Compota de pavías

É tempo de pavías! E de tomates, patacas, uvas, etc. O caso é que ás veces xúntanse moitas e hai que buscar un xeito diferente de cociñalas, coma esta compota con viño tinto: sinxela, barata e rápida! Se queredes máis receitas de compotas, tendes esta de mazá con cardamomo

E vós, que facedes cas pavías? As ideas son benvidas nos comentarios :)

Ingredientes (para 3 ou 4 racións)

500 gr. de pavías

250 ml. de viño

60 gr. de azucre

Un pauciño de canela

  1. Lavamos as pavías e metémolas en auga fervendo durante 3 minutos, para escaldalas e que a pel saia mellor.
  2. Retirámolas e secámolas.
  3. Na mesma pota, limpa, cocemos o viño co pau de canela a lume medio, durante 3 minutos, despois engadimos o azucre a modiño, mentres remexemos para que non se pegue. Deixámolo cocer 5 minutos, ata que espese. Retiramos
  4. Pelamos as pavías e cortámolas en anacos pequenos.
  5. Botámolas na pota e volvemos cocer a lume medio durante 5 minutos. Quitamos o pau de canela.
  6. Estará máis bo ao día seguinte, pódese tomar quente ou do tempo!

Polo guisado con verduras e viño branco

A quen non lle gusta o polo guisado? Esta semana traemos unha receita moi doada de facer (en serio, o único que cómpre é un pouco de paciencia). Esta receita viría sendo a versión estival deste polo guisado ao viño tinto.Podedes cambiar as verduras, tamén quedaría ben con cebola e pementos, berenxena, etc.

Xa sabedes que por estas leiras somos moito de polo, podedes velo nesta receita de albóndegas de polo con ananás, ou esta de polo rebozado ao mel.

Ingredientes (para 4 racións)

8 coxas ou contracoxas de polo

Un allo porro

Unha cabaciña

6 metades de tomates secos rehidratados

250 ml. de viño branco, seco ou semi-seco

8 culleres de aceite de oliva virxe extra

Sal ao gusto

1/2 culleriña de tomiño

  1. Poñemos o aceite a quecer nunha tixola ben grande. Douramos ben as pezas de polo e reservamos.
  2. No mesmo aceite botamos o allo porro e a cabaciña cortados en dadiños. Cocemos a lume medio ata que comecen a estar brandos e transparentes.
  3. Engadimos os tomates secos picados, o tomiño e o sal. Remexemos un par de minutos.
  4. Engadimos o viño e deixamos cocer máis ou menos 5 minutos, ata que evapore o alcol.
  5. Botamos o polo de volta á tixola e deixamos cocer, a lume medio, durante 20 ou 30 minutos. E probable que algunhas verduras queden caramelizadas (escuras), pero non vos preocupedes, están moi boas así!

Que aproveite!


Spaghetti á amatriciana

Coma moitas receitas tradicionais, esta pasta ten moitísimas variantes, e sempre hai o risco de ofender a algún italiano con elas :D A orixinal vén da rexión de Amatrici, preto de Roma, e tén ata festa popular.

A receita orixinal leva guanciale, que é a fazula curada do porco. Tamén se usa para facer a receita orixinal da carbonara (non esas con nata que poñen en moitos restaurantes). Pódese atopar en tendas gourmet ou online, pero por temas de comodidade cambiena por touciño entrefebrado curado. Outro dos ingredientes orixinais é o queixo pecorino, que se pode cambiar por un parmesán, un manchego ben curado ou un coma O rexo, que ademáis ten unha producción sustentable. O caso é que teña un sabor intenso e un pouco salgado.

Por último, quería engadir un crédito, xa que a receita está sacada do marabilloso blogue La ragazza col matarello, onde podedes atopar ducias de receitas itailianas en español.

Ingredientes (para 4 racións)

350 gr. de spaghetti ou outra pasta alongada

100 gr. de touciño entrefebrado ou guanciale, en cubiños

4 tomates de lata, en anacos

100 ml. de viño branco, seco

4 culleres de aceite de oliva virxe extra

1 cebola grande

1 semente de caiena (opcional)

100 gr. de queixo curado relado

Un chisquiño de sal

  1. Nunha tixola grande (é onde mesturaremos todo ao final) pasamos o touciño, sen aceite, ata que comece a churruscar. Botamos o viño e deixamos cocer a lume medio-baixo ata que case non quede líquido.
  2. Nunha pota, imos cocendo a pasta segundo as instruccións do fabricante. É mellor deixala pouco pasada, xa que logo ha cocer máis.
  3. Retiramos o touciño a un prato e fritimos a cebola no aceite de oliva, sen limpar a tixola. Cando comece a transparentar, engadimos o sal, a caiena e os tomates. cocemos durante 10 minutos, engadimos un par de culleres da auga de cocer a pasta, e 1 minuto despois, a pasta escoada.
  4. Remexemos ben e engadimos a metade do queixo relado.
  5. Servimos quente co resto do queixo, para que cada quen lle bote ao gusto.

