos cun garfo ata que queden tiras máis pequenas. Decoramos con aceite e perixel e servimos acompñado de pan torrado.

Que aproveite!

baba_ganoush_4 baba_ganoush_

 


Crema rubia de verduras

Esta semana temos unha crema de verduras, que xa hai tempo que non caía ningunha por aquí. O nome venlle da cor que ten, grazas aos pementos de Piquillo e ao tomate. Aproveito para recomendarvos este post de César Lorenzo que explica moi ben as distintas tonalidades de pelo en galego, e por extensión, o significado de rubio, moitas veces esquecido ;)

Esta crema ten un sabor moi suave, sen dúbida é moi boa opción para as ceas e primeiros pratos... Que vos parece a idea?

Ingredientes (para catro racións)

Unha cabaciña

Unha cebola

Un tomate maduro

120 gr. de pementos do Piquillo

3 culleres de puré de pataca en po

1 pastilla de caldo (de polo ou verduras, o que vos guste máis)

Un belisco de sal

Media culleriña de ourego

2 ou 3 culleres de aceite de oliva, máis un pouco para decorar

  1. Lavamos e pelamos as verduras. Se queredes pelar o tomate, mellor fervédeo 30 segundos en auga quente, desde xeito a pel será moi fácil de retirar.
  2. Cortamos a cabaciña en rodas de algo menos dun centímetro, o mesmo ca cebola. Cortamos o tomate en anacos e metémo todas as verduras frescas, a pastilla de caldo, o ourego e o sal nunha pota.
  3. Botámoslle auga ata cubrir as verduras, e deixamos cocer aproximadamente 20 minutos, ata que estea todo brando.
  4. Engadimos os pementos de Piquillo e e o aceite e batemos ca batedora ata conseguiren unha textura homoxenea. Se queda moi líquido, ide engadindo o puré de pataca;se vos gusta como está, entón non fai falla.
  5. Servimola quentiña, decorada cunhas pingas de aceite

Que aproveite!

crema_rubia1


Crema de ovo

A receita de hoxe é un clásico en moitos fogares e restaurantes de España: a medio camiño entre a crema pasteleira e o flan, a crema de ovo (coñecida pola maioría da xente coma natillas) é unha sobremesa moi saborosa e dixestiva, aporta moitas calorías para estes días de inverno e o ingredientes son ben doados de atopar ;)

Podedes cambiar as ramas de vainilla por unha de canela, e experimentar ca decoración: no canto de galletas eu usei biscoitos saboianos (ou de soletilla) pero teño pendente probar con cacao en po, noces moídas... e se tivese un soprete, tería feito crema catalá! Pero iso queda xa para outra vez...

Ingredientes (para 8 racións)

800 ml. de leite enteiro

8 xemas de ovo

300 gr. de azucre

3 culleres de Maizena

2 ramas de vainilla

Un belisco de sal

Canela e galletas para decorar

 

  1. Botamos o leite cas ramas de vainilla nunha pota. Quecemos ata ferver e retiramos do lume e deixamos arrefriar.
  2. Nunha pota máis grande batemos as xemas de ovo, a Maizena, o sal e o azucre ata facer unha pasta. Poñemola a cocer a lume medio.
  3. Retiramos as ramas de vainilla e botamos o leite a modiño na pota do paso dous, sen deixar de remexer.
  4. Cando a crema acade unha textura espesa, apagamos o lume e deixamos repousar un par de minutos.
  5. Colocamos a crema nos recipientes e deixamos arrefriar a temperatura ambiente.
  6. Servimos os vasos (ou cuncas) decorados con canela en po e unha galleta.

crema-de-ovo3 crema-de-ovo2 crema-de-ovo1