Que aproveite!

amatriciana_2

 


Risotto de queixo parmesano e viño branco

O risotto é, igual ca panna cotta, un prato típico do norte de Italia. Esta receita de arroz ten unhas condicións específicas: o grán ten que botar amidón para que quede cremoso, e ao mesmo tempo ten que absorber a humidade para que quede no punto xusto e non acabe como unha sopa de arroz. Nos supermercados pódese atopar variedades de arroces que cumprar con eses requisitos, as máis comúns son arborio e arroz bomba. Tamén se pode cambiar o queixo parmesano polo grana padano, que é máis barato pero ten un sabor similar para o que queremos acadar.

Este artigo foi publicado orixinalmenteo 22 de xuño de 2013, esta é unha versión corrixida e con novas fotos.

Ingredientes (para 4 racións):

350 gr. de arroz de gran redondo

1 culler de perixel - fresco ou seco

2 culleres de aceite de oliva

1 cebola pequena

100 gr. de manteiga

250 ml. de viño branco

200gr. de queixo parmesano - raiado ou en anacos moi pequenos

1 - 1,2 litros de caldo de verduras ou de polo

  1. Botar o aceite e a cebola nunha tixola grande, quentalo a lume medio durante cinco minutos, ata que a cebola estea branda e un pouco translúcida. Engadir o arroz e unha culler de manteiga, torrando o arroz 3 ou 4 minutos. Verter o viño e remexer pouco a pouco ata que o arroz absorba o líquido.
  2. Quentar o caldo nunha pota aparte ou no microondas, e botalo ós poucos na tixola. O mellor é usar un cullerón, enchelo e verter o contido, remexer ata que o arroz absorba o caldo e repetir o proceso ata rematar o líquido. Dependendo da cantidade que utilicedes, debería levar entre 12 e 15 minutos.
  3. Retirar do lume, engadir o resto da manteiga e o queixo, remexendo ben ata que derreta e estea uniforme.
  4. Servir nun prato decorándoo co perixel.

Que aproveite!

risotto3


Que tomar para aliviar a resaca

Fuches polo vento e volvihes polo aire? Chegan as festas, e con elas as paparotas polo día e pola noite, o saír pola noite...e beber demáis. Aínda que a xente lévaa experimentando milleiros de anos, aínda non ten cura exacta (igual cas maniotas!) pero si se pode paliar bastante seguindo estes consellos:

Antes de beber

O truco de toda a vida de comer moito funciona, e se leva graxa, aínda mellor. A graxa formará unha película nas paredes do estómago e fará que o corpo absorba o alcol máis lentamente.

Ao beberen

Tomar auga de cando en vez vai ben para ir hidratando o corpo, xa que o alcol é diurético (o de ir mexar tantas veces é por iso) e cando no corpo non atope auga de por si, vaina coller dos miolos, entre outros órganos. Iso é o que fai que teñamos unha horrible dor de cabeza ao día seguinte. E moita sede, así que lembrade beber auga.

Ao día seguinte

O importante é hidratar o corpo e darlle pouco traballo ao estómago, que xa estará ardoroso da noite anterior. Velaiquí tendes unha selección de comidas e bebidas axeitadas para tan delicado día:

  • Auga ou bebidas isotónicas, polo mesmo que o punto 2: eses miolos precisan hidratación.
  • Pan ou torradas: fácil de dixerir, proporciona carbohidratos que lle dan enerxía ao corpo.
  • Ovos: o mesmo  que o pan, pero con proteínas, se o tomades xunto, mellor.
  • Un caldiño de polo con fideos.
  • Froita, pero que non sexa aceda.
  • Café: axuda a espertar e a quitar  dor de cabeza, pero tamén é diurético, así que mellor acompañalo con auga.
  • Aspirina ou ibuprofeno, logo de comer. O paracetamol mellor evitalo, como explican neste artigo (tamén sobre remedios á resaca) a boa xente das Mir e unha noites.

Outras cousas que axudan son ducharse con auga fría, sair tomar un pouco o ar e non comer picante, nen cousas con moita graxa.

Hangover_59f50b_2477497

E vós, tendes algún truco para a resaca? Se é así, partilladeo nos comentarios ou no Twitter.

Boas festas!

PD: a ilustración do post é de Patrick Leger, a do gato non ten autor coñecido.